t Enne van oktober is ien zicht en alles blift mor groeien mor veural ok bloeien. Ja, k wiet der bennen mooier bloemen, dahlias en zuks wat meer, mor k wol de aandacht vroagen veur wat kleiner bloemkes.
Doar bennen goldjebloemen ien volle pracht en dat op e verjoardag van mien moeke (✝ 2014).
An e weg tiert t gras en kruden. En t gras bloeit ok. Krekt as riddersporen (zuring).
n Nij gedicht het de ruumte vonden. An e sluzen bij Dokkumer Nije Zielen is n gedicht op n TOP-zuil ploatst. TOP betekent Toeristisch Overstap Punt. t Gedicht stijt op n mooi plak met n bankje derbij om even te zitten, uut t puusten of gewoon wat rond te kieken.
Rekreoatsieschap ien Vrieslaand het zoaken örganiseerd ien soamenwaarkeng met partners van t projekt veur toerisme en recreatie Rondje Lauwersmeer. Meer ienformoatsie is te lezen op: Marrekrite - Fryslân.
Wat niet vermeld stijt: der bennen twee versies van t gedicht ploatst: n Vriese en Nederlaandse versie. Ik heb t gedicht schreven ien t Westerkertiers. Jeltsje de Jong het de oorspronkeleke tekst omzet noar t Vries/oerset nei it Frysk: Dokkumer Nije Silen. t Is mooi worden.
Lest was n ik ien Noord-Holland. n Vriend wol mij zien loaten wat veur mooi gebied et was. t Was mooi weer, zun scheen al leeg. Toen kwammen we bij deze schutten. Der zatten gatten ien om deur hin te kieken.
As je veul berichten over de oorlog ien Oekraine lezen hemmen, zol je dit aans interpreteren kennen. Mor dit is een noatuurgebied ien Nederland.
Wat mij te binnenschoot: met zukse grode obstoakels valt et nog niet toe om de baand te verstaarken tussen mins en zien leefomgeveng. As je om e schutten toe lopen, is der n mooi uutzicht over t wotter. Doar word je dan stil van, krekt as d'omgeveng.
Dit gebied leit vlak bij d'olde diek
langs de Iesselmeer. Oeit is de diek deurbroken en deur staarke stromeng bennen diepe kolken ontstoan. Nou is het noatuurgebied en met de diek onderdeel van Natura2000.
De Lauwersmeer is kleiner worden. Dat wil zeggen, as je op de nije Uutkiektoren stoan, ken je zo wat ien een blik de halve Lauwersmeer overzien. Toren stijt ien Kollumeroord.
De toren is een van de grode moatregeln die nommen bennen ien t koader van Rondje Lauwersmeer Rekreoatsie en Toerisme. As je op dit gebaauw stoan, toorn je boven ale bomen uut. (NL: uittorenen boven). De ene har t over 25 meter, n'aander over wel 28 meter. Ken je noagoan, zuks n gebaauw midden ien Nationoal Laandschap Lauwersmeer. Doar bennen wat overleggen hin en weer goan, veur dat et aalmoal ien kannen en kruken was. Mor de kleuren bennen zeer noatuurlek: kortenstoal bruun en glad groen sums wat ekkelkleureg. Dudelek mag wezen, dat wolken der gien hinder van hemmen.
De toren het ok n noam: Reiddomp. Dat is de Fryske namme foar Roerdomp. Hoe t ok zij: de toren liekt evenveul op Reiddomp as op Roerdomp.
