Optreden ien Pervincioale Stoaten - Aandacht

t Is Meertmoand Streektoalmoand. Doarom n veurdracht ien Pervincoale Stoaten. 

(c) Willem Tjebbe Oostenbrink 2024

t Ging over t verschil tussen aandachtspunt en prebleem. n Overzicht van termen ien t Grunnegs en ien t Hollaands. 

Veurdracht is te heuren via link: Veurdracht ien Pervincioale Stoaten.

Begun van veurdracht ongeveer op minuut: 00.16.00. 

k Moet der wat bij zeggen: k heb t ien de ienleideng over 'moeilijk'. Dat is noatuurlek ien t Grunnegs stoer. Toch bruuk k stoer niet ien d'ienleideng. Dat het te moaken met et verminderde gebruuk van 'moeilijk' ien t Hollaands en dat dit vervongen is deur 'lastig'. Dat wol ik dudelek aan de orde stellen. 

Der bennen ien t Grunnegs huul wat woorden veur perbleem: meleur, pech, trammelant, gedonder, dorie, toustand, ien zwoar weer zitten. Ok ien t Hollaands: punt van zorg, knelpunt, ding. En goa zo mor deur.  

Leste joaren is doar uutdoageng bij kommen. Crisis he'k niet opschreven, mor heurt der eiglieks ok bij. Noatuurlek stijt 'dingetje' der wel op. Dat wordt aals mor meer bruukt ien t Hollaands en niet allenneg deur managers. 

Woarom bennen der minder problemen as 30 joar leden? Woarom warren vroeger zo veul dingen moeilijk en nou niet meer? Hoe ken dat? 

De gedichten stoan ien de nije bundel Uutkomst (Huus van de Taol, Beilen 2024). Uutkomst is n mooi woord met veul betekenissen. De uutkomst van n gesprek, uutkomst van de som, eier kommen uut noa broeden, dreumen kommen uut sums. En de uutdrukkeng: Da's een uutkomst! as de oplösseng veur n perbleem.  

Börgemeester Ard van der Tuuk nemt UUTKOMST ien ontvangst

Dizze moand is Meertmoand Streektoalmoand. 

Börgemeester Ard van der Tuuk het de nije bundel UUTKOMST ien ontvangst nommen. 

Ik mocht aan t begun van de roadsvergoadereng het gedicht Grunnengen uut de nije bundel veurdroagen. 

Je kennen de veurdracht ien de roadsvergoadereng vanòf tiedstip 00.21.55 heuren: Veurdracht Gedicht Grunnengen. 

En goed nijs: de örganisoatsie Mien Westerkwartier het subsidie kregen veur heur aktiviteiten. 

 

Flabbergasted en Flappergeesterd

Dit stuk gijt over flabbergasted en flappergeesterd. Leste joaren heur je geregeld t woord flabbergasted. Dat was veur mij aanleideng om n nij gedicht te begunnen. Woarom bruken we nije, onbekende woorden? Wat dut dat met ons, met de spreker en met de toeheurders? Dat viend ik ienteressante vroagen.

Op de vergoadereng van de Pervincioale Stoaten van 9 meert was der aandacht veur Meertmoand Dialectmoand. t Heb twee gedichten veurdroagen en dizze was der een van. Het gedicht hiet Surprise. Dat ken-je op zien Engels en op zien Fraans lezen. De bedoeleng is dat joe t uutspreken op zien Engels. 

k Heb t veurdroagen. En vanòf min. 4.54 is t gedicht Surprise met flabbergasted.  

Wieten joe wat flabbergasted betekend? Ik heb t opzocht. Flabbergasted betekent: dumbfound, stunned, surprised, blown away, astonished, baffled, startled, puzzeld, shocked, en nog veul meer. Vremd genog, as je minsen vroagen wat flabbergasted betekent, kriegen-je dizze antwoorden noeit. Ik ben ns op zoek goan noar de herkomst.

Woar komt flabbergasted weg? Feitlieks komt et uut t middeleeuws Engels van de streek van Suffolk. Dus t is n streektoalwoord.

• Flabber. Dat het te moaken met sloagen, klappen. Dat komt mooi uut, want ien t Grunnegs en t Vries hemmen je ok t woord Wilsterflappen. Wilsters bennen 'goudplevieren', vogels ter grootte van n kiewiet, die vroeger vongen werden met klapnetten. Dus is flabber is  flappen.
• Gasted. 'Agasten' ien middeleeuws Engels is schrik aanjoagen. t Old Engelse woord is 'gæst' verwiest t schrik aanjoagen deur 'geasten'. Dat liekt op geest, geist ien t Duuts, gaist ien t Hogelaandsters, geast ien t Frysk. Duutsers hemmen 'begeistert' en 'entgeistert' (stomverboasd). Met t waarkwoord geestern kom ik uut op geesterd. Je bennen zo aangesloagen, asof je n geest zien hemmen. Of de geest ien e persoon is huulmoal vot. Verstiefd van schrik, riddersloagen, tetoal verbilderd en verballereerd.

Zo kom ik op zien Grunnegs uut op flappergeesterd!

Op de poster nog meer woorden die te moaken hemmen met flappergeesterd. k Ston versteld van de uutdrukkengs die der aalmoal warren.

 

Optreden ien de Pervincoale Stoaten ien Stad

Op de vergoadereng van de Pervincioale Stoaten van 9 meert was der aandacht veur Meertmoand Dialectmoand. k Mocht n poar gedichten veurdroagen. 

Klik hier: Veurdracht ien Pervincioale Stoaten - Meertmoand Streektoalmoand.

Vanòf minuut 00.24  t/m 00.36 uur ongeveer. 

Klik hier: Veurdracht ien Pervincioale Stoaten - Meertmoand Streektoalmoand.

Vanòf minuut 00.24  t/m 00.36 uur ongeveer.