Oavend ien Muntjeziel

t Schoftke leden was ik ien Muntjeziel. Muntjeziel is n dörp op de grins van Vrieslaand en Grunnengen, krekt an westkaant van t rivier de Lauwers. Doar trof k dit bret op e muur met "De Weem". 

Weem is t Grunneger of breder t Nedersaksische woord veur pastorie. Vroeger was t onderdeel van kerkeleke gebaauwen. Aandere woorden bruukt bennen: weme, wheem, wheeme. Ien Grunnengen en Drenthe bennen verscheidene wemen te vienden (beveurbeeld Westeremden).

Kennelek het Muntjeziel toch wel wat Grunneger woddels. 

t Het slim nat west, en ondertussen liekt het al weer zo.

Dizze duukòfsluteng is niet meer ien funktie. En hoe nat t ok wordt, t zel die funktie ok niet meer kriegen. 

Op t kerkhof stonden bij alle groaven nog iesdern nummerpoaltjes. Dat zigst niet overal meer. 

Muntjeziel en Muntsjesyl en Munnekezijl

Der bennen dörpen ien Grunnengen doar wordt Vries sproken. Luu proaten Grunnegs, Westerkertiers en Vries/Frysk. t Bennen dörpen as de Wilp, Moarum, Visvliet, Opende. Zo bennen der ok dörpen ien Vrieslaand doar je Frysk en varianten van t Westerkertiers heuren kennen. 

Muntjeziel is zuks n dörp. Hierboven n doek hoe Muntjezielsters en Muntsjesylsters heur prissenteren - Muntje Buiten. Der bennen meer dörpen met lokoale varianten: Gerkeskloosters, Kollumers, Boerummers, voak n mengeling van Vries en Grunnegs. 

Nou hemmen ze ien Noard-East Fryslân docht: "It Frysk moat foarop". En zo bennen der nije bredden kommen. Ruumte veur it Frysk en Nederlaands. En toen was der gien ruumte veur Muntjeziel. 

Et voelt wat aan as t herschrieven van de Muntjezielsters geschiedenis. Dat valt mij wat òf van Noardeast Fryslân. Altied ien e bres veur minderheden. En nou ruumte opeisen veur eigen toal - en uut t oog verliezen woar n aander verlet van het - zo mor identiteit van n aander met voeten treden. 

t Onevenwichteg gebruuk van t Frysk het wat weg van n toalzuvereng. Me dunkt, dat kon toch wel wat aans ien e 21ste iw.

k Ree deur noar de Kollumerwoard oostkaant Muntjeziel. Doar is n proefboerderij met drie vlaggestokken. Wiend speulde met de Nederlaandse en Grunneger vlag. "Fryske flagge" dee niet met. t Was krekt of de vlag heur schuldeg voelde.