Pieken ien e heeg

Veul is niet meer wat et was. Ien e noazummer kwammen pieken op n idee. Overnachten, niet meer op stok, mor ien e heeg.

 

Piekehokje voldeed kennelek niet meer. t Is wel wat n geheister om ien e heeg t kommen, mor met n opstapke (eiglieks n opvliegerke) van t schommelspeultoestel wieten ze vanòf een meter hoogte de heeg ien te vliegen. Dan is et wat bereddern, mor ze vienden elke oavend weer n geschikt plakje.

Doar zitten ze dan. Ze vienden et n genot. Nog even dag zeggen veur t sloapen goan en dan rust.

t Is noatuurlek wel koller worden leste week, dat ik wiet niet hoe lang ze dit volholden.
 

Allersmoabörg

Doar stonnen je dan ien de mooie, mor schroale noajoarszun - mor nog veur de natte - oog ien oog met de Allersmoabörg.

n Klein börgje ien t Noordelek Westerkertier. n Poar kilometer ten noorden van IJzing (Ezinge) tegen t Reitdiep aan. 

Achter de diek leit n grode meander van t diep. n Gat ien e diek geft n deurkiek op t baauwlaand.

En doar weer achter, doar ken, je as je goed kieken, t wotter van t Reitdiep zien. 
 

Lutke Soaksum en siepels

Lutke Soaksum is n gehucht ien e buurt van Winsum.

 Met t mooie weer wer der nog volop oogst. Siepels geven hoogte van wierde aan. 

Grotegaste - Grootegast - Grodegast

k Was op vizide ien Oost-Vrieslaand (Ostfreesland).

Toen zag k n bret: Grotegaste: 1 km.

Grotegaste leit ien gemeente West-Overledingen. Dat leit an e oostkaant van de Ems, boven Poapenburg en onder Leer. Overledingen wil zeggen: Over t rivierke de Leda, ien dit geval aan e zuudkaant van de Leda.

Ien t centrum, n kerk op n waarft - wierde. 

Bij ons leit Grodegast - Grootegast ien e buurt. Bij ons leit ok n Lutjegast. Wat wil nou t geval?

Ien Oost-Vrieslaand leit ok n Lütjegaste. Mor der was gien bret te vienden. Dus stapte ik uut de auto en vroeg aan n oldere vraauw die krekt uut t huus kwam, of ze van Lütjegaste heurd har. En ja heur, ze wis woar of dat plak lag. t Was n klein gehucht. 

Ze pakte heur mobiel en sprak ien: Leut-je-gas-te. Der kwam wat weerom, mor ze kon et mij niet goed duden. Met heur wiesvinger tekende ze op mien jas, ter hoogte van mien borst, een denkbeeldege koart met de route. Zuks wat is me nog noeit overkommen, mor ien Oostfreesland ken dat aalmoal, docht ik.

Heur aanwiezengs he'k volgd, twee moal links, over t spoor en toen kwam k niet vedder.  

Met aander woorden, n aander moal krigt de zoektocht noar Lütjegaste doar ien Duutslaand n vervolg.

ILFU - 1000 Gedichten - met gedichten uut t Westerkertier

 

t  Westerkertier was der bij zotterdag 30 september ien Stad bij Boekhandel Riemer aan de Ebbingestroat.

 

Veul dichters met veul bezoekers. Hierboven Are Meijer (Gruupskerk/Amsterdam). 

Anneke Wasscher (Leek) (foto Anneke Wassscher). 

Veurdracht Willem Tjebbe Oostenbrink met gedichten: Over bruggen en Glas.