Meert roert zien steert. En toen was der zo mor snij, dunnerdagmörgen.
Kopkes van narcissen gingen aals mor leger hangen.
Noa uren snijval was an t enne van de mirreg wel aans. Narcissen hemmen t opgeven, teminten zo lang de snij der leit.
Narcissen hemmen et der mor met te stellen. Mor eiglieks verwacht k dat ze de kopkes nog weer oprichten zellen, mor wis ben k niet.
Der is uutbreideng kommen van t etersgezelschap ien t park ien Zuudhörn. n Tweede Hooglander het n kaalfke kregen.
Hooglanders hemmem gien kerstbomen meer. Nou bennen ze overstapt op aander groen. Ien dit geval gijt et om blad an struken. Ale bloadern van de brommelstruken bennen zo wat verdwenen. k Wiet niet hoeveul stiekels et beest ien t gehemelte zitten het. Misschien hemmen Hooglanders eelt ien e keel.
Dizze koe liekt brandholtmoager, mor ja, t beest moet ok nog melk geven veur t kaalfke.
Oktober is rojoal met mooie doagen. Zoveul zun dut n mins goed.
t Is nat ien t laand. Mooi dat de zun schient. Doar warren we wel aan toe. Mor hoe zun ok schienen zel, t blift ok nog wel even nat. Elke stap ien t laand, klinkt as t lopen deur n plas.
Veur grutoos (Limosa limosa) met eier is dat wel n probleem. Zo nat as t is! Hoe ken je eier uutbroeden as ze ien t wotter leggen?
