Dizze bomen blieven mij boeien. Summege bomen kieken dij strak aan, aandere negeren dij. Et bennen witte abelen. n Aandere noam die bruukt wordt is: zulverpopelier.
t Blift verboazengwekkend hoe iendringend abelen sums kieken. Mor der bennen ok bomen, die hemmen gien oog veur dij.
Der bennen weineg dörpen die de toevoegeng "city" hemmen. Dit woord "city" stijt ok sinds joar en dag (al meer as 20 joar, denkelek) op t officiële verkeersbret aan de pervincioale weg met de haand aanbrocht achter t woord Burum. t Het ok wel weer wat, vien ik.
Boerum veur de Boerummers, en Burum veur veul aandere luu uut omgeveng. Hier n blik op Boerum vanòf de meulen. Mulder har meulen opensteld.
Burum het wel wat bizunders he'k körtleden ontdekt. D'eerste kerk ien Nederlaand die grifformeerd was. t Gebaauw op de òfbeeldeng is van 1895, mor der het n oller gebaauw stoan.
Kiek ien Olrum (Ulrum - Gr) zatten ze met keunenk Willem ien concloaf over hoe et mos met hoofd van kerk en aandere geloofszoaken. Ds Hendrik de Cock wol niet om liek en ging met de aanhangers heur weegs. Zo kreeg je hoagepreken, en me dunkt met min weer, schuurpreken.
Ien Burm is de d'eerste gereformeerde kerk (gemeenschap) ien Nederlaand sticht aal ien 1835 -persoonlek deur Hendrik de Cock. Dat liekt lang leden en van gien weerde, mor blift bizunder. De protestanten deden aan protesteren en kerkgemeenschappen stichten. En dat meer as 150 joar leden. Der sprekt ok veul ondernemengszin uut. Geloof en vertrouwen ien ideeën en koers en deurzetten.
En dat aalmoal ien Boerum-city.
Dizze weg leidt noar Visvliet. We bennen hier tussen Burum en Visvliet te Galilea. Rechts stijt n boerenploats die hiet "Vrouwenklooster Galilea" - met stelpboerderij die vedder vanòf de weg stijt. Ien vroegere tieden beheurde dit tot t cisterciënzer Gerkesklooster aan e zuudkaant van de spoorlien.
En noa Galilea over de Gerkesbrug begunt Visvliet, t Grunneger grinsdörp.
Zummervekaansie is aal lang veurbij. Sums moe'k even denken aan ons bezoek aan n klein museum ien ien d'olle hoaven van Gdańsk. Doar traden we binnen ien n zoal van de vakbond Solidarnośc. Der hemmen vermoedelek meer stoelen stoan, schut me te binnen. Mor aan t enne achter de toavel met groen loaken, doar zat Walesa / Wałęsa.
Eiglieks moeten je "Wauwensa" zeggen. Ien t Pools schrieven je: Wałęsa. De 'ł' is n padde 'l', die je uutspreken as 'w' gliek je ien Broabant heuren kennen; de 'ę' klinkt as de 'e' die deur de neus uutsproken, wordt. 'Wauwensa' dus.
Dizze Poolse vakbondsman was as veurzitter van de vakbond, ènne van de zeuventeger joaren van twintegste iw, zowat doagelieks ien t nijs.
De stoakengen ien 1979 en 1980. t Was n spannende tied. Wat zol Ruslaand doen met de grode roep om meer vrijheid?
t Wer crisis. En waarkeloosheid die niet beston ien communistische landen, wrong hum ien e soamenleveng noar binnen, wat politiek ok perbeerde en beweerde.
Veul vlaggen van verscheidene vakbonden ien t museum. De macht van arbeiders staarker as Lenin.
Veul minsen die dit zien, vroagen mij of ik ien Nepal west heb, of ien India. Dan zeg k wel: joa, dat klopt.
Dizze Tibetoanse Boedhatempel stijt aan e zuudhaant van t dörpke Hantum, boven Dokkum richteng Holwert. Kiek ok mor even op: Tibetoanse Boedhatempel.
Ik von et wel slim zen.
n Bezoek aan Westerplatte. Doar woar de Tweede Wereldoorlog begon. Der is kennelek gien Pools woord veur. n Groot gedenkteken is doar opricht.
Westerplatte is n laandtong aan noordkaant van Gda'nsk. Doar begon op 1 september 1939 de oorlog. n Poar week eerder smokkelde n schip Duutse mariniers noar de vrijstad. Vanòf et schip werden eerste schoten löst op de Poolse soldoaten van de kazerne van Westerplatte.
Groeten uut de hoaven van Gdansk. Hoe et was met mien wil om te klimmen, wer mij dudelek toen we ien n grode kroan omhoog kommen. Vroeger mos ik bij hoogten zo nou en dan wel wennen an hoogtes. Hoogtevrees har k niet, mor k mos wel ns even ho holden bij t klimmen ien n hoge boom.
D'olle hoaven lag ver onder ons.
Burow. Bij Woltersdorf. Wat valt der te melden over n stroatdörp ien Brannenborg 100 km boven Berlien?
Et leit zowat op e grins met Mecklenburg-Vorpommern. n Eenvoudeg dörpke dat bestijt uut een stroat met 20 huzen twee aan twee baauwd. Der is gien kerk, kroeg, gien schoel - leste zel der wel ns west hemmen. Nou is der nog n soort pension, n lutje hotel met restaurant.
Wegen lopen zelden dood, mor bennen niet altied verhard.
t Enne van verharde weg hier, geft gelegenheid te keren. Of deurgoan: over n half verharde, half overgroeide weg is t körtst - 4 km mor - noar t volgende plak, Menz.
Burow het zien eigen verleden, aal is et dan bescheiden. Ien 1530 wordt Burow noemd as woeste grond toebeheurend aan n klooster. De noam van t plak komt van bibr - n sloavisch woord veur bever. Sund 1750 hemmen minsen hier woond. Der wer toestemmeng geven veur t vestigen en huusvesten van 200 butenlanders, dat wil zeggen niet-Prusen.Der bennen veul redens woarom dat minsen trokken. Ien dit geval was der sproake van leegloop. Der was n tekört aan minsen deur ziektes, honger en oorlogen. t Ken verkeren, zellen we mor denken.
Vanòf de Gerkesbrug bij Visvliet n blik over de Lauwers, n prachtege stroom tussen Grunnengen en Vrieslaand. Dizze kalenderploat van augustus 1985 zel misschien n joar eerder moakt wezen - kalenders moeten aal veur nij-joar verspreid worden. Pony het meer oog veur de fotograaf as veur de Lauwers, mor goed, doar kon t dier hule dag over t wotter kieken.
As fietser was et n glimp van misschien n halve minuut over de Lauwers. Dan ging t weer deur over d'olle stroatweg richteng Burum (Boerum) of smirregs weerom deur Visvliet langs krudenier de Wind zien winkel met snoep en ijs.
Dit was veur mij de grootste brug die ik over mos as schoelier noar Butenpost. Eerst was der westkaant Visvliet, de brug over t Visvlieterdiepke, dan kwam de Gerkesbrug en uuteindelieks ien e buurt van Kollum en d'Augsbuurt, was doar de brug bij Leste Stuver over Stroobosscher trekvoart / Dokkumer trekvoart - al noar gelang t plak doar je de reis begunnen.
Met d'olle stroatweg is wat bizunders aan de haand. Wat me nou opvalt, is dat de weg vanòf Gruupskerk richteng Visvliet "Friesestraatweg" hiet en as je over de Gerkesbrug ien Vrieslaand bennen, hiet de weg nog even zo goed "Friesestraatweg".
t Gebeurt niet voak dat je n vleermuus van dichtbij zien kennen. Dizze vleermuus wer dood vonden tiedens vekaansie. Mien dochter zee dat der n vremd beestje op e grond lag.
De foto die k kreeg deed me denken aan toen we met n koppel schoeljongens n vleermuus vlak aan de drokke verkeersweg vonden. We verzoamelden veren en schedeltjes van vogels en zoogdieren, dat dizze paste der goed bij.
Veul dieren ken je t beste zien as t leven der uut is.
Denkelek was omgeveng vol van vozzen, want t was der van vallen vergeven.
Ien Gdansk kwam k dit bret tegen ien n park hoe om te goan met honden. "PSAvoir Vivre". Ienspireerd deur de fraanse uutdrukkeng "savoir vivre". Psa is òfleid van t woord psy dat hond betekent (vierde noamval of akkusatief, om zo te zeggen).
Mooie verbiendeng leid.
.jpeg)
Noast heur eigen toal, hemmen ze ok n eigen menier om automobilisten te bedanken veur rusteg rieden en denken om fietsers.
k Begriep wel dat dit niet genderbestendeg is, mor k vond t mooi geboar om zo de hoed van vroeger te bruken veur moderne automobilist.
Noa tientallen joaren weerom naar Erfurt. Wis ik veul dat dizze stad meer as tweehonderd duzend ienwoners had. Binnenstad is riek aan olle kerken. Hoge dom toornt boven ales uut.
Vermeldensweerd is dat, noadat Bonefoatius vroeg aan zien enne kwam ien contreien van Dokkum, et bisdom Erfurt toevoegd wer aan et bisdom Mainz. Doarmet was Erfurt heur onòfhankeleke positie kwiet.
.jpeg)
Oeit was der n brede stroom, nou kabbelt der n stroomke deur de stad. Je kennen der bij warm weer mooi deurhin lopen, veur òfkoeleng.
.jpeg)
Stad is opkalefoaterd en doarmet goed opfleurd. Zoveul mooie olle huzen, overal pleinen, terrassen, restaurants.
.jpeg)
Ien dizze contreien wordt ok Sorbisch sproken. t Het wat weg van Pools en Tsjechisch.
