Grunneger muziek en poëzie ien Eisseshof Nijhoof zundag 8 mei 2016,

Nijhoof - Zundag 8 mei is der n optreden van e muzikanten Martin Korthuis en Eddo Pol en dichter Willem Tjebbe Oostenbrink ien e Eisseshof te Nijhoof.

De artiesten hopen op mooi weer want de idyllische tuun achter Eisseshof is n prachtege plek om van poëzie en muziek te genieten. Onder t genot van n drankje en n hapke ken t publiek luustern noar de Grunneger muziek en poëzie uut t Westerkertier. En t is ok n beetje feest dizze mirreg, want Martin is joareg. En dat hoopt er met veul bezoekers vieren te kennen.

Vlnr Willem Tjebbe Oostenbrink, Martin Korthuis, Eddo Pol; foto: Teodozja Oostenbrink-Wieloch

De liedjes van zanger-schriever Martin Korthuis goan over verlies, vreugde, òfscheid, liefde en eenzoamheid, kortom ales wat ons bestoan minselek moakt. Martin speult leste tied met gitarist/zanger Eddo Pol uut Beem. Eddo speult al joar en dag ien verscheidene bands ien Stad en ommelanden, van hardrock tot mooie liedjes ien t Grunnengs.

Willem Tjebbe Oostenbrink dicht en droagt veur ien t Westerkertiers. Hij won ien 2014 de Duutse Borslapries veur nedersaksische literatuur. Zien debuut van 2013 'Opdreugde troanen' (uutgeverij Philip Elchers) stroalt liefde uut veur de toal en cultuur, op t eerste oog verbonden met t Westerkwartier, bij noadere beschaauweng breder, universeler. 

Optreden begunt om 15.00 uur. Bij minder mooi weer zel t optreden ien de sfeervolle bovenzoal van e Eisseshof wezen.

Entree: € 6,00. Koarten op e dag zulf verkriegboar (dus niet online te bestellen).

* * * * *

Veur meer ienformoatsie tel: 0594.540788

Vogels en dichters - Fryslân Wommels 12 mei

Geluden van n loate junioavend droegen ver

Scholekster riep om heur piekjes.

 'De smoak van hooi'

Scholekster an t Tarjat (foto: (c) Willem Tjebbe Oostenbrink)

n Openlucht-optreden Vogels en Dichters ien t Vriese laandschap.
"Kom bried mar op myn lan" zeit Elmar Kuiper. Dat he'k vrij omzet met "Nuzzel mor op mien greiden".

Ien soamenwaarkeng met t Vriese kultureel tiedschrift de Moanne organiseert  Noorderbreedte op 12 mei n dichtersoavend bij Wommels.

Grutojong. Foto's: (c) Willem Tjebbe Oostenbrink

Heur de poëzie van dichters en de weidevogels.

Weidevogels: gruto, liwrik, kiewiet, tureluur, scholekster,


Dichters: Simon Oosting, Elmar Kuiper en Willem Tjebbe Oostenbrink.

Aander vogels zollen ok wel ns metdoen kennen: oksters, kraai, n holtduuf of holenduuf, misschien n kneuvink.

Verbiendeng tussen Grunnengen en Ostfreeslaand

Òflopen zotterdag was doar de Dag van de Grunneger toal ien Stad.

Met een bizundere prissentoatsie van Carl-Heinz Dirks uut Duutslaand, Emden.

t Was ienteressant verhoal over de baand tussen Grunnengen en Ost-Frieslaand.
Der trokken veul minsen over en weer tussen Grunnen en Ost-Frieslaand.
Ubbo Emmius kwam van Ost-Frieslaand noar Stad en het doar fundaminten leit van de universiteit.
Ost-Frieslaand het veul gemeen met Grunnengen. Ze kennen doar ok "een wat op t jak geven".

Prissentoatie Carl Heinz Dirks

Emden was gien lid van de Hanze en doarom hoefde de stad heur niet aan de Hanze-regels te holden. Butenlaandse schepen konden vanuut Emden onder neutroale vlag voaren.
Ien e Spoanse tied was Emden toevluchtsoord veur en minsen uut de Lege Laanden, Hollanders, Friezen, Grunnegers en - veural noa de val van Antwerpen ien 1585 - ok veur Vloamengen.
t Stadje met zo'n 5.000 ienwoners wer twee moal zo groot deur immegrantenstroom!

Nije boekeleggers op e Dag van e Grunneger Toal

De zeuvende editie van de Dag van e Grunneger Toal is op 19 meert is ien aantocht.

Van teksten van dichters bennen boekeleggers met metwaarkeng van GRID/Grafisch museum ien Stad. 

Boekeleggers zellen uutdeeld worden op dizze dag.

Volgende tekst uut t gedicht Stroom is ok òfdrukt.

Gedicht in Met het Oog op Morgen

Radioprogramma "Met het Oog op Morgen" leest gedichten die in de Top 100 van de Turingwedstrijd staan.

Luister naar de voordracht van het gedicht Stof - gelezen door en met commentaar van Mieke van der Weij en Anne Vegter van 31 januari.

Met het Oog op Morgen