Nije broedvogels ien aantocht

Der bennen tegenwoordeg aal meer boeren met plas-dras laand. Zet n half bunder akkers onder wotter en de weidevogels hemmen meer voedsel veur de jongen, as eier uutkommen. Mor behalve de gangboare vogels kommen ok nijen der op òf.

Doar vond ik t nust van n kluut. Joaren terug mos je noar de kwelders ien t Waddengebied. Nou bennen ze dichter bij huus te vienden.

Even loater vond k wat aans. Vier kleine eikes ien n nustje met wat kruden der om toe. n Nust van e Kleine Plevier! Met zien snelle trippelpootjes en schichteg vliegen is der zo uut t zicht.

 

n Bizundere vondst, die k nog noeit eerder har. k Ken niet aans zeggen, dat dee me wat. Even was k weer dat lutje jonkje dat ien zien eerste joaren n nust vond, van gruto of kiewiet, en doar dan n half uur noar kieken kon.
Wat me opviel bij zoeken op internet: wikipedia is n algemene digitoale encyclopedie, doar van alles op te vienden is. Mor as je noar òfbeeldengen van eier en nusten zoeken, dan liekt et wel as of wikipedia nog veul te doen het. Gien eier of nusten van petries, kleine plevier, zulfs gien tureluur! Of zol et censuur wezen om mor weineg nusten en eier-òfbeeldengen zien te loaten? Ik ben verboasd over zo weineg ienformoatsie op zuks serieuse website. 

Gras

Bij bloemen denken je voak an rood, geel, blaauw, peers, en zuks wat meer. Toch bennen der veul bloemen die alleneg mor n brunege glans hemmen; of groeneg, beige, sums wat peersachteg. 

Luchten worden aans as je deur de grassprieten omhoog kieken.  

Gras veraandert as je et tegen de lucht holden.

Voak gijt et gevoel ok met.

Nije noatuur

Der is veul goande ien n noatuur vandoag de dag. Leste joaren het de overtugeng woddel schoten dat noatuur deur de mins vörmd wordt. Oostvoardersplassen moet misschien aanpast worden. t Minsbeeld wat we van onszulf hemmen, komt niet overeen met beelden die dizze noatuur oplevern. We willen gien scharminkels en publiek knekelhuus ien en op ons groen. Hoe komt t eiglieks dat de wolf hier nog gien toegang vonden het? Hier ken de wolf zien plak vienden, mor misschien bennen de hekken aan de hoge kaant.

Kortleden he'k ien n rustgevende pervincie n bizunder perceel aantrovven. Zoveul rust en zoveul suggestie as doar van uut gijt. t Schut toe de grond uut. En dan die weerkoatseng van t licht ien t wotter. Dudelek is: refleksie is bevördelek veur d'ienspiroatsie.

Gedicht dat ien kraant stoan het

Ien meert het de Drentsche versie van t gedicht Broers/Breurs ien t Dagblad stoan. Per vergisseng ston schreven dat et van Ria Westerhuis was - zij har de vertoaleng verzörgd. t Dagblad het loater n korreksie òfdrukt.

n Tiedje terug ston ien t streektoalhörntje van t Dagblad 'Schepers Erf' t tweede gedicht met de titel Voader en Zeuns. Dit keer ien t Westerkertiers.