Leste moanden hemmen der weer verscheidene artikels ien e kraant stoan over de Bende van Oldekerk. Leste woapenfeit is de onthulleng van n stien op t kerkhof van Nijkerk met de vier noamen van de minsen die 6 oktober 1944 t leven lieten. Op e stien is n gedicht ien t Westerkertiers ploatst van dichter Melle Hijlkemoa. t Is n mooi gedicht.
t Was noazummer 1944 dat ien t Westerkertier overvallen en ienbroaken bij boeren pleegd werden. Overvallers deden heur veur as Landwachters. Ze kregen de noam "De Bende van Oldekerk" mor "Bende van t Foan" har beder west. Doar ien n huus op Klein Ruslaand hielden de mannen heur verscholen. Op 6 oktober 1944 het de Duutse Sichersheitsdienst n drastisch enne moakt an e Bende van Oldekerk.
De mannen werden noamloos begroaven op t kerkhof van Nijkerk. De stien herinnert an de gebeurtenis van toen en van wat loater gebeurd is.
Geen opmerkingen:
Een reactie posten