Gedichten ien t Westerkertiers en ien t Nederlands op Meander Magazine

Op Meander Magazine zijn drie gedichten in het Westerkertiers en in Nederlandse vertaling te lezen.

De gedichten zijn afkomstig uit de laatste bundel "Zolt en Stof" (Zout en Stof; Vliedorp Houwerzijl 2017). Meander Magazine: drie gedichten 

Op Meander Magazine bennen drie gedichten ien t Westerkertiers en ien Nederlaandse vertoaleng te lezen. De gedichten bennen òfkomsteg van de leste bundel Zolt en Stof (Vliedorp Houwerzijl 2017). Meander Magazine: drie gedichten

Noar n nij joar en de beste winsen

Voak loop je ien schoenen tot ze òf bennen. As t òfscheid nemmen zwoar valt, ken je der nog ns nije zolen onder zetten loaten. Zo gijt n schoen n poar joar langer met. Wat altied blift bij veterschoenen, is t vastmoaken.

De veters steken altied uut de bovenste gatjes van de schoen. Woarom dat zo is, ik zol t niet wieten. Mien dochter as lut wichtje wis dat ok niet. Ze hielp me met nije veters derien te doen. Zij deed et op n aander menier.

Innovoatsie en nije dingen begunnen met zoaken aans doen of aans zien. Dat geft nije ienzichten. n Joar wordt veural nij deur zulf nije dingen te doen. Nou strik ik veters op t tweede gatje. Wat mij t meeste opvalt: bij t aan- en uutdoen van de schoenen blieven de veters veul mooier zitten. Lengte van beide uutènnes blieven mooi even lang. Zo trek ik nooit an t körtste ènne.
Ik wins elkeneen nije dingen toe. Veul heil en zegen ien t nije joar.

Citoat van t gedicht Over Laand en Licht

Een citoat van t gedicht Over Laand en Licht is opnommen op de nije citoatenkoart van Leesbaar Groningen met verwiezeng noar de Bombay, de Peebos en Dörp.

Louis Stiller is de man achter het idee van Citoaten over Grunnengen. Op 2 december bij Boekhandel van der Velde ien Stad is de prissentoatsie van de nije koart. Je kennen ok n wandeleng metmoaken met de redacteurs dezulfde zotterdagmirreg: Wandeleng ien Stad.

t Gedicht Over Laand en Licht is ok te vienden op n plakette ien t laandschap ten noorden van Grodegast an de Caspar de Roblesdiek (rooie kruuske).

Vleugel ien Stad

Zo vien je een vleugel van n vogel midden ien Stad. Moandagmörgen op Groote Maart.
Zwartachtege veren, dat ik docht dat et van n duuf wezen mos. Mor met de groene glans was dat onmeugelek.

Doarbij kwam nog de widde tippen van de veren. n Kiewiet was et. Vroag is: Hoe komt zo'n vleugel nou op e Groote Maart? Wel het dizze kiewiet metnommen noar Stad? n Buizerd zel dat toch niet zo gaauw doen. 

Zol et n hoavik west hemmen? Misschien n slechtvalk? Die huzen ok met regelmoat ien steden. Mor t blift n apadde vondst. 

Witvis

Lest he'k weekenne ien Giethoorn west. Redelek weer, mor bovenaal goed visweer. Dikke witvis vongen. Zukse dikken met zoveul dat overkomt me niet elke dag. Zo vong de dochter veur t eerst n voorn van 25 cm.

Met zoveul mooie viskes kon k niet loaten, om n stel schoon te moaken. Krekt as vroeger as jonkje van zeuven, acht joar vissen slachten op n stoapel bielzen achterhuus.

 

Met t mes ien e haand, vis op e plank, kop der òf snieden, schubben der òfhoalen, opensnieden, iengewanden der uut, de bloas even knappen loaten. En noatuurlek vinnen der òf, steert mocht der wel aan blieven har een me zeid.

Noa t schoon spoelen, de vis ienzolten en n dag stoan loaten ien e koelkast. Bakken, veuraal niet te hard, en dan mor opdienen. Smoek best.