Reiddomp - Toren ien e Lauwersmeer

De Lauwersmeer is kleiner worden. Dat wil zeggen, as je op de nije Uutkiektoren stoan, ken je zo wat ien een blik de halve Lauwersmeer overzien. Toren stijt ien Kollumeroord.

De toren is een van de grode moatregeln die nommen bennen ien t koader van Rondje Lauwersmeer Rekreoatsie en Toerisme. As je op dit gebaauw stoan, toorn je boven ale bomen uut. (NL: uittorenen boven). De ene har t over 25 meter, n'aander over wel 28 meter. Ken je noagoan, zuks n gebaauw midden ien Nationoal Laandschap Lauwersmeer. Doar bennen wat overleggen hin en weer goan, veur dat et aalmoal ien kannen en kruken was. Mor de kleuren bennen zeer noatuurlek: kortenstoal bruun en glad groen sums wat ekkelkleureg. Dudelek mag wezen, dat wolken der gien hinder van hemmen. 

Lest was der n openeng. Der werden mooie woorden sproken van Grunneger gedeputeerde Hamster ien t Vriese laand. Doarnoa kwam wetholder van gemeente Noardeast Fryslân aan bod en de architekt van de mooie toren Nynke Rixt Jukema. 

De toren het ok n noam: Reiddomp. Dat is de Fryske namme foar Roerdomp. Hoe t ok zij: de toren liekt evenveul op Reiddomp as op Roerdomp.

Buten de toren bennen der ok rekreoatsiezuilen opzet deur de Marrekrite Fryslân. Bij Dokkumer Nije Sielen en Oostmahörn stoan zukse nije poalen met toeristiese ienformoatsie en poëzie.