Knoflookpad - Drentse poëzie ien Schaangedennen

t Was n belangrieke dag guster, doar ien Schaangedennen, even boven Valthe bie Emmen. De twee heren gedipputeerde Emmens en wetholder van Börger-Oring (Borger-Odoorn) hemmen n bret met ienformoatie onthuld ien t noatuurgebied Schaangedennen. t Is leefgebied van de zeldzoame knoflookpad.  

Dichter Gerrit Boer het over de knoflookpad n gedicht ien t Drents schreven. De stille liefde van een knoflookpad (klok klok). t Is mooi worden. 

t Gebied is ienricht ien opdracht van Pervincie Drenthe en uutvoerd deur Prolander, en vedders warren der n hule trits organisoaties die met doan hemmen. Huus van de Taol te Beilen het zörgd veur n dichter om n mooi gedicht òf te levern. Zo het Drenthe weer n Drents gedicht ien e publieke ruumte derbij.  

Der valt veul te zeggen over t amfibiebeestje, ienrichting, de noatuur, de dikke balflinten en zuks wat meer. Kiek doarveur mor vedder op internet. 

 

Taorl ien Drenthe

 Dit bret stijt ien Drenthe ien t dörpke Taorl. Logisch zollen je denken. Want et hiet ok zo. 

Ien noavolgeng van Fryslân het Drent nou al verscheidene bredden met noamen ien t Drents. Me dunkt verstandeg. Woarom?

Omdat veural minsen die der gien verstaand van hemmen allerlei nije vervoegengs en uutgangen bedocht hemmen veur Drentse plakken, diepkes en wegen. t Is ien wezen een grode bende ien toallaand wat Drentse plakken en benoamengs angijt. 

Misschien dat t Drentse Huus van de Taol hier road wiet. 

n Poar veurbeelden:

• Der is aargenswoar ien t noorden van Drenthe n Assense weg/stroat, ien plak van Asser weg/stroat.
• Joarmaart van Roon hiet gien Roner maart meer.
• Dwingeloo (ien t Drents Dwingel) het n Veld dat hiet Dwingelerveld. k Was verbiesterd toen ik ien t noorden te waarken kwam en vernam dat der 'd' ien zat. Wel dat bedocht het!
  Ik goa t verkeerde woord hier ok niet voluut schrieven. Dan kommen der ok nog minsen die met google noagoan hoe voak of iets bruukt wordt en kommen ze tot de slotsom dat et wel weerde hemmen moet, om reden da't zoveul bruukt wordt. Der bennen huul wat verkeerde zoaken die mor wat veul noavolgeng kriegen.  
• Ien noavolgeng van dizze onkunde, las k n haalf joar terug ien Emmen en omstreken, dat gemeente op zoek was noar noar Emmense coördinator, of zuks wat. Woarom gien 'Emmer' meer? Dat geëmmer met die -se uutgang, is stoer te keren. Nijmoodse fratsen van media, recloame, en toalonkundegen zellen kennelek de Nedersaksen en Fryske luu wel even leren, hoe of dat et wezen moet.  Zo he'k ok regelmoateg 'Leeuwardense' ien plak van 'Leeuwarder' lezen. Wat is hier loos, denk je dan? 

En zo kommen we met de onweerstoanboare eigenwiezegheid van Nederlaandse spelleng en neerlandistische deskundegen niet uut op Tarelse diep. Nee, het is Taarlo ien t Nederlaands en dus wordt t diepke t Taarloosche diep. 

k Heb me vertellen loaten dat een regio-deskundige bedocht het dat de 'ch' weer terug mos ien de noam, krekt as bij Drenthe de 'h' en Drentsche de 'ch'. 

Kiek tegen zuks wat, helpt ok gien Haarlemmer eulie meer. Ien Haarlem en omstreken hemmen ze ok al t bijvoeglek noamwoord ombatterijd noar "Haarlemse burgers". Proaten ze doar nou van Hooghoarlemse dieks? 

Om gedachten wat tot rust te brengen, he'k wat over peerse velden zwurven. De heide ston ien blui. Doar heurde k de stem van mien moe proaten over heidestruken en dat ze zo stommegroag wat heide takjes thuus hemmen wol. 

De heidevelden, de peerse vlaktes, doar ze ien heur jeugd noar toeging tiedens femiliebezoek ien Drenthe. De uutstrekte velden met kleuren die je kop tollen deed. Ze warren der weer. 

Optreden ien Noord-Sleen 10 meert

 Aankommende zundag organiseert Huus van de Taol weer Taal an Toafel - dizkeer ien Noord-Sleen.  

Postcode Noord-Sleen - Postcodeadresboek.nl (postcode-adresboek.nl)

Huus van de Taol schrift: 

Taal an Taofel

Op zundag 10 meert kuj anschoeven bij Taal an Taofel in Noord-Slien. Een combinatie van schrieverij, zang, meziek en lekker eten. Het programma bestiet altied oet optredens van streektaolige schrievers en zangers. Dizze zundag treedt Willem Tjebbe Oostenbrink en Jessica Bonnema op en verzörgt John en Nienke de meziek.

Tied: 11-14 uur

Entree: €20 (inclusief koffie/thee en warme maoltied)

Risserveren kan via Reina Zwiers: 0627518101 of reina.zwiers@planet.nl

Uutkomst - nije bundel met gedichten

De nije dichtbundel Uutkomst is kloar! 

Uutkomst is de daarde bundel met Grunneger poëzie uut t Westerkertier. 55 gedichten schreven ien t Westerkertiers. De veurkant is moakt deur Ada Katerina Oostenbrink. 

t Oog wil werkelekheid vastleggen, verbeeldeng schept en danst dermet. We zoeken ien onszulf noar de kern, allenneg aan d'oppervlakte kennen we stroalen. 

Bundelprissentoatsie is 9 februoari 2024 om 19.30 uur ien t gebaauw van Huus van de Taol, Raadhuisstraat 1, 9411 BN Beilen. Aanmelden ken via de link: Aanmelden veur 9 februoari

Met dank veur ondersteuneng bij de totstaandkommeng van Huus van de Taol Drenthe ien Beilen.

Dichter Suze Sanders met Drents gedicht ien de Branden - Hunze

Òflopen moandagoavend is der n bret ien de Branden onthuld met ienformoatsie over de omgeveng en n gedicht ien t Drents.

Dichter Suze Sanders het t gedicht schreven en het bij de òfsluteng van t noatuurontwikkelengsprojekt t gedicht veurdroagen.

t Is n schier en passend gedicht worden. 

 Plak en tekst vallen soamen.