Knoflookpad - Drentse poëzie in Schaangedennen

t Was n belangrieke dag guster, doar ien Schaangedennen, even boven Valthe bie Emmen. De twee heren gedipputeerde Emmens en wetholder van Börger-Oring (Borger-Odoorn) hemmen n bret met ienformoatie onthuld ien t noatuurgebied Schaangedennen. t Is leefgebied van de zeldzoame knoflookpad.  

Dichter Gerrit Boer het over de knoflookpad n gedicht ien t Drents schreven. De stille liefde van een knoflookpad (klok klok). t Is mooi worden. 

t Gebied is ienricht ien opdracht van Pervincie Drenthe en uutvoerd deur Prolander, en vedders warren der n hule trits organisoaties die met doan hemmen. Huus van de Taol te Beilen het zörgd veur n dichter om n mooi gedicht òf te levern. Zo het Drenthe weer n Drents gedicht ien e publieke ruumte derbij.  

Der valt veul te zeggen over t amfibiebeestje, ienrichting, over t gedicht, de noatuur, de dikke balflinten en zuks wat meer. Kiek doarveur mor vedder op internet. 

 

Grauwe gaanzenust

Dit nust is van e graauwe gaans. De gaans is even vot. 

Vief eier wachten op uutkomst, mor dan moet moeke nog wel even zitten. Eier wachten wel. Zun schient warm, rijten hollen kolle wiend vot. 

 

Platt-Düütske oavend ien Emden met literatuur en muziek

Sabine Santjer. Foto: Jens Doden

Der Johann Friedrich Dirks 2026 pries veur platduutse literatuur en muziek is weer uutriekt. Ien Emden ien t "Festspielhaus am Wall" werden de winners bekend moakt van de wedstried met t motto „So sünnerbaar mien Harte sleit“ - ofwel: Zo bizunder hoe mien haart slagt".

Muziek wer verzörgd deur de winneres Sabine Santjer (foto: Jens Doden). Webstek Sabine

Priesgeld wer opbrocht deur n ienternationoal bedrief Dirks Group uut Emden. t Ís bizunder hoe n groot bedrief hum ienzet veur regionoale zoaken. Banken en bedrieven ien Nederland die ienternationoal opereren t oog meer richt op landeleke sportteams, mor regionoal en lokoal heuren je die weineg.

Opperburgemeester Tim Kruithoff van Stad Emden sprak ok mooi plattduuts. 

Tweede Leven - Gedicht over Metamorfose - Are Meijer

Are Meijer, dicht ien t Westerkertiers, het de tweede plak kregen bij de wedstried Metamorfose van de Bibliothekennetwerk Westerkwartier. t Gedicht TWEEDE LEVEN het n mooie ontwikkeleng en is prachteg uutwaarkt met t themoa Metamorfose. 

Der bennen veul dichtwedstrieden holden over Metamorfose, mor der bennen niet zo veul gedichten woarien de verandereng zo toepasselk is. De metamorfose van de persoon wordt kracht bij zet deur de nije generoatie.  Hartstikke mooi doan.

Old Drenthe - het olde lant

Dizze week mos k zo mor even noar Deurze. Op e fiets vanòf station Assen. Noatuurlek t is aalmoal nog niet zo groen, mor toch. Over n old zaandpad (zandpadtie) (ien Grunnengen zollen we ree zegggen). 

k Was der even, mor t het veul iendruk moakt. Mien opa ging vroeger n poar moal ien t joar noar Drenthe. Drenthe was n aander laand veur hum. Zo aans. Het olde lant - Drenthe was zo mooi. 

Lest vroeg k mien vrouw noar n vekaansie 4-5 joar leden ien Frankriek. Wat nou veul iendruk moakt har? En dat was doar op t plattelaand ien Bourgondië, n olle ree vanòf de boerderij t laand ien met hoge hegen en tussendeur zo nou en dan dam met vee derachter op t laand. 

Klauwier vloog aldeur n poar boskes vedder. 

  

Multi-lingo ienstalloatie (2) - liggoamstoal met body pain t

Dizze òfbeeldeng geft dudelek weer wat n val met n mins doen ken.

Column Meander Magazine - Lachen en dat wat onuitgesproken blijft

Lachen en wat onuitgesproken blijft. Een nieuwe column over humor en poëzie (tekening van Ada Oostenbrink). 

Deze keer een bijdrage in het Nederlands in het digitale tijdschrift voor poëzie Meander Magazine.  

Lachen en dat wat onuitgesproken blijft. Column Meander januari 2026.

Zunneg weer - klein hoefblad en n leeg nust bij Tarjat

Mooie bloemkes ien veurjoarszun. Klein hoefblad. 

Mor t is nog slim nat. n Leeg nust, of t begun van n nust van n kiewiet. t Het nog even tied neudeg.

Westerhörnermeulen tussen t spoor en de Goarkeuken stijt der mooi op. t Wotter hiet: Tarjat. 

Dat stijt schane genog verkeerd op koarten van kadaster. Summege fouten worden noeit hersteld. k Goa fout niet herhoalen, dan gefst aan websites weer aanleideng om de fout te vermenegvuldegen en dan komt uuteindelieks democroatisch noar veuren dat foute schriefwieze goed wezen zol, om reden dat et ien e meerderheid is en voaker veur komt. 

Oké, lang verhoal kört, t is nog nat. 

Multi-lingo ienstalloatie (1) Pain

Op e grins van Vloanderen en Wallonië heur je verscheidene toalen deurnkander of achternkander aan. Vloams/Nederlaands, Waals/Frans, Engels, Duuts. En dan roak k wel ns ien e war. Of der kommen nije ideeën op. 

Ien t roamwaark van multi-lingo ienstalloatie is de titel van dizze òfbeeldeng: Pain. 

Misschien dat et eiglieks ok "De Pain" hieten ken... Mor joa, je kennen niet ales toegelieks.

t Woord komt ien t Engels en ien t Frans veur; self-explanatory - selbsterklärend - sprekt veur hum zulf - parle de lui-même, zol k zeggen.    

Ien Wallonië zeggen ze traauwens niet "quatre vingt" veur tachteg, mor huitante. Die logikoa is te volgen.   

Maretak ien fruitboom

Ien Limburg (België) is vruchtboare grond. Der bennen veul bongerds met fruitbomen. En der bennen ok veul bomen met maretakken. Dizze boom liekt nog beheurlek jong, 3-4 joar leden plant. En nou aal zukse dikke bossen van maretak. Woar moet dat hin?

Der bennen ien ok veul ollere bomen. Die hemmen heur aanpast aan de wiend die der kennelek geregeld waait. 

Deurkiek kerk - Belgisch Limburg

Apad gebaauw. Kunstproject van 10 m hoog met n deurzichteg kerkje - van architect Gijs van Vaerenbergh. t Kerkje stijt ien Belgisch Limburg, niet ver vanòf Tongeren-Borgloon. 

Je kennen der huulmoal deurhin kieken. En summege bezoekers goan t dak op. 

Bizunder kantoor ien Luik / Liège

Dizze kantoorruumte, n pand ien n winkelstroat, trok mien aandacht. Wat was dit nou? n Bureau ien e midden van n koamer,  bureaustoel, wat computerscherms, en dan A4-tjes, op e grond, aan e waand. 

Bizunder was t aal. As je dichterbij kwamen, verscheen-je deur de camera's die der hongen, ien beeld op t scherm. 

Wat valt der vedders van te zeggen? O ja, der hong n briefke bij de deur: 31 / 3. Dus warschienlek ken je tot t enne van meert dit kantoor bezichtegen. Ien Luik. 

Iezel en deur t glas zien met dun ies

t Vrust niet meer, of zowat niet meer. Verleden week was der nog iezel. Was et dunderdag, of n dag of wat eerder, dinsdag, woensdag. Iezel was der en zo was et aal weer vot.

4 feberwoarie, woensdagmörgen was et. En rond 14.00 uur was et vot. Ies op stroat begon te glinsteren, schitteren. t Kiend op scheuvels was aal lang weer vot. 

Hoe snel goan doagen, dat je de tied zo gaauw kwiet bennen. Summege doagen blieven om noeit te vergeten. Aandere doagen hemmen je noeit ontholden. Doar tussenien zit sums n dag die wat langer hangen blift. 

 

n Mooie Gedichtoavend ien de Rode Loper - Liwarden

t Is aal weer n schoftke leden, Vriese Gedichtenoavend, Fryske Gedichtenjûn op 30 jannewoarie ien de Rode Loper te Liwarden. Tussen alle dichters deur was der n optreden van zangeres Mayte. Wat n mooie stem, docht ik (k har gien mooie foto, doarom van t filmke op youtube). Ze is te beluustern op internet. Mayte - Wyt Ljocht.  

Oavend was organiseerd deur schrievers- en dichtersorganisoatie Ensafh. 

Minsen zatten ien n kas ien t gebaauw. Verwarmengslampen boven e kop. Novvelk. 

Dichter/fotograaf Geart Tigchelaer moek de foto's van die oavend. De veurdracht van t gedicht Boas wezen. Ales ien zwart-wit. Schier. 

Meerkoet aan t abbel eten

Dizze meerkoet liekt wat nijs neudeg te hemmen. Veur de vogel zel dat wat nijs west hemmen. 

Veur mij was t ok n nij beeld. Meerkoet met abbel. 

Wel wiet, zet dizze meerkoet de toon, n nije trend. k Zel wat voaker n klokhuus met vruchtvlees ien t wotter gooien. ns Kieken wat of et worden zel. 

Vriese gedichtenoavend ien Liwarden - Fryske Gedichtenjûn yn Ljouwert

Oavend met gedichten ien allerhande toalen. Liwarden, t begunt om 19.30 uur. 

De Rode Loper boekpassaazje St Jacobstroat 32. 

 

Column - Humor in de poëzie

Deze blog verwijst naar een column in het Nederlands over humor en poëzie. Column in Meander Magazine - Humor en poëzie, die ik geschreven heb.  

Humor moet je niet uitleggen, wordt wel gezegd. Ik zou niet weten waarom niet. Deze column gaat over de rol en plek van humor poëzie. Hoe werkt humor in gedichten?  

Der is n nije column van mij ploatst over Humor en Poëzie. Tekst stijt ien t digitoale dichtblad Meandermagazine. Column in Meander Magazine - Humor en poëzie. 

Eenden op veziede

Lest toen der veul snij vallen was, kwammen eenden uut t wotter noar de perken. En waarom zitten ze ommeroak te pikken ien t gras en de snij?

t Antwoord is te zien veur de boomstam aan de erk, die krekt opvlugt. Ien zien snoavel het der ekkel. 

Eerder dizze winter harren we eenden ok al op veziede. As der ies op t wotter leit en grond is hard, kennen eenden niet genog te vreten kriegen.   

Toen viel deu ien. t Leek dat met e deu eenden nije iengeveng kregen. Ekkels as vogelvoer. 

Ze trekken heur naargens wat van aan. As eenden mor genog honger hemmen, bennen eenden verzot op ekkels. Ekkels ok n lekkernij.

Schoapen soamen

Schoapen ien n widde wereld. 

Snij moakt wereld klein.  

Wachtend tot dooi ienvalt.

Luchten aan t Hoendiep veurspellen kolle. 

Winterweer

t Enne van e dag is ien t zicht en verdwient ien duusternis. Vogel nemt òfscheid van zien spiegelbeeld.

Boom tooid ien snij wacht op e oavend.

t Is stil op Briltil. Hoendiep nuigt minsen ien binnen te goan. t Ies en snij zoeken heur n weg noar t kenoal. 

Veul heil en zegen ien t nijjoar

Veul heil en zegen ien t nijjoar. 

Elkneen n mooi en betekenisvol 2026 toewinst. 

Zo hemmen we ien korte tied ies, snij en hoagel had. Zun let hum ok zien. Dat geft schier weer. 

De twee dikke iepen hierboven stoan aan e oostkaant van e spoortunnel bij Zuudhörn. 

Dizze òfbeeldeng geft uutzicht op t zuden bij Zuudhörn. Tegenswoordeg wordt de weg met popelieren Zuderweg noemd. Veur de oorlog het mien opa boer west an de Zuderweg, toen de streek t Zuden noemd wer. Hij was Willem de Boer van t Zuden om reden dat der twee W. de Boers warren.