Hulp bij uutkomst

t Is zo dudelek as wat. Noa 21 doagen broeden bennen eier uut. Niet uutkommen eier bennen gel. Mor wat as je heuren dat der toch nog n piekje ien n ei zit, woarom zo loat? Was et t kolde weer van de leste weken? Of, was et de kloek, die onregelmoateg op e eier zat?

Kom der nou toch uut, denk je dan, t is al dag 22. k Ken dij ok wat helpen. Noadat ik n gatje moakt har an e pool met luchtkoamer, brak ik nog n poar stukjes van e dop òf. Zo, nou kon t piekje al noar buten kieken. Was d'eierschoal hard, was t kukentje niet staark genog? Hoe t ok zij, t beestje kroop toch uut t ei. 

Mor der komt n tied dat t dierke ok zulf de reis annemmen moet. Op e poten stoan, is n veurnoam ding om veuruut te kommen ien t leven. Aans red je et niet. Toe dan toch, dien broerke/zuske wacht op dij!

Toch is t niet belukt. Woarom d'een aal en d'aander niet?, wel zel t zeggen. 

Misschien is t de noatuur. 

Aanboden hulp het niet altied zin. n Grunneger spreuk zeit: Aanboden diensten worden niet eerd! En zo gijt et voak ien t leven. Minsen die hulp neudeg hemmen, zellen et allenneg waarderen as ze der zulf om vroagen. Lös van wat n helper aalmoal zigt wat der neudeg wezen mag. Misschien is dat ok wel t löt van e helper: Helpers hemmen zo veul hulp te bieden, mor ze kennen gien uutkomst geven.

t Aander piekje bedappert heur/hum ien t piekehok met grote pieken. t Gijt goed. Noa zeuven doagen het t beestje al veren an e vleugels.

Prijs de Poëzie - gedicht bij de laatste 100

Vandaag was de bekendmaking van de top 3 van Prijs de Poëzie 2020. 

Mijn gedicht   Welkom in Nederlands  is in de serie van 100 beste gedichten van de nationale gedichtenwedstrijd terecht gekomen. . 

Hoor hier het gedicht: Welkom in Nederlands

Dit was het resultaat van een grote voorselectie. n Maand terug was mijn gedicht uit ruim 7.000 ingezonden gedichten geselecteerd voor de laatste 1.000 gedichten. 

   t Kon minder.

Oalscholvers en wotterpiekjes bij winterdag

 Bij winterweer - wel denkt doar nog an, 10 doagen leden harren we snij en ies - worden vogels altied makker. Sums liekt et veur even, mor ik vroag me wel ns òf, of et niet veur veul langere tied is. Leste joaren bennen oalscholvers an t Hoendiep rusteg van dichtbij te zien, zunder dat ze votvliegen.

De winter geft de vogels n zetje om an grinzen op te schuven. 

Vogels vernemmen dat minselek gezelschap op 3-4 meter òfstaand ok veurdelen hemmen ken.

Zoveul vogels bij t wak as der zo nou en dan voerd wordt. Eenden, meerkoeten en wotterpiekjes.

Lesten bennen ien e meerderheid.

Hercules aan de Sarabos

t Scheuveln brengt n mins op plekken doar je gewoonlieks niet kommen. En dan zien je ok bizundere dingen. De Lauwers op scheuvels blift n mooie rit.

Hercules is de letiense noam veur de Griekse held Herakles. De noamen bennen veur veul zoaken en personen bruukt. Vliegtugen, voetbalclub, tanks, motoren, filmhelden, stripfiguren. Hij was de held, die met n kombinoatsie van kracht en slimheid grode doaden verrichten kon. Hercules was de zeun van oppergod Zeus en n prinses en doarmet halfgod. Mor t verhoal over Hercules - te lang om hier te beschrieven - gijt zo dat er noa zien dood toch onstaarfelek wer. 

Kieken we uut over t laandschap van Grunnengen en Vrieslaand aan de Sarabos bij Stroobos dan zien we doar de grode Hercules met zien machteg rad met wieken hoog boven scheuvelrieders en dieren uutstiegen. 

n Meulen om tegen op te kieken.

 

Vrij-vers ien t Duuts vertoald: Freier-Vers

n Tiedje terug het DAS GEDICHT t gedicht Vrij vers ien t Westerkertiers en ien t Duuts publiceerd ien de joarliekse bloemlezeng. t Is n mooi boekwerk worden van DAS GEDICHT van Anton G. Leitner Verlag

t Is altied oardeg om te kieken hoe of dat dan ien t Duuts overkomt. Hieronder n stuk tekst met d'eerste regels.

 

En dan de Duutse versie. 

 

Tweede pries veur gedicht bij Appeldag Gelselaar

Zotterdag 10 oktober was de bekendmoakeng van e winners van e Nedersaksische poëziewedstried van de Appeldag ien t dörp Gelster (Gelselaar Achterhoek) met as thema Bron. Mien gedicht Wotter en Stien won de tweede pries. t Juryrapport met winnende gedichten stijt digitoal op e ienformoatsieblog: Juryverslag Appeldag.

Veurzitter van de jury Ina Brethouwer zeit over t gedicht (ien Achterhoeks):Een intrigerend gedicht. Ok in sonnet-vorm. De dichter vertelt ovver de cirkelgang van ’t water, raegen, wolk en wind naor zee. Dan geet ‘t ovver steen waor i-j ow fundament op bouwt.  Maor ’t huus kan instorten en dan.… wat dan?  Stof geet met de stroom terugge naor de bron. Regel 9 gef ‘n klinkend beginriem (en allitereert) met weurde as ‘stuwt’, ‘stuukt’ en ‘stolt’. Den inhold löt zich hier en daor raoden.

Ienzendengs kwammen uut verscheidene contreien van t Nedersaksisch: Achterhoek, Veluwe, Twente, Salland, Drenthe, Oost-Grunnengen en Westerkertier. De Appeldag-poëziewedstried wer veur de tweede moal op rieg organiseerd.