zondag 18 april 2021

t Joar van de Oksters

Vogelorganisoatsies roepen veur elk joar n vogelsoort van t joar uut. As k internet der op noalees, is t zowat n huul koor aan vogels ien een joar. Sovon, Vogelbescherming, n Belgische club, elke organisoatsie, wiet weer n aandere soort tot "Vogel van het jaar" te verheffen. En de merel krigt zulfs twee joar de tied. 

Hier wordt et lokoal warschienlek t Joar van de Okster - ekster.

De nusten die leste moand baauwd bennen, wiezen op grote uutbreideng. Misschien dat allenneg femilieleden van de oksters noamelek de roeken nog sneller uutbreiden. Westerkertierder kraant het meldeng moakt van nije kolonies. Roeken (gien zwarte kraaien) moaken der wel n gezellege boel van (veur heurzulf), want ze zitten bij nkander ien koppels van 5-20 spantjes staark. Doar kennen ze met de nijbaauw ien d'Oostergast niet tegen op. 

 

 


dinsdag 13 april 2021

Omhelzeng ien t park

Lest liep k deur t park en weer zag k doar zo mor n poar bomen die me eerder niet opvallen warren. Ze stonden doar zo inneg. t Leek veul op n omhelzeng.

k Mos denken aan n schilderij de Kus van de Oostenriekse schilder Gustav Klimt. Misschien wat ver zocht of vonden, mor goed. Ik zol zeggen, kiek mor even. 

zondag 11 april 2021

Gruto-eier vienden met de moffen aan

t Is kold weer. Op t perron smörgensvroeg zien je ien e wintermoanden allenneg minsen boven 45 joar met n muts op. Jonge minsen tot 35/40 joar hemmen host noeit mutsen op. Zo bennen ze niet groot brocht. En noatuurlek hemmen jonge minsen  de enkels bloot. Dat stijt kennelek ok goed, aldus de mode sinds drie joar. Mor k was bliede da'k met dit weer n muts op hemmen kon. En de moffen aan. 

Noordewiend is venieneg kold. Mor vogels loaten heur niet tegenholden. Guster vond k d'eerste gruto-eier. n Tweetje ien Kollumerlaand. 

t Lag ien n plasdras-gebied. Kiewietsnusten warren der ok volop. Voak liggen de nusten dicht bij t wotter, sums op n verhogeng van wat modder. 

Op n eilandje ien t wotter perberen kiewieten heur te weren tegen iendringers en eier-rovers. Over n week stoan eerste eier al op uutkommen. t Is te hopen dat t weer wat bijtrekt, aans goan piekjes n zwoare tied tegemoet.