Woar moet dat hín?

Dat vroeg ik me aal òf toen k dizze vogeltjes zag. Juli en Augustus aallang veurbij, warmte is ienkrompen tot n poar uren midden op e dag. En dan bennen doar nog twee lutje swaalfkes op e raand van t nust.

Vroag is misschien eerder: Woar kennen ze henne? D'olle swaalfkes begunnen over n poar week te trekken noar t zuden. En doar zitten de jongen ien t nust te wachten, zo jong en nog gien enkele vliegervoareng. Ze hemmen gien wiet van de grode reis, allenneg dat olden ien e tussentieds misschien wat ongedureger worden. Wat is der aalmoal meugelek ien e wereld van swaalfkes?