Winter stijt ien bloei

Toen k op de Legere schoel ien de vierde klas zat, vroeg meester aan ons kiender of wij aander dag ok bloemen metnemmen konden. De winter was uutzunderlek zacht, dat je konden al verscheidene bloemen ien bloei zien. t Was januwoari/feberwoari 1973.

Thuus von k ien t grasveld n poar madeliefkes. En der zellen ok al snijklokjes west hemmen. Mor mien vondst viel ien t niet bij de bloemen die n wichtje ien e klas vonden har. Kiender mossen wat lachen om die poar bloemkes van mij.  

Wat toen n bizunder zachte winter was, doar hemmen we t nou niet meer over. Ik wiet dat der nog n zachte winter was mid joaren zeuventeg, misschien 1975, dat kiewieten host niet vottrokken en je n liwrik ien januwoari zingen heurde. Die vogel zingt niet meer bij ons. 

Mor nou liekt ales al groen as ien april. Struken botten uut, bij de popelieren hangen eerste rooie bloemkes al ien slieren an e takken. 

Culturele Oavend met dichters en muzikanten ien Bakkerscafé Gruupskerk 13 meert

Vrijdagoavend 13 meert is der n Culturele Oavend met dichters en muzikanten ien Bakkerscafé Gruupskerk. 

Optredenij Lutje Poetry ien Forum 27 feberwoari

Ankommende dunderdag 27 feberwoari n optreden ien t pregram van Lutje Poetry ien Forum.

"  Allenneg an e oppervlakte ken ales 
an t licht kommen. "

De oversteek

Eerlieks zeit snap k dit ploatje niet goed, of beder dizze wurm begriep ik huulmoal niks van. De pier zag k veur dood op t asfalt leggen. Mor t bleek aans te wezen. Vol energie begon t dierke te krupen, dat hij kon d'overkaant nog wel hoalen, veurdat er overreden worden zol.

 

Even loater vroeg k me òf woar de wurm eiglieks wegkwam. t Beest kruupt schuun over. Doarbij liekt er meer ien e richteng van e weg te goan as dat er echt over stekt.

Dan komt toch de vroag op: Gijt de wurm wel noar de overkaant of het er wat slingers moakt en komt er uuteindelieks weer an e zulfde kaant uut? Wel zel t zeggen ...

 Aal met aal n hule ienspanneng veur zuks ongewis risseltoat.

Zunopkomst te Zuudhörn

Zunopkomst te Zuudhörn

Luchten hemmen niks ien e reken met dreuge doagen,
hemmen regen neudeg as wottervaarf.
Zoveul kleur vroeg ien e mörgen, 
doar worden minsen niet altied bliede van.
Zuks wat is aans as je binnen blieven kennen
en n roam hemmen met de blik op t oosten.

Zunsondergang op Balmahuzen

Zunsondergang op Balmahuzen

Zun gijt onder

luchten tekenen 

t silhouet van Balmahuzen

t Ies op e sloot licht op.

Even nog breken bomen 

de lucht ien t schiemerlicht.