Bespiegelengen

Òflopen week 20 december was ien Tolbert de openeng van de uutvoereng gebiedsienrichteng Zudelek Westerkwartier. 

Ze goan lös met uutvoereng. Op de Pasop stijt n nije keet - ien noagelnije vaarf.

k Heb t gedicht Bespiegelengen veurdroagen. t Is ok terecht kommen op de kalender 2020.

 

...

Wotter speult n grode rol ien t gebied. Der komt n wotterbargeng veur tieden as der slim veul wotter is. 

Doarover gijt t gedicht. 

Meer nijs is te vienden op: Zudelek Westerkertier Gebiedskommizzie.

Noatuur bloeit en zingt

Leste joaren liekt et noajoar zachter. Alles blift langer groen.

Noa de vorst ien november was et toch grotendeels doan met de bomen. Mor, wiedevoak kennen je bloeiende bloemen vienden ien november. De rozemarijnstruuk bloeit en is groener as noeit teveuren. Ien december is der ok nog van ales te vienden an e kaant van de weg.

Vogels doen aal even hard met. Mor wat mij leste moanden opvallen is: t Is de roodborst die je heuren kennen. Sums zitten der twee achter nkander an. Mor de liester holdt hum stil. Zol t wezen ien verbaand met de ziekte die der onder de merels west het? Dat begon aal n poar joar terug ien t zuden van t laand. Me dunkt leste joar bennen der ok minder merels ien Zuudhörn.

Mor dizze haarfst heur je op mooie zunnege doagen de roodborst vanuut n boomtop t hoogste lied zingen veur elkeneen die heuren wil.

Oardriekskunde (4) Fryslân / Vrieslaand

We vervolgen de lessen van oardriekskunde met Fryslân / Vrieslaand.

Doar vallen mij verscheidene dingen op.

• Der stijt nog t Vriese stamboekkoe. Klein en gedrongen. Huul wat aans as de HF - Holstein-Frisian vandoag de dag.
• Noord-Oost Polder heurt bij Vrieslaand. Dat he'k zulf ien e joaren zeuventeg aans leerd. 
• Der wordt aal goed boerd ien e polder te zien aan schoven. Doar hemmen ze nog gien ploatje bruukt van n dörsmesjiene. Of zulfs n maaidors-mesjiene combinoatsie, de combine. t Ken ok wezen dat de combine al bruukt wer, mor dat de moakers hechten an t olle.
• Ien Kollummerlaand liekt et een en aal baauw - beige kleur. Me dunkt doar hemmen de moakers ok oardeg royoal met baauw uutpakt.
• En dan n stukje bruun bij Stellengwaarf: hoogveen.
• Zo te zien voeren der beheurlek wat schepen van Lemmer en Staveren over Iesselmeer.

Doarmet bennen we eerst ankommen bij de leste oardriekskundeles van Noord-Nederlaand.