GRN festival - Grunneger Festival

t Grunneger Festival ien Hogezaand werd aangeven met GRN. Ja, dan zien je n plakoat of poster met GRN. En toen?  

Hopelek ben k enige die wat troag van begrip is. Mor die posters - dat ken dudeleker. Woarom gien Grunneger en Groninger Festival. Woarom? Omreden dat t festival van òflopen zotterdag ok muite weerd was veur niet Grunnegs sprekende lu. 

Ien de produksie Het Grensland wor-je metnommen ien woorden en sferen van de Nedersaksiese streek en aandere toalen. VLNR: Sacha Landkroon (NL Drenthe), Gesche Gloystein (DE Ostfreesland), Willemijn van de Walle (NL), Arne Lentföhr (D Holstein) en Renske Marike van Dijk (NL) hielden heur prissentoatsie van heur meertoaleg projekt met proza en poëzie. 

n Mooi optreden van Remko Rotgers uut Winschoten (mor hij komt van oorsprong uut Westerwol). 

 

En dan nog Hister de winner van t liedjesfestival 2023. Stevige muziek met drum en basgitaar.

Al is dag nog zo nat

Al is dag nog zo nat, zun schient altied nog wel wat.

Dit is n Grunneger spreuk. Der zel wel n kern van woarheid ien zitten. Toch he’k vermoeden dat je de leste tied beder ien weken en moanden denken kennen as ien doagen. Lange tied he'k docht dat het was: Al is de dag nog zo mat, zun schient altied nog wel wat. Mor goed, veul moakt et ien dit geval niet uut. 

Gek genog, n poar doagen loater scheen zun zo mooi. 

Sprutters boven ien e boom deden met heur gekwetter veurkommen as was et haalf meert. Gewoonlieks bennen ze ien november verdwenen. Mor leste joaren zie je voaker kleine koppels rondvliegen rond joarwisseleng.  

n Nuvere vlag

Dizze vlag trof ik aan ien Vrieslaand, Twiezel. Ik viend dit nuvere vlag of wimpel zo je willen - ien t Westerkertier betekent 'nuver' mooi. Eerder he'k die ok zien ien t Westerkertier. Een kombinoatsie van de Vriese en de Grunneger vlag. 

Summege minsen zellen denken van: wat n apadde vlag. Vriezen zeggen dan: wat in nuvere flagge. 

t Komt der op del, dat je beder met "n nuver wichtje ien Grunnengen" as met "in nuver famke yn Fryslân" op stap goan kennen.

Mor ik viend dizze vlag wel mooi. 

Ik denk ok dat meer minsen dat doen kennen. Een wimpel moaken die bestijt uut 3, 4 vlaggen. 

Zuks n wimpel budt meer meugelkheden uutdrukkeng te geven aan de vroag woar of dat minsen weg kommen en woar ze heur met verbonden voelen. Vlaggen van pervincies, vlaggen van laanden. n Wimpel bestoande uut meer vlaggen ken de wereld meer verbienden en kleurrieker moaken. 

Vlaggen zollen minder politiek en meer minselek worden. 

   

 

Roodborstje ien haarfstlicht

t Licht was zo mooi verleden week. Zun scheen deur t blad. 

Zo dichtbij. Van ver vot. Want roodborstjes ien t noajoar bennen uut Scandinoavië. 'Onze' roodborstjes bennen noar t zuden vlogen. En nou hemmen wij veur de winter gasten uut t noorden. Roodborstjes zingen - as zun wat schient - dat et n lust is. 

Je zollen zowat denken dat ze veurjoar ien e kop hemmen. 

Bloeiende tudeltoantjes ien november

Tudeltoantjes bloeien overal.

Der het n tied west dat tudeltoantjes allenneg ien e tuun te vienden was. Die tied is veurbij. Boeren verbaauwen tudeltoantjes ien grode hoeveulheden. Tudeltoantjes (Tagetes Patula) kommen van oorsprong uut Mexiko. 

Ien t Nederlaands is et: Afrikaantjes; ofwel Tagetes (uut t Letien). De laandbouw bruukt et veur t bestrieden van wortellesie-oaltjes.  

t Gewas moet ien e noazummer ienzaaid worden en 3-5 moand op woddel stoan. Doarnoa ken-je der goed eerabbels, woddels en siepels telen. 

Uul ien e nok

n Veer van n katuul. Oftewel, n kerkuul. 

n Pooske terug vond ik die ien t gras op groenlaand met knipgrond, t was n oavend ien augustus. Dat deed me denken an de dooie uul die k as schoeljongen soamen met n poar vrienden von. We hemmen verscheidene veren uuttrokken en bewoard. 

t Kreng hemmen we begroaven en noa n moand of wat weer opgroaven. De schedel van e uul he'k schoonmoakt en lange tied bewoard. 

Dizze uul hierboven is nog goed levendeg. t Ploatje kreeg k niet schaarper. Dizze har t wel aan tied en keek even strak omdel as ik omhoog tuurde.

Op de stienen lagen huul d'uuleballen. Pakjes botten, veren en vellen van vogels en muzen.