Klute-eier verstopt ien ridderzureng

Kluten (Recurvirostra avosetta) broeden gewoonlieks aan e kust op open terrein. t Ken ok aans. 

Me dunkt dat dizze kluten gedrag ontwikkeln kennen as grutoos, zo verstopt zitten de nusten. Dizze eier von k bij n plasdras ien t Westerkertier.

Da's toch huul wat aans as op koale grond. 

n Aandere kluut het de uutzundereng zocht ien ei-kleur. Kiek mor even ien t nust hieronder (Kollkumerlaand). Of òfwiekende eier ok leiden tot òfwiekende vogels is niet bekend. Mor goed, t is ja mor butenkaant, wat zeit dat vedders nou?

Wilgenholtrups

Lest zag k bizundere rups. Die har k oeit eerder zien. t Het joaren duurd veurda'k wis woar t om ging. Dat was t moment da'k n zakboekje met insekten en vlinders kreeg. Tegenwoordeg gijt soorten onderscheiden met apps veul sneller.

De Wilgenholvlinder (Cossus cossus) zigt der mor wat graauw en bruun uut. Mor de Wilgenholtrups is stukken mooier, wat kleuren angijt: oranje en purperkleureg. Mij leken die twee kleuren wel n mooie kombinoatsie toe.Der bennen minsen die vienden zukse die dikke, gladde, vedde rupsen mor niks.

t Beest(je) ken wel 8 centimeter lang worden. Je vienden ze veul ien old wilgenholt veural as t vermolmd is.

Merrie en vool

 Doar ree k langs t kenoal. Aanderkaant de weg liepen peerden ien t laand. 

Een peerd boog heur over n vool. Warempel, t peerd har krekt n vool brocht. t Vool was nog nat, mor aal drok ien e weer om ien t enne te kommen. 

t Duurt mor even en doar gijt t hin. 

t Wordt zachjes-an tied om melk te drinken.