Boom boog beheurlek diep. Mor uuteindelieks bleef er met de haand wat steken.
Wonderliek is t wel: elke keer da'k ien t park kom, ken ik wat nijs
ontdekken. Oftewel, hoe voak dat ik ok deur t parkje loop, kennelek zie k elke dag wel wat
over t hoofd. t Is mor krekt van welke kaant je t bekieken.
Verleden week t'eerste nust weer vonden vrijdag 19 meert. Leste joaren as k ien t laand struun, ben k de enige die doar lopt. Behalve as een van e femilie met nem. Vandoag de dag zien je eiglieks gien kiender meer ien t laand. Hoe de wereld is veraanderd. Vroeger warren der zo mor wat jonges ien t laand, eierzoeken, wat ouwehoeren, uutdoagen, slootje springen en nkander der ien kletsen.
t Eerste nust met eier is toch n bizunder moment. Mien dochter zag de eier eerst. Ik bleef even eerder stoan omdat op heur boan aander kaant van heur vedderop wat veul stro bij nkander zag. Ze deed n stap uutzied van mij òf en doar zag ze de eier ien t nust leggen.
Joaren terug von k op mien dattiende t eerste nust met twee eier op 17 meert. Dat was n bizundere vondst veur mij, zo vroeg. Dat joar was alles vroeg. En dan te bedenken dat ien e joaren zeuventeg kiewieten veul loater begonnen te leggen as tegenwoordeg.
Ien mien olle schoelagenda van 1977 zag k de vondst vermeld: 17 meert - 2 kiewietseier. t Was op n dunnerdag - schoeldag nummer 132 van joargang 1976/77. Wat was k bliede met mien vondst. Nou hoop k dat kiender de kaans kriegen zulf nust te vienden. Doar beleef k meer plezier an as dat k zulf doe. Noa òfloop zee de dochter, dat t slootje springen nog mooier was.
Vandaag was de bekendmaking van de top 3 van Prijs de Poëzie 2020.
Mijn gedicht Welkom in Nederlands is in de serie van 100 beste gedichten van de nationale gedichtenwedstrijd terecht gekomen. .
Hoor hier het gedicht: Welkom in Nederlands
Dit was het resultaat van een grote voorselectie. n Maand terug was mijn gedicht uit ruim 7.000 ingezonden gedichten geselecteerd voor de laatste 1.000 gedichten.
Op Meandermagazine he'k n column schreven over t gebruuk van de datief ien t Nederlaands en ien streektoalen. Datief wordt ien t duuts ok wel darde noamval noemd. Ien t Nederlaands het men t voak over t meewerkend veurwerp.
Hier ken je de column vienden - t is ien Nederlands met wat Grunneger veurbeelden: Column op Meandermagazine over datief-zinnen.
Ien t Nederlands worden zinnen met datief aal minder bruukt. Op zichzelf schanne, want de datief is n mooi middel om stemmeng, iendruk en mening weer te geven zunder dat de persoon zo ien t middelpunt stijt.
Kort mor krachteg: Datief is mij dierboar ! t Gebruuk van meerwarkend veurwerp dut mij deugd.
Dizze moand is Meertmoand Streektoalmoand. Verscheidene organisoatsies besteden aandacht an de streektoal. Ok ien Provincioale Stoaten is der oog en oor veur de streektoalmoand. Guster was de Stoatenvergoadereng.
Der was n kort optreden van CGTC met Henk Scholte en Harry Niehof.
En doarnoa moedegde kommisoaris van de keuneng Paas de leden van de Provincioale Stoaten aan om heur toesproaken ien t Grunnegs t holden.
As bliek van waardereng veur dizze leden deelde er n aantal exemploaren van de dichtbundel Zolt en Stof uut. Zo was t even Sunterkloas ien meert.
Veur meer: Vergaodereng Provincioale Stoaten 10 meert rond minuut 28.
t Is Meertmoand Streektoalmoand. Gemeente Westerkwartier het n kultuurvisie ontwikkeld. Op dinsdag 9 meert wer de kultuurvisie "Ienvesteren ien geluk" behandeld. t Begon met n gedicht Veujoar van ondergetekende. Wetholder Hielke Westroa prissenteerde zien kultuurvisie en anischtkoarten met Westerkertierder gedichten.
Bizunder is dat ze ok aandacht schenken aan Westerkertierder streektoal. Dat is n mooie zet. Roadsvergoadereng over de Kultuurvisie vanòf t begun - 19.30 uur: Roadsvergoadereng.
Of lees de visie: Kiek mor ns even.
Tussen Lepterd en IJmtil wordt n wotterbaargengsgebied ienricht. Der worden slenken, geulen en plassen groaven en der wordt ophoogd. Zo is der is aal huul wat grond verzet de òflopen moanden.
De koade van t Hoendiep tussen de driesprong bij IJmtil en de Oostwolmerdraai hemmen ze ophoogd. Niet deur grond, mor deur an e zuudkant van t Hoendiep n totoal nije stoalen waand aan te brengen.
Dit is de tweede stuw ien t gebied. Òflopen joar is de stuw ien t Lepterdiep baauwd, even te noorden van de A7. De stuwen bennen neudeg ien tieden dat der veul (regen-)wotter valt. Om koaden (kleine diekjes) van de diepen te ontlasten zel t wotter van e diepen (Matsloot, Hoendiep, Lepterdiep) ien t baargengsgebied opvongen worden. Stuwen goan dicht en veurkommen dat wotter uut richteng van e Povvert ien noordeleke richteng noar t Van Starkenborghkenoal stroomt. Met dizze stuwen ken t wotter beter beheerst worden en bennen we domt huulmoal kloar veur nije uutdoageng van t wotter ien 21ste iw.
Kiek ns aan. t Ken toch. Westerkertierder woorden bruken woar ze bruukt worden moeten. Oostwolmerdraai, dat wil zeggen de draaibrug van Oostwol (NL: Oostwold).
Mooi doan. Met dank an de organisoatsie, wel t ok wezen mag!
Oostwol (NL: Oostwold) leit krekt ten noorden van de A7, tussen de Povvert (NL: de Poffert) en Lepterd (NL Lettelbert).
t Bizundere zit hum niet ien t woord Oostwol - de noam van t plak - mor ien t achtervoegsel -mer. Dat achtervoegsel ken je ok vienden ien Nuusmer pad en ien de Grotegastmer tocht. Ienwoners van Lutjegast en Grotegast hieten fietlieks Lutjegastmers en Grotegastmers. Kadaster bruukte dizze woorden as bijvoeglek noamwoorden ok op koarten tot rond 1930. Toen bedocht een hum kennelek, dat et aalmoal aans mos.
De vervoegeng van n plak met achtervoegsel -mer vien je ok ien t Vries: Westergeestmer is n ienwoner van Westergeest (Vries: Westergeast) en Westergeestmer greiden bennen de graslanden van Westergeest.
Vroeger warren der veul meer draaibruggen. Tillen werden ze noemd. Veur de tied van t Van Starkenborghkenoal zatten ien t Hoendiep tussen t Noorhörnner Tolhek (doar woar t Hoendiep ien t Van Starkenborchkenoal uutkomt) de Goarkeuken bij Gruupskerk rond 1900 en twee, drie tillen. Soartjes Draai was der een van. Doarover n aander keer mee.
