Der is n puzzel, doar k me elke keer weer over verboazen ken. n Week leden moek ik dizze puzzel met mien dochter.
t Was n puzzel van Tiktak - kovvie en thee, vertelde ze. As kiend har mien moeke de puzzel met heur broerke al moakt. Ik begon stukjes te leggen en was weer terug ien e tied. Herinnerengen werden as puzzelstukjes an mekoar leid. 
Wat n eigenoardege puzzel docht k toen ik hum de eerste keer zag. En ik denk het nog geregeld. Der bennen wel kanten an e puzzel, mor hoe mos je doar met aan? Hoe groot was dizze puzzel eiglieks?
Ik zat met mien broer en broerke op die zotterdagmörgen an e keukentoavel. De swadde potkaggel brandde. Puzzelstukjes laggen uutspreid over toavel.
Der was n hoan, met n boomtak met vogeltje derop. Hoe kon dat nou? De vogel har n geel deuske ien snoavel.
Tiktak Noamirreg Thee uut Grunnengen aal sinds 1870. Tegenwoordeg ken-je t weer kriegen ien Stad en, k wiet niet woar, mor der bennen meer plakken woar je thee kopen kennen. Hoe old de puzzel percies is, ik zol t niet wieten.
De tied verstreek en t schoot mor weineg op. Zo voelde et altied met dingen die lang duurden en mor niet opschoten. De lange weg noar schoel lopen. Wachten bij schoel op pabbe, of op de knecht die mij sums met de brommer kwam ophoalen. En mien jongere broerke doar har je ok niet veul an - nou was er alweer bij toavel votlopen. As mamme nou helpen kon, zol et vast beder goan. Mor ze mos eerst kovvie zetten. Domt kwammen pabbe, opa en knecht kovviedrinken. We mossen eerst zulf puzzeln.
Der warrren gezichten en figuren. Ien e midden zitten allerhande minsen an toavel ien n tuun. Zo nou en dan kwam mamme even kieken en hielp met wat stukjes. Op e achtergrond verscheen n Kovvie- en Theehuus. n Groen deuske met Tiktak kwam te veurschien. En ien e lucht ston ok al weer Tiktak.
t Wer kovvietied en we atten n plak koek. Toen weer vedder met puzzeln en mamme hielp wat met.
Toen was ze weer vot.
Geen opmerkingen:
Een reactie posten