Blaauwe overal

Joaren leden he'k gedicht schreven over mien pabbe. t Ging over de boerderij, de koeien, over ons. 

Òflopen week is er overleden, uut tied kommen.

Hendrik (Henk) Oostenbrink * 13-11-1933     + 13-12-2023                      

 t Gedicht was feitlieks ok wel bedoeld veur mien pabbe. Hij von t mooi. En doar was k slim bliede met. 

Uut de boom rugeld

De störmen ien november bleken krekt wat te veul te wezen veur de reigernusten. 

Ien meert rugelden de eier van de nusten omdel. Toen was der ok harde wiend, sums störm. Misschien dat de nusten toen nog niet zo groot en staark warren. Reigers blieven n tied lang deurbaauwen an heur nusten. 

Mor leste moand kwammen hule nusten omdel ien t Johan Smitpark (Zuudhörn). Verloaten deur de eigenoaren, zeg mor de reigernoaren, worden ze niet meer onderholden. En dat wat gien onderhold krigt, lopt van je weg. 

De lutje zwarte vlekken hoog ien e noaldbomen blieken op e grond grode baauwsels met deursnee meer as n meter. As t weer wat zunneg wordt, begunnen vogels over n moand of twee aal weer met nusten baauwen. 

 

Lucht ien rep en roer op de Povvert

t Huft mor n poar doagen te vriezen en wereld is aans. Ok bij de Povvert (NL: De Poffert, een van de mooister Hoe weineg der ok veraanderd is. 

 

Wereld is zo aans en nog altied geliek. Gaanzen moaken heur op veur de grode vlucht. 

Ze blieven hier bij winterdag aalsmor meer hangen. Mor dit weer wordt heur te gorteg.   

Zo nou en dan denk k nog aan de gaanzen die ik vroeger zag. Zo benoaderboar as gaanzen nou bennen, dat is niet te vergelieken met joaren zeuventeg, tachteg. 

k Wiet dat ik n keer bij ienvallend winterweer ien e verte n koppel ganzen zag delstrieken. k Wol de gaanzen van dichtbij zien en liep t laand ien. Echt noadern belukte niet. Ze warren nog minstens 150-200 m vot, of doar vlogen ze aal weer op. t Was onbegonnen waark om dichterbij te kommen. 

Tot dat k een keer n gaans zag die niet vliegen kon. t Beestje har n gebroken vleugel. k Heb hum vongen en met noar huus nommen. 

Zo as doar loater ok n knobbelzwoan bij kwam. Die kon ok niet meer vliegen.