maandag 28 mei 2018

Op bezoek bij n wintergast

De bonte kraai, zeg mor, n neef of nicht van e zwarte kraai. Hier zien je de vogel zowat noeit, allenneg bij winterdag, as t slim kold is. Verkloareng is dat et ien oostelek Duutsland en Polen dan nog kolder is, zodat de vogels onze kaant opkommen. Mor leste tien, vieftien joar ben k ze volgens mij hier niet meer tegen kommen.
Toch zie k bonte kraaien geregeld as ik noar t oosten reis. Rond Berlin doagen ze op. Nog n endje vedder ien Polen, is t een en al bonte kraaien. Doar is de zwarte kraai ien e minderheid, of sums liekt er zulfs huulmoal òfwezeg. Hij is al net zo tam as de zwarte neef hier. Och, nou vlugt der toch krekt vot ...

over t wotter aan de oever van de Warta bij Poznan. 

donderdag 24 mei 2018

Soamenwaarken


Wat bennen de succesfactoren van soamenwaarkeng? Misschien is dat veur elk mins en veur elke organisoatsie weer aans, mor de praktiek is dat niet elke elke soamenwaarkeng leidt tot n groder risseltoat as de som van lösse delen. Ganzen zien je het soamenwaarken geregeld preberen en toch bliekt de uutkomst voak niet ien overeenstemmeng met de belofte.
 

Dit drietal bestijt uut twee wiefkes en n gent. Ze hemmen op twee dikke nusten vol eier broed, vlak noast nkander. n Gaans ken wel vieftien, twinteg eier leggen. Noa vierenhaalf week broeden bennen der mor twee eier uutkommen en doar zien we dan de twee gele ganzepielen.
 

De ervoareng zeit me dat ganzen-soamenwaarkeng altied wel gezelleg is, mor dat et de uutkomst niet ten goede komt. Reden ken ok wezen dat ganzen voak n groder nust aan eier hemmen as dat ze waarm holden kennen. Zo leggen der sums twee loagen an eier ien t nust. En zo as dat wel voaker gijt ien t leven, warmte en aandacht verdelen over teveul zoaken, doar komt weineg goeds van. Focussen noemt men dat vandoag de dag. Mor genog doarover. Wel wiet hemmen de twee ganzepielen met drie woakzoame olden meer kaans op groot worden.