Goeie grappen kosten geld

afbeelding Pixabay

Laatst is er een column in Meandermagazine gepubliceerd over poëzie en zelfverwijzing (zelfreferentie).

Voor de volledige column zie: Column Meandermagazine. 

Dizkeer gijt et minder over t Grunnegs ien t bizunder. Mor der zollen toch grappen wezen moeten ien te Grunnegs met zulfverwiezeng? k Ben op zoek noar moppen ien t Grunnegs met zelfreferentie. Wel het een idee of n tip ? 
 

An t Hoerediep

Tussen twee boomstammen deur zicht op Gruupskerk vlakbij t Hoerediepke. Veul noatuur let heur niet kennen. 

 

Behalve hokkelengen, bennen hier sums loater ien t joar wat vissers te angeln. Mor vedders, wel zol hier kommen.   

Zo allenneg aan t wotter het wel wat.

Der is n nije term uutvonden: Basis Kwaliteit Natuur (BKN). Sums is t wel even zuchten met al die verscheidene termen en definities van noatuur. 

Lest heurde k een zeggen dat der twee soorten noatuurfilms bennen. Zeg mor veur acht uur soavends en noa elf uur soavends. 

Wotterpiekje met crea nust

Woarom zol n wotterpiekje heur nust altied verstopt moeten ien e rijten? Dit wotterpiekje het et aans bekeken en met n eigen iensteek n crea nust moakt. n Nust baauwen op n olle boomstronk wel 30 cm boven t wotter uut. 

Dat doen niet veul wotterpiekjes dit spantje noa. t Nust met n ronde kom en hoge wanden is riek aankled. En de eier maggen der ok wezen. En toch, t het ok zien noadelen, zo hoog en dreug.

Zo lopt t nust beheurlek ien t zicht. Kennelek hemmen aander dieren t nust ok ien e goaten kregen. 

De vogels van dit nust hemmen t olle ambacht van degeleke nusten oppakt - zunder fratsen met takken en boomstronken. Gewoon n nust, krekt as pabbe en moeke en grootolders t ok deden. Tussen rijten en snielengs. En nou de bloadern langer worden, kennen vogels de toppen over t nust hen vlechten. Zo krigt t nust n aanzicht van n wiegje, as je der dichtbij bennen. Op òfstaand valt der niet zo veul te zien. Joa, krekt de stat van de hen met heur witte strepen. 

Zo gijt et voak. Beste uutvoereng van nusten krieg-je noeit te zien en onttrekken heur aan t oog van mins en cameroa. 

 

Optreden ien Roon - 7 juni ien de Scheepstraschool

We goan op vizide ien Drent. Op zundag 7 juni smirregs ien de Treftuun van de Scheepstraschoel ien Roon (Roden).

Dag: 7 juni 2026

Aanvang: 15.00 uur. 

Welkom. 

 

Zwadde roodstat met jongen

Doar zitten ze dan. Zwadde roodstat / zwadde roodsteert het n tied lang stil zeten. Mor die tied is over. Nou is t hinneweer vliegen. n Poar foto's van onze fotogroaf uut Roemenië.

Jongen zitten mooi dreug. Ien n holte boven n post van n binnendeur. Vogels vliegen deur n kepot roam van t onbewoonde huus ien en uut. Dus eigenlieks toch n bewoond huus, veur zo lang as t duurt. Tied van uutvliegen hangt ien e lucht. 

   

Transylvoanië - contreien met grode vestingwaarken

Dizze foto is nommen vanòf toren van n hoog kasteel. We bennen ien Deva n stad ien Transylvoanië ien Roemenië. 

 

Dwoalend deur dizze baauwwaarken docht ik "Dat is even wat aans as n Muiderslotje". Ien e zeuventiende iw har je de dichter Hooft met geest- en dichtverwanten die bij zummerdag soavends wat gedichten zatten veur te droagen. En dat ien ale rust zunder oorlogsgeweld. 

Et bennen contreien woar Roemenen en Hongoaren wonen. Op dit bret stijt Roemeens en Hongoars. Ien landstreek Transylvoanië ien Roemenië woont een grode minderheidsgroep aan Hongoaren. Heur toal is huul aans as t Roemeens dat verwant is aan Italioans en n Romoanse toal is. Hongoars het overeenkomsten met t Fins - veur ons ok stoer te verstoan. 

Roemeense steden hemmen grode vestengwaarken met verdedigengsmuren van wel 10-12 meter hoog en 3 m dik. Iendrukwekkend. Hongoaren en Roemenen tegen Turkse legers. Der bennen huul wat belegerengen en oorlogen west deur de iwen hen. 

Ik wiet niet of je wel ns ien Bourtange west hemmen. Of ien t stadje Naarden. Vergeleken met dizzes dikke muren bennen Nederlaandse baauwwaarken mor krummels. 

Dan bennen der mor weineg veldsloagen ien Nederlaand west. 

Dit is ien de stad Alba Iulia ien Transylvoanië. Doar hemmen ze oeit Roemeense keunenk kroond noa de Eerste Wereldoorlog. 

Nust bouwen - moatwaark bij plasdras

Zo veul vogels, zo veul nusten. Niet allenneg tussen soorten, veural binnen soort. Dizze kluut het t nust ien n pol russen.

Dizze kluut het n kunstmoatege ophogeng bedocht. Stukjes mis, stro, en opdreugde stront geft n eenvörmeg geheel. 

t Leste spantje het wat stro en dooie grasspieren vonden. Zo het elk zien eigen aanpak. 

t Wotter blift altied dichtbij. As beschermeng en sums as bedreigeng as der veul regen valt. t Ken verkeren.

Plasdras geft plak aan kiewieten, grutto's, tureluurs. Der is voedsel en onderkommen veur weidevogels, kluten ok mor even metrekend. 
 

 

Elkaar verstaan - Programma met poëzie en muziek - 23 mei Zuidhorn

In het kader van Feest van de Geest is het programma Elkaar Verstaan met poëzie en muziek op zaterdagmiddag op 23 mei in de Gastkerk Zuidhorn. Adres: de Gast 58a Zuidhorn. 

Van 15.00-16.30 uur. 

Entree: gratis.  

Meer informatie Feest van de Geest Zuidhorn

Het poëzie deel uit voordrachten van allerlei gedichten, met en zonder rijm, vrij vers, modern en nieuwe en oudere gedichten. Daarnaast draagt Willem Tjebbe Oostenbrink voor uit eigen werk (Gronings en Nederlandstalig).

De muziek wordt verzorgd onder leiding van Klaas Jan van der Veen. 

Poëziedeel bestijt uut veurdrachten van allerhande poëzie, ien klassieke dichtvörm en vrij vers, olle en nije gedichten.  Willem Tjebbe zel veurdroagen uut eigen waark (Nederlaandstoaleg en Grunnegs). 

Kunstenaar anne wine heeft in de Gastkerk een installatie gemaakt met het onderwerp Mededogen. 

Overal liggen verspreid opgestapelde boeken. Niet van papier en volgeschreven. Deze boeken zijn gebreid met regels even lang als de gebreide bladzijden. Regel aan regel van boven tot aan de onderste rand - zelf in te vullen. 

Info over Kunstenaar anne wine 

Zwadde Roodsteert / Roodstat

Dit nust is van n Zwadde Roodsteert of Zwadde Roodstat. Nederlands Zwarte Roodstaart; Letien: Phoenicurus ochruros. Ien t Engels hemmen ze t over Redstart. 

Nou ken-je denken: Welke noam is t nou? Dat vroag ik mij ok òf. Mor ien t Grunnegs bennen der meer woorden veur t Nederlaandse woord "staart". t Ken 'steert' wezen en ok 'stat'. Vroeger stonden koeien op stal vastbonden. Mien opa hielp dan met t stat wassen. Dat gebeurde voak op moandagmörgen. Dan was t stat wassen weer veur n moand doan.  

Terug noar t nust. t Nustje zit eiglieks altied op n muur, op n rand onder dak, of op n plankje doar t hule nust steun het. Sums ok n verloaten huus, doar de vogel deur n roam noar binnen vliegen ken, gliek ien dit geval. Dit nust he'k n week terug ien Roemenië vonden. En joaren terug he'k t nust van de Roodstat ien Wit-Ruslaand vonden, dat vogels zitten overal.

Foto: nl.Wikipedia; Gunther Hasler  

Hoe zigt et vogeltje der uut? Nou veural zwart en gries. En met n rooie steert. Dizze mooie foto is moakt deur Gunther Hasler. 

Eikes bennen zo groot as n musse-ei, mor dan zunder stippen en vlekken. Iengoal glanzend wit.

 

Plattdüütsk Mitmak-Book uut Ostfriesland

Mitmak betekent Metdoe-boek. Op de plattduutse oavend ien Emden was ok aandacht veur kienderboeken. Schriefster Ostfriesin Johanne kreeg doarveur n bizundere pries van Johann Friedrich Dirks ien Stad Emden. Ze schrift, tekent boeken veur kienderboeken. 

Dan het ze ok nog bizundere koarten. n Veurbeeld hieronder. 

Dizze trof me wel, want harrejasses har k aal lange tied niet heurd, loat stoan lezen. 

Meer ienformoatie Ostfriesin Johanne von Aschwege

 

n Bizunder verhoal uut Kommerziel

 

Doe kenst dij òfvroagen of de òfbeeldeng wel recht stijt - ik doe dat wel. Mor t valt nog niet toe om dat goed te bepoalen. We kieken hier noar n kleine begroafploats zunder kerk ien t dörp. t Veldje leit op e raand van d'olle schaans die old dienst doan het ien de Spoanse oorlog en doarnoa niet meer neudeg was. 

Dat der mocht n begroafploats anleit worden. Nou leit dizze begroafploats leit zowat midden ien t dörp, van olle Gruupskerker deel. Vroeger was Kommerziel verdeeld over de olle gemeenten Gruupskerk en Ollehoof - t Kommerzielster diep was de scheideng. 

n Kerk was der niet ien 16de, 17de en 18 de iw, dat minsen mossen begroaven worden ien kerkdörpen van Gruupskerk, Nijhoof, Ollehoof en Nijziel. Dat ging over wotter en loater warschienlek voaker over smalle kerkepadden. Tot dat Kommerziel ien 1840 n verzoek richtte tot de Pervincioale Stoaten. Of ze heur overledenen dichterbij en wel op d'olle wal van de Schaans begroaven mochten.

t Is uutzunderlek dat Provincioale Stoaten dat besluut nommen het. t Dörp har gien kerk. Loater is der protestantse, grifformeerde kerk baauwd. 

k Ben voak deur Kommerziel reden, mor dizze geschiedenis wis k niks van. Nog gien vief, zes kilometer van mien woonplak. Der bennen altied nije dingen te ontdekken, ok dichtbij huus. 

Knoflookpad - Drentse poëzie ien Schaangedennen

t Was n belangrieke dag guster, doar ien Schaangedennen, even boven Valthe bie Emmen. De twee heren gedipputeerde Emmens en wetholder van Börger-Oring (Borger-Odoorn) hemmen n bret met ienformoatie onthuld ien t noatuurgebied Schaangedennen. t Is leefgebied van de zeldzoame knoflookpad.  

Dichter Gerrit Boer het over de knoflookpad n gedicht ien t Drents schreven. De stille liefde van een knoflookpad (klok klok). t Is mooi worden. 

t Gebied is ienricht ien opdracht van Pervincie Drenthe en uutvoerd deur Prolander, en vedders warren der n hule trits organisoaties die met doan hemmen. Huus van de Taol te Beilen het zörgd veur n dichter om n mooi gedicht òf te levern. Zo het Drenthe weer n Drents gedicht ien e publieke ruumte derbij.  

Der valt veul te zeggen over t amfibiebeestje, ienrichting, de noatuur, de dikke balflinten en zuks wat meer. Kiek doarveur mor vedder op internet. 

 

Grauwe gaanzenust

Dit nust is van e graauwe gaans. De gaans is even vot. 

Vief eier wachten op uutkomst, mor dan moet moeke nog wel even zitten. Eier wachten wel. Zun schient warm, rijten hollen kolle wiend vot. 

 

Platt-Düütske oavend ien Emden met literatuur en muziek

Sabine Santjer. Foto: Jens Doden

Der Johann Friedrich Dirks 2026 pries veur platduutse literatuur en muziek is weer uutriekt. Ien Emden ien t "Festspielhaus am Wall" werden de winners bekend moakt van de wedstried met t motto „So sünnerbaar mien Harte sleit“ - ofwel: Zo bizunder hoe mien haart slagt".

Muziek wer verzörgd deur de winneres Sabine Santjer (foto: Jens Doden). Webstek Sabine

Priesgeld wer opbrocht deur n ienternationoal bedrief Dirks Group uut Emden. t Ís bizunder hoe n groot bedrief hum ienzet veur regionoale zoaken. Banken en bedrieven ien Nederland die ienternationoal opereren t oog meer richt op landeleke sportteams, mor regionoal en lokoal heuren je die weineg.

Opperburgemeester Tim Kruithoff van Stad Emden sprak ok mooi plattduuts. 

Tweede Leven - Gedicht over Metamorfose - Are Meijer

Are Meijer, dicht ien t Westerkertiers, het de tweede plak kregen bij de wedstried Metamorfose van de Bibliothekennetwerk Westerkwartier. t Gedicht TWEEDE LEVEN het n mooie ontwikkeleng en is prachteg uutwaarkt met t themoa Metamorfose. 

Der bennen veul dichtwedstrieden holden over Metamorfose, mor der bennen niet zo veul gedichten woarien de verandereng zo toepasselk is. De metamorfose van de persoon wordt kracht bij zet deur de nije generoatie.  Hartstikke mooi doan.