Zaand stöft, ken niet oarden

n Nije ansichtskoart.

Foto: Herman Janssen

Foto is moakt deur Herman Janssen.  Tekst is uut t gedicht Stroom.
Dizze koart moakt deel van n riegje van vier ansichtskoarten met gedichten die aalmoal stoan ien e nije bundel. Meer hierover tiedens de prissentoatsie van de bundel Zolt en Stof op 3 november ien t Cultureel Centrum Zuudhörn.

Prissentoatsie bundel Zolt en Stof

Over n poar week is t zover. De nije dichtbundel Zolt en Stof komt uut. De prissentoatsie van de bundel is op 3 november ien Cultureel Centrum te Zuudhörn om 20.00 uur.

De gedichten bennen ien t Westerkertiers schreven en goan over mins-wezen ienbed ien de tied, t laandschap, n rit met d'auto as pladdegrond veur t geheugen, verwachteng ien n oogwenk en verbeeldeng.

Tiedens de prissentoatsie zellen gedichten met muzikoale begeleideng veurdroagen worden.Are Meijer zel met de dichter ien gesprek goan. Slagwaarkgroep Procussion verzörgt de muziek onder leideng van dirigent Roelf Postma.

Belangstelleng om te kommen? Welkom. Groag even teveuren aanmelden: willem.tjebbe.oostenbrink@planet.nl.

Lokoatsie: Cultureel Centrum Zuidhorn (Jellemaweg 3, 9801 CG Zuudhorn, 5 minuten lopen vanòf t station).

Wotterpiekje

Der bennen vier nije ansichtskoarten uutkommen: n òfbeeldeng met gedicht. 
Hieronder Wotterpiekje.

Foto en gedicht: Willem Tjebbe Oostenbrink

Gedichten verschienen binnenkort ien e nije bundel Zolt en Stof (Vliedorp Houwerziel 2017).

Swaalfkes

Lest was k op de Goarkeuken. t Was aal begun september. Der warren doar nog zoveul swaalfkes, mien kop duzelde der van. Ien n kleine schuur zatten overaal nusten, links, rechts, op elk plaankje, ien elk hörntje leek n nust te zitten. Op e trap noar boven was et aal niet aans. Tegen de balken van t dak zaten op e zolder ok aalndorie nusten.

Foto: Swaalfkejong begun september. Willem Tjebbe Oostenbrink

De leste jongen zatten nog ien t nust, tegen uutvliegen an. t Stittje was nog an e korde kaant.


Mor wat zweefde doar nou ien e lucht? n Klamp hooi?

Foto: Swaalfkenust. Willem Tjebbe Oostenbrink.

Nee, t zweefde niet, t hong an elektrisch snoer boven op n stekker.

Foto: Swaalfkenust op n stekker. Willem Tjebbe Oostenbrink

Goeie baauwers bennen t wel. t Nust was leeg, mor n swaalfkepoar har der dizze zummer twee keer ien brud. Vogels bennen nou aal vot, dunkt me. t Wachten is op nije grasmoand aander joar. 

Gedicht Samenhang op SLA|Avier

SLA|Avier heeft deze week een Nederlandstalig gedicht van mij geplaatst. 

SLA|Avier het dizze week n Nederlaandstoaleg gedicht van mij ploatst. 

Het gedicht heet Samenhang. De Groninger versie zal ook in de nieuwe uit te komen bundel Zolt en Stof verschijnen. 
t Gedicht hiet Soamenhang. De Grunneger versie zel ok ien e nije uut te kommen bundel Zolt en Stof verschienen.

Lees  SLA|Avier - Gedicht van de week 38 - Samenhang

Nije dichtbundel komt der aan

Dit noajoar komt mien nije dichtbundel uut.
Omslag is kloar. En zo zigt et der uut.

Zolt en Stof hiet de bundel.
Nou is t even òfwachten.

Expositie Swien op e ledder - Huusslachteng ien Nuus 9 september

Ankommende zotterdag ien t koader van Open Monumentendag is der n expositie over "Swien op e ledder" Huusslachteng ien t Rieuw te Nuus. 

De openeng mag ik doen. Doarnoa zellen de ambachteleke sloagers Douwe van der Voart en Dirk Boersemoa uutleggen hoe of dat aalmoal ien zien waark gijt. 
Meer ienfo: Expositie huusslachteng bij museum t Rieuw.

t Begunt om 13.30 uur, Olleweg (Oudeweg) 17a  te Nuus.