Sfeervol optreden met Procussion ien Gruupskerk

Dat was n bizunder optreden doar ien Gruupskerk.
Slagwerkgroep Procussion verzörgde de muzikoale begeleideng zotterdagoavend. Roelf Postma componeerde de muziek.Sfeervol!

Luuster noar de opnoame van gedicht Weg 133.

Optreden ien Meeden Zundag 14 mei

Et Liudgerfestival wordt op zundag 14 mei holden ien e dörpskerk op de Maiden [Meeden] en t draait die middag om t thema LICHT. Ien Dagblad van t Noorden stijt n mooi artikel met o.a. domnee Pieterman. Artikel DvhN 1 mei 2017.

Elk ken n eigen geschreven verhoal of gedicht veurdroagen (of veurdroagen loaten) of n lied zingen over t LICHT; t zol mooi wezen as zuks baauwd is op n Biebeltekst.
Der wordt optreden deur de dichters Janka Rubingh en Willem Tjebbe Oostenbrink en deur zanger Gert Sennema.
t Begunt om 14 mei om 15.00 uur, kerkdeur is lös om 14.30 uur, en de mirreg wordt om 17.00 uur òfsloten met n vesper. De hule mirreg is vergees. Veur n vrijwillege bijdroage is der vaste pong bij bij de kerkdeur. Meer ienformoatsie: Festival Ludgerstichteng

Noatuur

We bennen an t enne van aprilmoand kommen. Grasmoand hiet et ok wel.
Ien e tied dat je nog eier zoeken mochten en metnemmen konden tot 5 april, kwammen d'eerste nusten van de kiewieten voak niet eerder uut as rond 5 mei. Doarnoa kwammen ien e loop van meimoand de gruto's en tureluur.
Der bennen nusten uutkommen. Kiek mor noar de schilfers. Nou strieden kiewieten veur t overleven van heur piekjes aal rond 20 april.

Noa zoveul kolle van òflopen weken, viel dat nog niet toe. Mor nou bennen der as vanolds de vijanden uut de levende noatuur, die heur ok goeie poasdoagen toedocht harren. Bennen et de vossen, de kraaien, n buizerd, wezels, of n hermelien? Wel zel t zeggen.

Zoveul doppen, n meerkoet ei, uut grutonusten, n scholekster.

  

 

 Wat eier uut verscheidene tureluurnusten. 

 

En dan was der nog n wulp of wat der van over is. Veur de eerste keer da'k wulp van zo dichtbij zag. Onder de blaauwe luchten ien t groen van e greiden vloog n koppel wulpen op met heur kenmerkende widde stuit en die iendringende roep zo heurboar al vanuut de verte. Kloageleker as alle aandere weidevogels. En dan bennen zij nog niet eens heur eier kwiet roakt.
Misschien was t vanwege de soortgenoot, die achterbleef. 

Optreden met slagwaarkgroep Procussion 6 mei Gruupskerk

Over n poar week is t zo ver: n optreden met slagwaarkgroep Procussion ien Gruupskerk.
Dirigent Roelf Postma het meziek componeerd bij n aantal van mien gedichten. 
t Wordt dus n oavend met meziek, veurdracht van gedichten en meziek en poëzie soamen.


Lokoatsie: Kerkplein 6 Gruupskerk
Aanvang: 6 mei om 20.00 uur.

Groen

k Loop met enege regelmoat laandweggetjes òf. k Goa ok wel dwaars deur t laand. 

Mor me dunkt, k roak aal meer van t pad òf. 

Kiek mor even noar wat foto's en dan onderaan t gedicht Groen. 

  Ien de Noordhörnner Goa, 

 ien e Zuudhörnner Goalanden, 

op t laand an t Hoendiep of de Zuderweg,

of ien e trein noar Stad onderweegs bij Den Hörn

t is overal groen en t liekt zo leeg.  

Poëzie uutleggen en analyseren

Der bennen minsen die holden van gedichten en der bennen minsen die der niet van holden.

Summege minsen die wel van gedichten holden, kennen der weer n hekel an kriegen as heur noa t lezen vroagd worden wat ze van t gedicht vienden. We leven ien n vrij laand mor proaten over poëzie geft minsen voak een ongemakkelek gevoel. As de vroag nou over voetbal ging, of ziekte of zulfs over sex, mor poëzie...
Körtleden is mien prozagedicht "Ien e kern" ien t Drentse blad Roet publiceerd. t Was dizze keer n specioal nummer met as themoa  "Hier kom ik weg" van e Drentse Huus van de Taol.

Der bennen verscheidene menieren om van gedachten te wisseln over poëzie. Mien kollega JEP het zien analyse en kommentoar geven deur te tekenen. Hieronder de analyse van twee gedichten.

Boven: n gedicht ien de meer gebrukeleke, vrije stijl
Onder: t proza-gedicht.

Dit von ik n mooie prissentoatsie. t Geft n aander ienzicht en nije menieren om dingen bespreekboar te moaken. Misschien ok op aandre terreinen toepasboar.                 Bedaankt JEP !

Zwempad ien t Hoendiep

Gewoonleks hemmen je n looppad en n zwembad.
Mor ien t Hoendiep harren eenden òflopen moand noa n poar nachten vorst n zwempad.

Zwempad veur de eenden.  Foto: Willem Tjebbe Oostenbrink

Der hielden huul wat soorten eenden toe ien t Hoendiep leste weken.
Mor ja, as et n poar nachten niet vrust, is zo'n zwempad ok zo mor weer vot.

Eenden traauwens ok.