Knien en Knieneploats

Dit beestje is aal joaren old. t Wordt over n poar joar viefteg joar. k Zat ien eerste of tweede klas van middelboare schoel. Wel n schier knientje, docht ik zo.

Kortleden stopte ik met de auto n keer juust op dit plak. Doar stond de noam Knieneploats. Al joaren rie k hier zo nou en dan del. 

Noeit eerder van heurd, noeit eerder lezen. 

Zoveul nije dingen gebeuren joe onder de neus, mor of je t altied metkriegen? Zoveul olde dingen blieven lang onontdekt, onder de neus. Doar ken k mij over verboazen blieven. Ok wel weer mooi. 

Misschien is t ok wel verwondern.

 

 

Nijezijl Nijesyl en Nijziel

 Noamen van plakken ien Vrieslaand en Grunnengen lieken sums veul op nkander.

 

Dit plak hiet ien t Vries Nijesyl. Ien t Nederlaands Nijezijl. Woarom ze dat eerste deel niet om zet hemmen, wiet ik niet. Nijesyl leit bij IJlst (Vr: Drylst) aan e zuudoost kaant van Sneek (Snits).

Ien t Westerkertier leit tussen Gruupskerk en Noordhörn t plak Nijziel (Nederlaands Niezijl). Tsja, doar konnen ze ok wel twee varianten schrieven.

Putter

Dit vogeltje zie k zou nou en dan. Leste keer ien n museum ien Proag. Nationoal museum met n grode òfdelengs veur mineroalen, meteorieten enz. Bij de dierenòfdeleng warren veul vogels. Ok dizze putter. n Aandere noam is distelvink.

n Moand leden zag k op n wandeleng n bizunder nust ien n sleedoorn. t Was dudelek van n vink. Mor welke. Noavroag leverde de putter op (Letien: Carduelis carduelis; Duuts: Stieglitz; Engels: Goldfinch)

 

t Nust zigt der bizunder uut: steveg van bouw, n dikke raand van wol en mos. Vervlechten van t materioal wiest op vakvraauwschap, want t wiefke baauwt t nustje.

Ien t nust laggen doppen, kepotte eikes. t Het niet wezen magd, met dit nust. Der bennen zoveul zoaken die met speulen. Min weer, te hiet weer. Roofvogels, aandere dieren die t op eikes munt hemmen.

t Is altied weer òfwachten. En gien mins die t wiet woarom d'eikes van t ene nust aal en van t aandere nust niet.

Vierhuzen optreden van dichters en verhoalenvertellers - 12 augustus

Zotterdag rondom kerk van Vierhuzen optredens van verhoalenvertellers en dichters. t Program is n mengsel van reisverhoalen, Grunneger sprookjes, Grunneger verhoalen en poëzie.

Veurdrachten van: Henk Weltevreden, Ingeborg Nienhuis, Fré Schreiber, Willem Tjebbe Oostenbrink.

 

Op e raand van t dörp Vierhuzen stijt aal joarenlang n spoorbiels met t gedicht Opgoan. 

Tied om dat gedicht veur te droagen.