Op 28 mei is er een poëziemiddag in het kader van Feest van de Geest.
Zaterdag om 15.00 uur in de Gastkerk te Zuidhorn Thema is in Vuur en Vlam.
Het programma In Vuur en Vlam kent Nederlandstalige en Grunneger gedichten. De Grunneger gedichten neem ik voor mijn rekening.
Het poëziegedeelte wordt georganiseerd door Paulien den Andel, Jacky Venhuizen, Yke Luinenburg en ondergetekende. Aansluitend op de gedichten, presenteren de Kunstenaars Koetjebil hun kunst en een sessie met meditatieve kunst.
t Gedicht Doe en ik is te lezen op internet. De webstek OADER met Grunneger gedichten bestijt aal best n tiedje, ok aal viend je der niet zoveul van terug op internet of facebook.
Hier stijt de link noar Doe en ik.
" De reden dat ik begon aan dit gedicht,
is niet woarom ik t òfmoakt heb. "
t Is n webstek veur erkende OADER-dichters. En nou stijt der ok gedicht van mij op. "t Ken verkeren", zee mien pabbe dan. Die spreuk har-d-er van de 17de iwse dichter en teneelschriever Bredero.
t Bennen bescheiden vogels, tureluurs. Heur nusten misschien ok wel. Mor ok slim stoer te vienden. Bij dit legsel van de tureluur is t gras nog slim kört. Mor as je 3 week loater kommen, zien je allenneg mor graspunten die noar nkander toewiezen.
Grutto hiet de "Keunink van groenlaand". Kiewieten wieten dat ze gien noam neudeg hemmen. Scholeksters bennen overal. Bij gebrek an aandacht bezetten ze leste joaren ien steden aal meer gebaauwen met schulpen op t dak, grasvelden bij n universiteit of parkeerplakken met veul ruumte en open veld.
Tureluurs trekken veul minder de aandacht. En met de nusten gijt t aal krekt zo. Grutonusten vallen doarmet ien t niet. Doar ken je op n òfstaand van 2-5 meter sums t nust aal ontdekken of op zien minst vermoeden.
Veur tureluurnusten moei-je meer muite doen. Sums mor op n òfstaand van 4-8 meter. Zo brudt de tureluur wat ien e leite van e kiewiet en gruto. Dizze vogels wieten beder road met iendringers. Zeevogels, kraaien en buizers, ze kriegen der van langs van grutoos en kiewieten as ze overvliegen. Tureluurs voegen heur bij de verdedigeng bij de tweede aanval. Aal roepend tu-de-lu, tu-de-lu.
Voak zit de tureluur ien e buurt van n kiewiets- of grutonust. k Trof eens n onderzoeker noar grutoos, die dat onzin vond. Die man het zoveul iendruk op mij moakt, da'k hier der poar zinnen over schrief. k Was
slim verboasd dat n wetenschapper noar grutoos dat niet wist. Mor hij was
stellig ien zien reaksie: Tureluurnusten zatten niet dichtbij aandere
weidevogels. 'Hoe wiestoe dat nou', docht ik achternoa, 'doe onderzoekst ja allenneg mor grutoos?'
Veul ienformoatsie over nestgedrag en eier, viend je host niet op Nederlandse webstekken. Fotoos van eier worden ok zelden zien loaten. t Het wel wat weg van censuur; doarom veur goeie ienformoatsie moei-je butenlandse webstekken lezen).
t Is mooi vogeltje. Ien t Duuts hiet t beestje Rotschenkel. Tjerk ien t Vries. Ien t Engels: Redshank. Roodschonk zol je zeggen kennen ien t Grunnegs. Dat is traawens ok n noam veur krödde (Perzikkruid), n plaant met rooie stengels.
Doar ree k langs t kenoal. Aanderkaant de weg liepen peerden ien t laand.
Een peerd boog heur over n vool. Warempel, t peerd har krekt n vool brocht. t Vool was nog nat, mor aal drok ien e weer om ien t enne te kommen.
t Duurt mor even en doar gijt t hin.
t Wordt zachjes-an tied om melk te drinken.
Tjiftjaf oftewel ien goed Grunnegs (Westerkertiers) Tierntijntje.
De tierntijn wordt voak as n Engelse ontdekkeng beschaauwd (van Gilbert White ien 1780). Mor ien Duutslaand was ien 1555 n meneer Gesner der al met Zilzepfle. Ien Nederlaand wordt as vogeltje veur t eerst vermeld ien literatuur ien 1605.
Tierntijntje moakt n bizunder nust. k Heb perbeerd der n mooie foto van te moaken. Dat is ok wel oardeg belukt, allenneg schut t oog sums tekört om t koegelronde nustje goed van omgeving te onderscheiden.
t Is n meroakel hoe dat t nustje eiglieks tetoal een is met omgeving van blad, twiegen, mos, spieren en halmen van groen en dood gras. t Nustje zit n 30 cm boven e grond met opening an e ziedkaant. t Koegelronde nustje stekt - aans as bij t Duumke (Winterkeunenkje) - niet òf tegen achtergrond.
Hieronder t gedicht Ienval op doek. t Gedicht is schreven aan de haand van n schilderij van Aelbert Cuyp.
t Schilderij hiet Rivierlandschap met koeien (1640-1650). t Joartallen verwiezen noar t tiedsbestek doar de koeien ien schilderd bennen. t Wil niet zeggen dat schilder Cuyp der tien joar over doan het.
Cuyp stijt bekend om zien landschappen met koeien en ruters ien dokeg, woazeg licht. Der lopt op t heden de tentoonstelleng In het licht van Cuyp, ien Dordrecht.
t Gedicht Ienval op doek ston òflopen week ien de Grunneger Kerkbode (joargaang 134 week 17).
