Wilsters op deurtocht

Ze bennen der weer. Om misschien is het aal: ze warren der weer. Wilsters - op zien Nederlaands goudplevieren. Op deurtocht vanuut t Scandinoavië noar t zuden. 
 

Tussen de wilsters - overwegend strepereg, brunege vogels met zwadde borst - zitten ok wat zwadwittere vogels. Dat ben kiewieten. Aalmoal op trektocht om te overwintern. 

En doar goan ze weer.

 

 

Zulverreigers

 

Hoeveul zulverreigers ken je op een stuk laand hemmen? Meer as de koeien die der lopen, ien elk geval, dat is zeker. 

Ik heb me verboasd over zoveul zulverreigers as dat der bennen. En aalmoal ben ze stoan op wacht, stil op jacht en kieken om heur hin. As ik teveul aandacht op heur richt veur n foto, vliegen ze op. 

Dan goan ze weer zitten ien t graslaand. Om heur hin kiekend, noar de muzeholen en gangen doar wat beweegt. t Is n goed, t is n meroakels goed muzejoar. Dat ken je vernemmen aan noatuur. 
 

Quickborn - met gedicht Glas

Ien de leste uutgoave van t plattduutse blad Quickborn ston t gedicht Glas. Carl-Heinz Dirks het ien zien hörn "Opsätz" dit leste kwartoal van 2026 kozen veur t gedicht. 

Veur meer ienformoatie Quickborn Vereinigung 

De jury van de Borslapries schreef ien de lofrede (laudatio) tekst hieronder (2014). t Is schreven ien Cloppenburgs plat.

 

Misschien wat stoer te lezen, mor t bennen zeker mooie woorden.  

Quickborn Vereinigung

Bomen met ogen - onnerweegs noar Den Hörn

Dizze bomen blieven mij boeien. Summege bomen kieken dij strak aan, aandere negeren dij. Et bennen witte abelen. n Aandere noam die bruukt wordt is: zulverpopelier. 

t Blift verboazengwekkend hoe iendringend abelen sums kieken. Mor der bennen ok bomen, die hemmen gien oog veur dij. 

Hoe dan ok, onderweegs van Eemtil noar Den Hörn bist niet allenneg.

 

Bezoek aan Burum city / Boerum city

Der bennen weineg dörpen die de toevoegeng "city" hemmen. Dit woord "city" stijt ok sinds joar en dag (al meer as 20 joar, denkelek) op t officiële verkeersbret aan de pervincioale weg met de haand aanbrocht achter t woord Burum. t Het ok wel weer wat, vien ik.

 

Boerum veur de Boerummers, en Burum veur veul aandere luu uut omgeveng. Hier n blik op Boerum vanòf de meulen. Mulder har meulen opensteld. 

Burum het wel wat bizunders he'k körtleden ontdekt. D'eerste kerk ien Nederlaand die grifformeerd was. t Gebaauw op de òfbeeldeng is van 1895, mor der het n oller gebaauw stoan.

Kiek ien Olrum (Ulrum - Gr) zatten ze met keunenk Willem ien concloaf over hoe et mos met hoofd van kerk en aandere geloofszoaken. Ds Hendrik de Cock wol niet om liek en ging met de aanhangers heur weegs. Zo kreeg je hoagepreken, en me dunkt met min weer, schuurpreken. 

Ien Burm is de d'eerste gereformeerde kerk (gemeenschap) ien Nederlaand sticht aal ien 1835 -persoonlek deur Hendrik de Cock. Dat liekt lang leden en van gien weerde, mor blift bizunder. De protestanten deden aan protesteren en kerkgemeenschappen stichten. En dat meer as 150 joar leden. Der sprekt ok veul ondernemengszin uut. Geloof en vertrouwen ien ideeën en koers en deurzetten. 

En dat aalmoal ien Boerum-city. 

Galilea tussen Burum en Visvliet

Dizze weg leidt noar Visvliet. We bennen hier tussen Burum en Visvliet te Galilea. Rechts stijt n boerenploats die hiet "Vrouwenklooster Galilea" - met stelpboerderij die vedder vanòf de weg stijt. Ien vroegere tieden beheurde dit tot t cisterciënzer Gerkesklooster aan e zuudkaant van de spoorlien. 

De weg deur Galilea is nou van betun. Toen k as schoeljongen hier delfietste onnerweegs noar schoel ien Butenpost, was et n klinkerweg met olle iepen. Binnen n poar joar werden de leste hoge dikke iepen omzoagd. D'olle Vriese stroatweg verloor heur koninkleke aanzien. Nou stoan der wat schlemielege essen of berken, dunkt me. k Moet altied nog wennen aan de betun aanblik. 

En noa Galilea over de Gerkesbrug begunt Visvliet, t Grunneger grinsdörp.

Even achterom kieken met de groeten aan Galilea.

 

 

 

Gdańsk - Walesa / Wałęsa

Zummervekaansie is aal lang veurbij. Sums moe'k even denken aan ons bezoek aan n klein museum ien ien d'olle hoaven van Gdańsk. Doar traden we binnen ien n zoal van de vakbond Solidarnośc. Der hemmen vermoedelek meer stoelen stoan, schut me te binnen. Mor aan t enne achter de toavel met groen loaken, doar zat Walesa / Wałęsa. 

Eiglieks moeten je "Wauwensa" zeggen. Ien t Pools schrieven je: Wałęsa. De 'ł' is n padde 'l', die je uutspreken as 'w' gliek je ien Broabant heuren kennen; de 'ę' klinkt as de 'e' die deur de neus uutsproken, wordt. 'Wauwensa' dus. 

Dizze Poolse vakbondsman was as veurzitter van de vakbond, ènne van de zeuventeger joaren van twintegste iw, zowat  doagelieks ien t nijs. 

De stoakengen ien 1979 en 1980. t Was n spannende tied. Wat zol Ruslaand doen met de grode roep om meer vrijheid?  

t Was leerzoam te lezen over planeconomie, de grode opdrachten en de grode schippen die baauwd werden, ien e joaren zesteg ok ien opdracht van bedrieven en rieke minsen uut Westerse landen. Tot et minder ging met economie mid joaren zeuventeg en opdrachten uut bleven. 

t Wer crisis. En waarkeloosheid die niet beston ien communistische landen, wrong hum ien e soamenleveng noar binnen, wat politiek ok perbeerde en beweerde. 

Veul vlaggen van verscheidene vakbonden ien t museum. De macht van arbeiders staarker as Lenin.