Oranje klaprozen

De kleuren van klaprozen bennen hallucinerend. Zo glen oranje. k Ken der minutenlang noar stoaren.

Hoe langer je kieken hoe groder de wereld wordt.

De hommels zoemen rond, schudden alle meeldroaden deur nkander.

Kleine plevier op uutkommen

Dizze pleviereier hemmen lang genog leit. Moeke-plevier het genog waarmte geven. Nou stoan d'eier op uutkommen. t Eerste piekje perbeert uut ale macht om e dop te breken.

Met grode krachtsienspanneng wordt n deurbroak moakt. Piekjes moeten breken om eerste stappen ien t leven te zetten.

De tiedelekheid van n ei zit an e butenkaant. Domt nemt t leven n vlucht.

Scheuren en barsten

De dreugte holdt mor aan. Doar veraandert een bui of n dag lang regen niet drekst wat an. Grond is zo hard. Ien aal zien ongeregelde scheuren toont de grond toch weer een verboazengwekkende regelmoat. Woar hum dat nou ien zit, is mij n roadsel. Wonderlek.

Grond met scheuren en barsten liekt wel orgoanweefsel. De dreugte ken-je ok aan je lief vernemmen. t Vel het te lieden van de schroale noordewiend en onverbiddeleke zun.

Handen en voeten hemmen t meest te lieden. Zo lopen we der over en droagen we et ien ons vel met ons met.

De Riet - Wotterpoëzie III. Gedicht over vissen - filmke.

Vissen is n bizundere bezigheid. Der bennen minsen die hemmen der niks met. Mor veul dingen moe-je voaker doen om ze deurleefd te hemmen. Deur doen, komt begrip. Da's nog weer wat aans as et ok warderen kennen.

Vroeger as schoeljongen was k veul bij t wotter te vienden. Der bennen ok joaren west, da'k niet wis woar mien angels opburgen warren. t Vissen was n vergeten tiedverdrief. Doar gijt dit gedicht over.

Vissen ken rustgevend waarken. Kiek ns noar de dobber die opndel gijt. Hoe golven de dobber optillen en weer lösloaten. Ien t filmke gijt et krekt zo. En dan de weerkoatseng van de bomen ien t wotter. Ales het zien eigen licht. Elke golf geft n aandere weerspiegeleng, elke reflectie zien eigen gedachte.

Jonge swaalfkes ien t nust

Ze bennen nog mor krekt ankommen, of ze baauwen alweer heur olle nusten op en baauwen an nije nusten. Doarnoa begunt de tied van t eier leggen. Wit-romeg, met roodbrune spikkels.

Nou stoan de eier op uutkommen. Een eike is al ien tweeën sprongen, t jong krupt der uut. D'eerste warren der al op vittien/fieftien mei. Da's op e tied!

Poelepetoaters

Lest zag k onderweegs n poar dikke voale hoenders. Poelepetoaters - op zien Nederlaands: parelhoenders. Oorspronkelek kommen ze uut Oafrikoa. Noar k heurd heb, komt de noam poelepetoater van t franse woord poule peinte, ofwel 'gekleurde piek' (hounder of zien Hogelaandsters of tuut ien Oost-Grunnegen en Drenthe.

Je hemmen ze ien twee kleursloagen: zwart/anthraciet e voal-witteg. Bij de donkere kleurslag kommen de widde parelstippen mooi uut. Dizze witte poelepetoaters liepen van t hiem òf, wollen wat strunen deur de boskes.

Toen vloog een vot. t Zigt der op de foto wat vremd uut, mor toch wel n mooi ploatje vond k. Zuks wat zigt t blote oog eiglieks niet. Even loater liep t spantje op e weg. Gezelleg soavends even stappen.

Zulf he'k ok van dizze hoenders had. Bij ons ien e buurt was n boer woar k zummers de bieten aan t haauwken was, die zee dat de hoan en de hen van de poelepetoater n eigen roep hemmen. De een zeit tsjek-tsjek-tsjek en d'aander tebak-tebak-tebak. Om et makkelek te ontholden met aansluteng op e rokerswereld: shag-shag-shag en tabak-tabak-tabak.
Welke poelepetoater - hoan en hen - nou percies wat zeit of roept, da's even de vroag. As ze t op de zenen hemmen, of ze willen heur aans heuren loaten, moaken ze n hels keboal en overstemmen alles ien e wiede omtrek. Doar kennen gewone pieken en zulfs n paauwhoan niet tegen op.

Dikschieterliere bie Noordpolderziel

Lest ben k noar t wad west. Noordpolderziel mooi weer, kolde wiend, eerste wolken noa zo wat n week of vier.

De foto geft de vogeltjes wat armetiereg weer. t Is niet aans. As je te dicht bij kommen, bennen ze vot.

Dikschieteliere is t Grunneger woord veur tapuit (Letien: Oenanthe oenanthe; as of 1 x niet genog is). De noam het te moaken met klanknoabootsen.

Vlugt er vot, dan zien je zien veural de widde stuit. Wat aans wit, lag vedderop.

Dit lam op e diek leek dood. Dus ik op t beest òf om te kieken wat der loos was. Lag er doar wat te sloapen. Ik docht: Wel holdt nou wel veur de gek?

k Kon et niet loaten, k mos hum even vastpakken. Dan moe-je mor beder oppassen.

Regenbogen

Je hemmen regenboog en regenbogen, mor dizzent harren bizunder veul kleur.

Zo fel ien t oavendlicht bij Diepswal an t Hoendiep, tussen Briltil en Eemtil. Kiekrichteng is vanòf t Foan noar Den Hörn.

t Licht was zo fel. Regenboog zag je zulfs tegen t groen van t laand.

Swaalfkes hemmen eikes

Boven ien e peerdestal het dit swaalfke zien nust moakt. Meimoand is nog mor krekt begonnen, of t nustje is al vol.

Met n voereng van veren en hooisprietjes, is et doar zacht leggen. Widde veren van zwoanen, swartstreepte-widde veerkes bennen van eenden. Zo helpen vogels nkander. Ok al het niet elkneen dat deur. 

Op 2 mei leggen ien dit nustje al vijf eikes. Broeden is begonnen. Dat worden vroege jongen!