Poëzie op Gentse feesten - juli 2019

Afgelopen maand - juli 2019 - waren in België de Gentse feesten.

NEDERLAANDS Tijdens de Gentse feestdagen afgelopen juli heeft het Poëziecentrum de publieke ruimte aangekleed met poëzieteksten. Zo zijn de volgende dichtregels van mij gebruikt bij de raamvertelling. Een strofe van vier regels uit het gedicht Zomer is in de ramen te vinden.

ENGLISH During the big festival in Gent Belgium July 2019 the Poetry centre decorated the public space with poems and quotes of poetry. Four lines of my poem Summer were presented in the windows.

Dit gedicht is luchtig

als een zomerblouse

Het zoekt verbinding

en reikt naar jou. 

This poem is as light

as a summer blouse

It seeks connection

and reaches out for you. 

Dieren ien e stad - Knien ien Berlien

Begun augustus was k ien Berlien. t Is n grode stad, mor veural n groene stad. Vanòf t pladde dak van t hotel keken we richting t nije grode station en zaggen verscheidene baauwterreinen. Feitlieks bennen baauwwaarken overal te vienden. Berlien baauwt veur t voaderlaand vot. Zoveul baauwputten, lege terreinen met kroanen, masjienes t gijt mor deur. 

Toen zaggen we noa n poar grode swaarm bonte kraaien n knien rondhippen. En even loater kwam der nije klant. t Knien kneep der tussenuut. Zunder hum te steuren slenterde n vos over de zanderege grond.  

 

Misschien denken je nou: Ah, Bahnhof Zoo. Mor t was Berlien Hauptbahnhof.

pad en weg

Woar mins en dier goan, ontstijt vroeg of loat n weg of pad. Hoe groot de ruumte ok is en hoe weineg volk der ok omswint.

Dat geldt ok veur de schoapen op t kwelderlaand.

Zoveul ruumte en toch ken een en aander je nog ien e weg zitten. Goa uut t pad, zol je zeggen, mor wotter luustert niet. t Wachten is op dat meer wotter votlopt en geuten en greppels weer even laand worden.

Beder n lege dop as n half ei

Sums is n lege dop beder as n half ei. Mor wanneer dat dan? As n vogel veul lewaai moakt en iendringers met groot alarm perbeert te verjoagen. Mor ja, wat zel dat vogeltje dij moaken?

Der mos wel wat leggen, docht ik. De alarmroep van kleine plevier was overdudelek. Mor ien t laand met gras leek gien geschikt plak te vienden.Aanderkaant de sloot was n vrachtwoagenbedrief.

Der stoan loodsen en stienen gebaauwen. t Terrein is met grint en zo nou en dan puun bedekt. Zo'n 4-5 meter vanòf de sloot was de waand van de loods. Vedderop ston nog n poar containers. Wat mossen die beestjes zo hinneweer te vliegen en te tetteren?

Noa veul zoeken en turen stapke veur stapke von ik eindelieks n dopke. Krekt zo groot as n liesterei. Beigekleureg met zwarte stipkes. Van de kleine plevier. Oadern an e binnenkaant van e dop wiezen op n goeie uutkomst. Aargenswoar moeten piekjes zitten. Zo dichtbij bebaauweng en minseleke bedrievegheid. Doar hemmen ze kennelek gien boodschap aan.

Nou moeten ze de reis nog annemmen.

De uutkomst

Hoeveul vogels broeden ien juli? Summege vogels hemmen zoveul geduld dat ze noa de langste dag nog broeden. Sums scholeksters die weer aan n nust begunnen ien t grasland op n zwarte plek.

Hier leggen twee eikes van t visdiefke te wachten. Wachten op de uutkomst. Dizze nusten kennen je tegenwoordeg ok vienden ien t grasland bij plasdras-gebieden.Visdieven moe-je wat helpen. Ze broeden t beste as je heur n plakje bereiden op n bret dat ien t wotter drift. Met wat schelpen en ze hemmen al genog. Hoe lang ze der over doen, wiet ik niet. Mor noa verloop van tied leggen de schelpen mooi netjes ien n petroon om de eikes.

Vroeger trof k de nusten an op e kwelder boven Ulrom soamen met zeevogels, hoewel die weer n endje vedderop zatten. k Heb ze doar aal joaren niet meer vonden. Schoapen lopen der nog altied. 

Summersnij en Boomwol noa de junistörm

De oogst noa n summerstörm is boomwol. Gewoonlieks kriegen we an t enne van juni, begun juli allenneg pluzen van popelieren te zien. Met de störm ien juni konden we zien woar de pluzen weg kommen. 

Gien alledoags gezicht. Takken van popelieren steken struken noar de kroon. Krekt as hemmen minsen moanden lang vergeten n waslien leeg te hoalen. Of is et toch n rupseploag?

Dit joar he'k niet zoveul zummersnij zien as aander joaren. Dan lag doar de weg en baarm bezaaid met pluzen. n Tepijt van summersnij uutstald over de weg.  Zoveul zachter en warmer as snij, met zo nou en dan zoaden, dat aal.

Feitlieks hemmen wij gien boomwol. Ien Duutslaand hemmen ze Baumwolle. Dat is t Duutse woord veur ketoen. Popelieren kennen ok metdingen noar die noam.