Overlevers van veureg joar ien bloei.

Met zukse zachte winters bennen summege bloemen slim vroeg. De natte overleefd, hemmen ze nou n veursprong op e nije generoatsie dat uut t zoad kommen moet.

Goldjeblommen hemmen heur deur de plassen ien e tuun hinsloagen.

Gien last had van nachtvorsten en niet verzopen. Venkel stijt der mooi bij. Misschien is t gaauwachteg tied om te oogsten, want knoppen kommen der aal ien. Venkelsoep smoakt best. 

Eende-eier

Tegenwoordeg broeden eenden ok vroeger as joaren terug. D'eerste kiewietseier worden wel n week eerder vonden as darteg joar leden. Nou von k n week leden n mooi nust met de eier zo toedekt, dat je zo niet zien konden.

t Blift altied n toer ze te vienden. Zien je n nust - of denkstoe dat doar n nust zit - dan zelstoe ok bukken moeten om te zien of der eier ien leggen.
Mor t aantal lege eendennusten is volgens mij minstens zo groot as veur joaren terug. Woar dat an leit, wiet ik niet krekt. Der wordt niet of naauwlieks eier meer zocht. Deur minsen dan. Dit nust hierboven was mien tweede volle nust, noa zo'n 15 lege nusten op mien rondje onder Zuudhörn, allenneg ien dit seizoen, enne meert tot en met half april. Doar wer k aal wat treureg van.

Der bennen kennelek veul liefhebbers. Dat bliekt wel uut t aantal lege doppen da'k vonden heb.

De tandjes van de marter (of meert, de bunzing) stoan òfdrukt ien e dop. Kraaien pakken t aans aan.

De kraaiesnoavel wordt as n breekiezer ien t ei zet. En dan van t eigeel lekker dikkedakken.

Boompatronen

Dit veujoar het veul weg van verleden joar. Strakke blaauwe luchten, lange scharen (schaduw) van bomen op t laand.

Dizze olle ekkelbomen harren heur dag. Soamen tekenen op t gras. Dat overkomt heur niet elk veujoar zo.

En de lucht zo onverdroaglek blaauw. n Schroale wiend blast ons gaauwachteg t huus ien.

Interview ien Meander Magazine - met Grunneger gedichten

"Poëzie schrijven betekent voor mij betekenis geven, dan wel een zoektocht naar zingeving.”

Interview in Meander Magazine Meander Magazine interview Willem Tjebbe Oostenbrink. Met drie gedichten in het Nederlands en het Gronings.

"Poëzie schrieven betekent veur mij betekenis geven, of wel n zoektocht noar zingeveng." Dizze week in Meander Magazine - digitoal poëzieblad - een vroaggesprek met mij. En der stoan drie gedichten ien t interview òfdrukt (ien t Nederlaands en ien t Westerkertiers (West-Grunnegs).

t Is n mooi interview worden. Met dank aan redacteur Alja Spaan. Veur t interview kiek: Meander Magazine interview Willem Tjebbe Oostenbrink.

Moeke-tröts

t Is mooi weer nou, echt veujoarsweer. t Het vannacht wat regend en planten schieten nou omhoog. Schoapen en lammer willen noar buten.

   

Moeke wil heur tröts tonen an e wereld. 

Weersberichten proaten altied over veujoarsweer zo gaauw de zun schient. Ok aal hemmen we meer as n week vorst had, de weermannen proaten opgewekt van prachteg veujoarsweer. Dat slagt ien wezen naargens op. Feitlieks wieten ze ok wel beder. Mor joa, tillevisiekiekers willen goed nijs heuren en niet dat gejerimieer over dreugte, natte en zuks wat meer.

Noa zoveul nachtvorsten kleurden de landen bruneg. n Zweem van rood-bruun schiemerde deur t groen de leste week. Harren je dit weer ien januwoari had, dan zollen we aalmoal op e scheuvels stoan hemmen. 

n Schroale wiend het t noorden dreug waaid. Klei an e bovenkaant is al weer zo hard.

Kiewieten perberen eier waarm te holden.

 

Domt stoan eier weer op uutkommen.