Veul nusten bennen uutkommen de leste weken. Voak bennen doar eerst de sprutters, zo rond 20-22 mei. Dan volgen koolmezen aal gaauwachteg. Ien t nustkastje van blaauwmeeske was t al wekenlang stil. Der kwam gien vogel meer ien en uut. Toen k op onderzoek uutging, bleken der vier eikes te wezen. Ze laggen verspreid ien t nustkastje. t Nust wat verropt. Kennelek is t nust al vroeg tiedens de leg verloaten. k Vermoed dat moeke mees op t menu van n roofvogel of kat belaand is.
Ien t laand bennen scholekstereier uutkommen.
Dit scholeksterjong zat op n klein eilaandje dat moakt is ter beschermeng van e weidevogels. Verdekt opsteld ien t gras aan t oog onttrokken veur zeevogels, n buizerd of hoavik. t Valt as jonge vogel niet toe om schoadevrij de jeugd te ontgroeien. Vroeger was der n rekloamespotje van "Valhelm hoofdzaak". Vogels zollen niet genog holpen wezen met n valhelm.
Vossen en marters maggen ien pervincie Grunnengen niet beheerd en bejoagd worden. Ok dat wordt noatuurbeschermeng noemd; of is et noatuursentiment? Denken dat je alles ien e noatuur "regelen" zunder beheer is een idee. Mor t toestoan van d'ongebreideld groei van roofdieren is de doodsteek veur vogels die voak op t menu stoan.
Ien Drenthe en Vrieslaand loaten ze zien meer oog te hemmen veur woar weidevogels verlet van hemmen.
Geen opmerkingen:
Een reactie posten