Grode Gedichtenoavend / Grutte Gedichtejûn - 5 feberwoari

Ensafh, t Vries Literair Tiedschrift, Frysk Literêr Tydskrift organiseert dit joar de Grutte Gedichtejûn / Grode Gedichtenoavend Digitoal op 5 feberwoari.  

Optreden dichters youtube: Rond de tied 38.45 min op e tiedslien is t gedicht Wotter en Stien ien t Westerkertiers te heuren.

n Optreden met 20 dichters ien t Vries, Nederlaands en ok met n Westerkertierder element. Kiek en heur mor even 5 feberwoari om 19.30 uur: Optreden dichters youtube.

Ligusterbessen holden lang vol

Vogels vienden de rooie liesterkralen, kwitsekralen haartstikke lekker. Ze bennen naauwlieks riep of sprutterzwarmen störten heur der op. 

Doar hemmen ze t drok met ien e noazummer. De bessen zie je doarom ok naargens meer. Zwadde bessen van e liguster bennen huul aans. Doar is t spreekwoord van toepasseng: Honger moakt raauwe bonen zoet.

Ligusterbessen blieven hangen tot wel ien december en noa nijjoar. En as et dan wat vrust, dan uutiendeleks kommen vogels der op òf. Eerder zag k roodborst, n poar doagen terug dizze merel.

Je zien ligusterbessen niet bodde veul. Voak worden ligusters een of tweemoal per joar snoeid. Zodoende valt der weineg te genieten van e geurende witte bloemen. Toch stijt et wel mooi zo'n boske, veural as liester veurbij komt.

Merel ien ligusterboske Zie ok actiefilmke.

Wotterpiekjes aals mor makker

n Week  terug mos k noar Gruupskerk. Even langs t Poeldiep reden. Nije koade van e hoaven lag der schier bij. Allenneg stond t eendehokje wat scheef. Dat kennen ze toch wel even rechtzetten, dunkt me. Onderweegs zag k verscheidene wotterpiekjes. 

Zoveul wotterpiekjes as der bennen tegenwoordeg. Ien e tied da'k mien eerste wotterpiekjenusten vond, haalverwege joaren zeuventeg, warren der ok wel veul. Mor toen zagst ze noeit ien t dörp. Kennelek hemmen ze heur schuchterheid overwonnen.

Ien e strenge winter van 1979 bennen der veul wotterpiekjes om hals kommen. Ien e joaren negenteg. kwammen der stoadegan weer meer.

Nou liekt et dat wotterpiekjes haartstikke mak worden bennen. Krekt as meerkoeten, die grotere, rondere vogels met witte bles. Misschien hemmen wotterpiekjes et van de meerkoeten òfkeken. Die bennen aal eerder heur opmars begonnen ien dörpen en parken.

Vieftien joar leden, toen k ien Amsterdam woonde, zag k wotterpiekjes aal nuzzeln ien vievers ien parken. Ze trokken heur niks van minsen an. Ach, ja ien e stad gebeuren veul dingen wat eerder.

Sprutters ien t nije joar

De tieden dat veul vogels (zummergasten werden ze ok wel noemd) noar t zuden trokken, lieken veurbij. Sprutters zien je t hule joar deur. 

Nou ken t ok wezen dat de sprutters die hier broeden en jongen grootbrengen aal noar t zuden trokken bennen. En dat vogels uut Scandinoavië bij winterdag te gast bennen bij ons. Dizze sprutters vlogen over om mij op e eerste dag ien t nije joar even nij-joar te wennen. 

Ik was niet wend om sprutters ien jannewoari te zien. Begun joaren tachteg kwam ik n keer ien Rötterdam, en doar zag-je hule koppels sprutters. Nou liekt et der op dat ze t hier swinters ok goed noar t zin hemmen.