donderdag 27 november 2014

Ontvangst Borslapries




ZUUDHÖRN - Zotterdag 8 november het Zuudhörner dichter Willem Tjebbe Oostenbrink de Borslapries 2014 ien ontvangst nommen veur zien gedichtencyclus 'Tussen tied en stroom'. De Borsla-pries werd dit joar veur de achttiende keer toekend deur de Borslaverenigeng veur nije Nederduutse toal en literatuur in Bösel even onder Oldenburg.


De cyclus ‘Tussen Tied en Stroom' omvat vief gedichten schreven ien t Westerkertiers: Blad, Glas, Terug noar t Poeldiep, Vergoadern, en Weerzien. De titel van e cyclus verwiest noar de thematiek van de gedichten: mensenlevens ien e stroom van e tied. Juryveurzitter Hermann Gelhaus omschreef de poëzie as volgt: "De gedichten geven n vermoeden van wat et is om mins te wezen. De mins is ienbed ien e tijd. Hij ken zien verleden kennen, mor wiet niet wat de toekomst ienholdt. Ien zien lofrede sprak Gelhaus: "De dichter is derien sloagd dizze gedachte paradoksoal te formuleren, noamelek aan de ene kant donker en aan de andere kant licht."

Dr. Josef Willer voorzitter Borslaverenigeng (links) en Hans-Jürgen Hempen (rechts) filiciteren Willem Tjebbe Oostenbrink en vraauw Teodozja. Foto: Wilfried Leser 

Ien n volle zoal van Heimathaus ien Bösel luusterden toehoorders noar de gedichten eerst ien t Westerkertiers deur de dichter zulf en doarnoa ien t plattduuts veurdroagen met n prachtege omzetteng ("nachdichtung") deur Carl-Heinz Dirks uut Emden.
n Bizundere oavend met toal as biendmiddel tussen Grunnengen en t Oldenburger Münsterlaand. Minsen ontmoetten nkander en vernammen heur verwaantschap ien e nedersaksische toal.