Nust bouwen - moatwaark bij plasdras

Zo veul vogels, zo veul nusten. Niet allenneg tussen soorten, veural binnen soort. Dizze kluut het t nust ien n pol russen.

Dizze kluut het n kunstmoatege ophogeng bedocht. Stukjes mis, stro, en opdreugde stront geft n eenvörmeg geheel. 

t Leste spantje het wat stro en dooie grasspieren vonden. Zo het elk zien eigen aanpak. 

t Wotter blift altied dichtbij. As beschermeng en sums as bedreigeng as der veul regen valt. t Ken verkeren.

Plasdras geft plak aan kiewieten, grutto's, tureluurs. Der is voedsel en onderkommen veur weidevogels, kluten ok mor even metrekend. 
 

 

Grauwe gaanzenust

Dit nust is van e graauwe gaans. De gaans is even vot. 

Vief eier wachten op uutkomst, mor dan moet moeke nog wel even zitten. Eier wachten wel. Zun schient warm, rijten hollen kolle wiend vot. 

 

Bosrietzanger ien brannekkels

Dit het wel wat weg van n karrekiet. 

Tekeneng van eikes, gespikkeld, met bruneg, oliefkleurege vlekken. Allenneg zit dit nust niet ien e rijten, mor ien e brannekkels. Ondergrond van eikes is ok lichtblaauweg en gien bruneg, as bij karrekiet. 

Source: wikimedia Аимаина хикари

 t Nustje is van de Bosrietzanger (Letien: Acrocephalus palustris). t Bizundere is, dat t nustje verscholen zit onder t blad van jonge branekkels. Mor t nustje is vlochten aan  olle brannekkelsstangen van verleden joar. Meer ienformoatsie over t vogeltje: op wikipedia. 

Met dat branekkels groder worden, wordt t nustje meer aan t oog onttrokken. Branekkels schieten de lucht ien, t nustje blift op zulfde hoogte. Wel bizunder baauwbeleid. 

Prachteg weer veur vogels

Vandoag was t prachteg weer. Even voelde k mij weer kiend dat uut schoeltied deur t graslaand liep op zoek noar vogelnusten. 

Rondom plasdras is der van ales te zien. Dit grutonust bevat vier eier, mor een is ien kleinere uutvoereng. 

Graslaand rondom plasdras met veul kruden en weineg bemesteng moakt begroeiing schroaler en t blift koaler. Pitrussen kommen opzetten ien natte stukken. 

Tureluurs perberen heur aan te passen en vienden nije nustgelegenheid. Een nij onderkommen veur de tureluurs. Gien dichte graspol of hoge kruden, die eier aan t oog onttrekken. Midden ien n pitruspol leggen de tureluureier. 

De dikke spieren van de pitrus geven mor weineg met, dat t nust is wat langwerpeg.

Putter

Dit vogeltje zie k zou nou en dan. Leste keer ien n museum ien Proag. Nationoal museum met n grode òfdelengs veur mineroalen, meteorieten enz. Bij de dierenòfdeleng warren veul vogels. Ok dizze putter. n Aandere noam is distelvink.

n Moand leden zag k op n wandeleng n bizunder nust ien n sleedoorn. t Was dudelek van n vink. Mor welke. Noavroag leverde de putter op (Letien: Carduelis carduelis; Duuts: Stieglitz; Engels: Goldfinch)

 

t Nust zigt der bizunder uut: steveg van bouw, n dikke raand van wol en mos. Vervlechten van t materioal wiest op vakvraauwschap, want t wiefke baauwt t nustje.

Ien t nust laggen doppen, kepotte eikes. t Het niet wezen magd, met dit nust. Der bennen zoveul zoaken die met speulen. Min weer, te hiet weer. Roofvogels, aandere dieren die t op eikes munt hemmen.

t Is altied weer òfwachten. En gien mins die t wiet woarom d'eikes van t ene nust aal en van t aandere nust niet.

Agroarisch noatuurbeheer hoalt de zee met kokmiwen aan.

 Dit is misschien n wat vremde titel, mor t liekt onderhaand wel zo. 

Allerhande moatregelen veur weidevogels hemmen as gevolg dat zeevogels heur meer en meer thuus voelen. 

En ze leggen heur eier ien soorten en moaten. Eier verschillen staark ien kleur en vörm.

De vogels doar t om gijt: kokmiwen. Ze broeden ien Kollumerlaand, toch wel oardeg endje van e zee òf.

Ze zitten doar met zeuven poarkes te broeden op n eilaandje. Kluten bennen ien e minderheid: mor drie nusten. En dat hiet dan Agroaries Noatuurbeheer. 

Mor goed, ze helpen aal met bij t verdedigen van eier en jongen - van kiewiet, tureluur en gruto - tegen iendringers as kraaien en buizerds. 

Broedeilaand met nije bewoners

Eerder he'k schreven over t eilaand van schelpen. Der zitten veul kluten te broeden. Leste weken is et der nog drokker worden. Op t eilaand zitten ok visdiefkes en kleine plevieren te broeden.

Visdiefkes hemmen t eilaand ontdekt!

 Picture from Detillybert - Pixabay.

Nusten van visdiefkes stellen niet zo veul veur. 

 D'eier leggen op e schelpen.Twee, drie stuks per nust. 

Dat is t. En toch bennen eier makkelek op t hoofd te zien. 

 

Jonge kluten

 Meimoand is veurbij. Klute-eier bennen uutkommen.

 

Kluten hemmen der mor drok met.

Jongen goan van t nust uut ei, drekst t wotter ien. 

Soamen uut: moeke woadt deur t wotter, jongen zwemmen. 

Dan even zitten - op t wotter, jongen onder de vleugels.

Hoog wotter aanpassengen - Scholekster (3)

Zun schient mooi en dat helpt bij òfdreugen van t laand. t Wotter zakt zachjes-an wat vot. 

Dizze scholekster hierboven dut niet an trends en gijt heur eigen gang. Boven ien top van n olde knotwilg is krekt genog ruumte veur d'eier. n Mooi gezicht. 

Scholeksters hemmen nije methoden veur goeie broedplakken vonden. Wel denkt dat scholekster gien mooie nusten baauwen kennen, het et mis. Der bennen exemploaren onder de scholeksters die echt wat kennen, meer as allenneg n kuultje moaken tussen de kleikluten. 

Dit is zuks n mooi nust. As der zeevogels overvlogen, zol je denken dat zij eigenoaren warren. Dizze scholeksters hemmen heur best doan, prachteg!

n Aandere vogel het de oplösseng zocht, op n nije lokoatsie. Voak is t groenlaand aan de slootskaant dreuger as ien e midden. Dat komt, regenwotter an e randen van t laand, ken drekst votlopen ien e sloot. Dizze mirreg zag k twee scholeksterpoaren, die tegen de sloot aan, heur nust harren. Nog noeit eerder zien. Misschien toch zo mor n nije trend.

 

Hoog wotter ien t groenlaand - de Gruto (2)

t Is nat ien t laand. Mooi dat de zun schient. Doar warren we wel aan toe. Mor hoe zun ok schienen zel, t blift ok nog wel even nat. Elke stap ien t laand, klinkt as t lopen deur n plas.

Veur grutoos (Limosa limosa) met eier is dat wel n probleem. Zo nat as t is! Hoe ken je eier uutbroeden as ze ien t wotter leggen?

Vrijdagmirreg 28 mei trof ik n bizunder nust aan. 

Om de eier dreug te holden, harren grutoos de bodem van t nust drasties ophoogd. t Verschil tussen t de grond (links) en de bodem van t nust (rechts) is wel 10 cm.

Der laggen twee eier mooi dreug op de verhoogde bodem.

Ien of onder de verhoogde bodem van t gras lag n darde ei. Dat het kennelek niet metkommen kend tiedens de verbaauweng.

Hoog wotter ien t laand - de kluut (1)

Dizze moand is t uutzunderlek nat. Zo sjompeg as t laand is. Lucht wordt tussen grasspieren weerspiegeld.

Vogels hemmen et der stoer met.

Nusten worden sums ophoogd, as der genog baauwmateriaal is. 

Sums ok niet. Kluten verliezen heur eier deur de hoge wotterstaand op plasdras laand.

 k Heb perbeerd n nust wat op te hogen, aans moeten kluten de hule plas opwarmen.