zaterdag 29 juli 2017

Zummertied noa de langste dag


De langste dag is weer veurbij. Vekaansies ien t noorden bennen nog mor krekt begonnen, mor sums liekt haarfst aal te kommen. Luchten bennen graauw en lobbeg.

Je kennen t aal weer vernemmen en veuraal bij regenachteg weer: doagen worden aalsmor korter.
Regen arceert mien blik as k noar buten kiek. sMörgens kennen je wel n uur langer ien berre leggen en nog denken dat et gien acht uur is.
k Von n nust van n zangvogeltje met  n geelbruun eike, docht ik even. Mor t was n klein slakje ien n bruun huuske. Toen zag ik doarnoast n kepot, lichtblaauw eike met roodbrune vlekjes. n Verloaten kneunust ien juli. Misschien is et de melancholieke ienslag. As d'aanvreten bloaderen van bloemen ien e tuun.