Dizze blog is t tweede deel over de Bende van Oldekerk (1ste was op 30 december). Meer as n joar leden is der n boek uutkommen, schreven deur Geert Jonker, n noazoat van de femilie Schriemer. t Boek beschrift hoe op 6 oktober de Duutse Sicherheitsdienst met hulp van NSB-ers vier minsen van femilie Schriemer doodschoten hemmen. De minsen bennen begroaven op t aarmenkerkhof zunder noam.
Der wer noa de oorlog ien t Westerkertier niet veul over sproken en elders ok niet, dat is
eufemisties steld. Dat der nou n boek is, ken helpen om licht te werpen
op dizze eigenoardege zoak. t Is n leesboar verhoal worden met iendringende
beschrievengs.
De oldste van e vier mannen was pabbe Schriemer, n man ien e zesteg. De drie aandern warren jonge mannen. Zij hemmen ien september 1944 op heur streuperstochten verscheidene boeren ien e omgeveng overvallen en beroofd. De een was de jongste zeun van t gezin. Dan was der een verloofd en nog n een traauwd met n zuster Schriemer. Dizze twee kirrels - van de kolde kaant om zo te zeggen - harren ervoareng opdoan bij de SS aan t oostfront. Bij Schriemer op Klein Ruslaand op t Foan zatten ze n aantal moanden onderdoken omdat ze deserteerd warren. Ien n uniförm van de SS moeken ze heur nachteleke rondes deur t Westerkertier.
De schriever schrift van moordslachtoffers. Of doar de vier doodschoten personen t beste met duud worden, wiet ik niet. Op t kaft stijt 'opgeschoten daders'. Dat is wat kört deur de bocht, dunkt me veur minsen van 22 en 24 joar. Minsen vandoag de dag hemmen de ruumte om jong en jeudeg gedrag te teunen tot heur 70ste, mor ien e tied dat t woord puberteit nog niet bruukt wer, wer de sproken van volwassen jonge mannen. Zo ken je t nou nog zeggen.
Noa de oorlog harren gemeente Oldekerk en heur bestuurders wel wat schappeleker wezen kend om gelegenheid te geven doden te herbegroaven. Met heur eigen belangen en met eigen kleine gevoelens hemmen bestuurders heur ienvloed bruukt om verzoeken tot herbegroaven òf te wiezen.
Et deed me denken aan t klassieke verhoal van de Grieken bij t beleg van Troje. Hektor van Troje, die Achilles zien goede vriend dood har, wer ien n duel deur Achilles versloagen. Hektor smeekt vlak veur zien dood aan Achilles om zien liek noar zien pabbe Priamus te brengen. Achilles wol dat niet lieden, zo kwoad was er. Hij bond et liek achter zien striedwoagen en sleepte der drie doagen met rond t graf van zien vriend. Mor gien honden kwammen an t liggoam van Hector, want de goden harren et ien beschermeng nommen. Uuteindelieks kwam Zeus, de oppergod, tussenbeide en wer Achilles overtuugd dat hij t liggoam vrijgeven mos aan de femilie van Hektor.
Zuks iengriepen van hogerhaand het der op t Foan niet west. Nou hemmen ze - we bennen 77 joar loater - n gedenkstien moakt en ploatst op t plak van t kerkhof ien Nijkerk.
- n Aander keer, daarde en leste blog over de Bende van Oldekerk. -
Geen opmerkingen:
Een reactie posten