Rotary Dichtersfestival - Dichterbij Westerkwartier 23 meert ien t Holt

Zotterdag 23 meert organiseert de Rotaryclub Groningen West Dichtersfestival Dichterbij Westerkwartier. Opbrengst gijt noar t Nico Solfonds. t Fonds ondersteunt internationoale humanitaire projecten.

Optredende dichters bennen: Remco Ekkers, Jane Leusink, Aly Freye en Willem Tjebbe Oostenbrink en met muziek van Meindert Talma.
Veurdrachten bennen ien t nederlaands en van mien kaant ien t Westerkertiers. t Dichtersfestival is ien Grand Café & Logement ‘In ’t Holt’, Hoofdstroat 2 te Zuudhörn. D'oavend begunt om 20.30 uur. Ienloop vanòf 19.45 uur. Veur meer ienformoatsie zie ok t programmoa: Dichterbij Westerkwartier. 

Ganzen

Ganzen op laand.
Grode koppels ien t groen.
Gaanzen moaken heur op
veur de nije vlucht.

Gakken ien e lucht.
Vogels tegen blaauw.
Ganzen vliegen over.
Ganzen vliegen vot.
Ganzen vliegen
Ganzen vliegen van zuud noar noord.

t Is veujoar, t zel weer warmer worden.
Ganzen vliegen over
Laand en wotter.
Ganzen zoeken niet
Ganzen vienden zunder zoeken
zunder vroagen heur weg.

Prissentoatsie Historische Kring - 5 meert ien Noordhörn

De Historische Kring organiseert op 5 maart  de avond Taal en Cultuur van het Westerkwartier.

De Historische Kring örganiseert op 5 meert n oavend over Toal en Cultuur van t Westerkwartier.

k Zel n prissentoatsie geven over streektoal, cultuurhistorie, geschiedenis ienbed ien gedichten ien t Westerkertiers. Prissentoatsie zel deels ien t Westerkertiers en ien t Nederlaands wezen.

Woar: Dörpstee Noordhörn - Noorderweg 61c
Aanvang: 20.00 uur

Nije winner van de Johann Friedrich Dirks pries Stad Emden

Zotterdag 23 februoari is de Johann Friedrich Dirkspries veur literatuur veur de vierde keer uutreikt. Winner is Hans Hermann Briese (de man met rooie stropdas). De pries wordt om de twee joar toekend.

Twee joar terug won ik de pries en doarom zat ik dizkeer ien e jury. Der warren meer as datteg ienzendengen uut Duutslaand en Grunnengen.t Was n mooie program ien t Neues Theater ien Emden met n goeie prissentoator, vlot en humoristisch.
Pries veur de meziek ging noar Otto Groote zien band. Vedders warren der ok priezen veur schoelen uut Moordorf en Emden. Priezengeld wordt beschikboar steld deur familie van de dichter Johann Friedrich Dirks (1874-1949). Hij geldt as een van de belangriekste dichters ien de streektoal van Oost-Friesland. 
Onderweegs noar Emden kwam ik n gebaauw met de noam Joh. Fr. Dirks tegen. Dizze òfbeeldeng zeit niet zoveul, dunkt me. Meugelk hemmen je nog noeit van dit bedrief heurd, mor Dirks Groupe is n groot internationoal bedrief.

Koolmees uutzunderlek vroeg

Weer of gien weer. Mor vandoag was et haartstikke mooi weer.
Toch vrust et snachts wel.k Snap der niks van. n Koolmees het aal zes eikes leit. 

Dit is uutzunderleke vroeg. Ien e joaren zeuventeg begon de koolmees te leggen rond 20 april, zeker niet eerder. Leste joaren hemmen ze sums eier veur 1 april. Mor half februwoarie - dat is weer n nije ervoareng.