Veujoar - vroeg en te loat

Kiek doar is er dan. Noa n lange tocht, duzenden kilometers. Terug op t olle stek, allenneg. 

t Wachten is op aander swaalfkes. Dizze kwam bij Gruupskerk aan op vijf april.

.

Dan nog een vroege vogel, of beder ei. De scholekster het al n vol nust op 12 april.

Aalmoal vroeg. En wat is dan zo te loat?
Op verscheidene plakken he'k zo weineg kiewieten heurd, doar wer k stil van. Ik ken der niet bij, dat over 3-4 joar kiewieten, gruttoos en vlinders votbennen. De leste weken moalt de science fiction film Soylent Green mij deur de kop. n Groot deel van e bevolkeng is arm en eet allenneg soylent, moakt ien febrieken van 'Soylent Incorporated'. Soylent bestijt ien de vörmen rood, geel en - t zeldzoame en kwalitatief t beste - groen. t Het gien smoak en t is zunder geur. t Slim voedzoame goedje wordt verkocht as kleine wafels. Dan ontdekt de hoofdpersoon de toedracht en t geheim achter Soylent. Wat is alles nog weerd as je dat wieten? (k Zel niet te veul ienformoatsie over t enne van de flim weergeven.)

Recensie over Zolt en Stof ien t Frysk

Der stijt n recensie over de bundel Zolt en Stof op Ensafh, de Vriese webstek veur literatuur en poëzie. En met veurdrachten van Westerkertierder gedichten ien t Vries deur Geart Tigchelaar.

Luuster mor even noar zien veurdracht en wat er te melden het over de bundel: Recensie op Ensafh.

Geart Tigchelaar an t woord

Myn petsje ôf. Guod dien! 
Mien petje òf, hij dut t mooi. Goed doan, zol k zeggen.

Tredende kiewieten

Op dizze fotoos twee tredende kiewieten. De doffer tredt t duufke. De prachtege foto's bennen van Rob Tjalkens.

Tredende kiewieten; foto: Rob Tjalkens

k Was n joar of twinteg toen k van mien studiestad noar huus toe lifte. t Was veujoar en hartstikke mooi weer, dat ik wol noar huus. k Mos zo gauw meugelek t laand ien. Allenneg dan mossen automobilisten mij wel n lift geven. Uuteindelieks, doar kreeg k de leste lift van Stad noar huus. t Was n Fries en hij har ok verstaand van eierzoeken. 
Zo vertelde hij me wat over gedrag van kiewieten. Bij treden van t wiefke deur t mantje, ken je zien of ze eier hemmen of niet. As de doffer t duufke tredt en hij vlugt vot, dan hemmen ze gien eier. Blift t mantje noa t treden vlakbij t wiefke zitten, dan hemmen ze eier.

De doffer tredt t duufke; foto: Rob Tjalkens

k Zag n keer kiewieten op hartstikke nat laand. t Har die nacht slim regend. De doffer vloog roepend deur de lucht. Doar dook er del en ging zitten vlak bij t wiefke. Hij treedde t duufke en bleef zitten. Ik kon naauwelieks loven dat ien die natte n ei lag. Met stevels liep ik deur de plassen met wotter. Uuteindelieks von ik t nustje met één ei ien n kuultje half vol wotter. Toch n ei!

Fopnusten en volle nusten

Kiewieten bennen aal weer drok doende. Ien meert begon t aal weer met nusten baauwen. Agroarische Noatuur Verenigengen bennen ok drok ien e weer. 

Ien n cursus wiedevogelbeschermeng vertelden begeleiders over "schijnnesten" die de kiewiet moakt.Wel het heur dat woord nou bijbrocht, vroeg k mij òf? Schient et n nust te wezen en is et gien nust omdat der gien ei ien leit? Wonderlek, dizze benoameng. Hemmen we et over n werkelekheid die niet echt is? Die heur aan ons oog onttrekt? Is dit een digitoale werkelekheid?

Het woord veur zuks n nust is fopnust. Tuurlek ken-je je ok over 'fopnust' verwondern. Mor t is wel n nust, allenneg leeg. Woarom dan leren cursisten een nij woord, dat niks toevoegt?

We hemmen nog meer woorden ien t nije leerboek: kieviten paren. Et liekt dezulfde stijl en toonzetteng as Hiv-aids uutleggen an de hand van bloemen en bijtjes ien e joaren tachtig. Doar ging ien t veurlichtengsfilmke n bij dood, omdat et noar verscheidene bloemen vloog. Nee, beste minsen, bijen ien e noatuur moeten juust noar verscheidene bloemen om ze te bevruchten. Zucht. Zo is de veurlichteng over noatuur tegenwoordig.
"Treden" is t woord. Vogels treden. t Mantje van de kiewiet - de doffer - tredt t wiefke.

Zo komt t nust toch n keer vol.