Grote beer

Dizkeer gien sterren of aandere hemellichoamen. Grote beer is ien dit geval n rups/vlinder.

Letien: Arctia Caja. EN: garden tiger moth. 

Veur de nijsgieregen: hieronder n òfbeeldeng hoe of dat n vlinder Grote Beer deruut zigt.

Foto: Jurriën van Deijk.

t Liekt wel n riek joar veur rupsen te wezen. Dizze zwadde joekels kennen der ok wat van.

Dizze kluw zat op e rijten omgeven deur branekkels. Iendrukwekkend.

Met daank aan de Vlinderstichting ien Wageningen Vlinderstichting.

Tuunfluiternust

Nustje van tuunfluiter ien e struken. Ze zitten leeg ien e boskes en tussen de stangen van kruden.

Tuunfluiters (NL tuinfluiter, EN garden warbler; Letien; sylvia borin) holden heur veurnoamelk schuul ien bomen en bosjes. Je kennen ze heuren, ok aal wordt te geluud voak overstemd deur tierntijntje, zwartkop en roodborst.

Jongen met snoavels open. Tied veur eten.

t Nustje zit verbörgen tussen stangen van moerasspirea, bosandoorn, valeriaan, spieren hoog gras. En toch ok wat twiegen van wilde roos of aander leeggroeiend boskes. Rozen hem as veurdeel dat ze doorns hemmen. Dat budt holvast en geft t nust meer stevegheid. Dat ken wel neudeg wezen; sums ken je bij t legsel dwars deur t nust hen kieken.

Zo liekt et op òfstaand. Aargenswoar op e raand van boskes en kruden, tussen twiegen, stangen van kruden en spieren gras holden tuunfluiters heur verstopt.

Wotterpiekje vol kleuren

 Dit is misschien niet zuks n bizundere foto. n Wotterpiekje op t nust.

Toch, deur de körte òfstaand ken je wel mooi de graauwblaauwe hals en borst van e vogel zien. En dan de bruungroen glaanzende veren van rug en vleugels. An e ziedkaant, de witspikkelde flanken. t Kon minder.

Golden vlinder

 Dizze goldkleurege vlinder hiet ien t Nederlaands gestreepte goudspanner (Letien: Camptogramma bilineata).

Gestreepte goldspanner, zo he'k hum mor ien t Grunnegs noemd. Bij mien wieten he'k dizze vlinder nog noeit eerder zien. Misschien komt et deurdat et n nachtvlinder is.

As je de noamgeveng der op noasloagen, is t wel doolhof aan ienformoatie woarom of dat dizze nachtvlinder zo hiet of hieten moet. 

Bizunder is dat spanners ok wel landmeters noemd worden. Omreden dat de rupsen op bizundere menier krupen, as willen ze d'ofstaand aalsmor passen en meten. Dat was ien e tied van Grieken en Romeinen ok aal zo vaststeld.

Ien t Duuts hiet de vlinder: Ockergelber-Blattspanner. De Engelse noam is: yellow shell. 

 

Lös van de kleur van de vlinder het lichtienval ok veul ienvloed op verschieneng van vlinder. Doar dut gien noam wat aan. 

Schoap en wolf

Bennen schoapen wel toerust op t leven op e diek en t kwelderlaand?

Mooi ien t zunnetje, noorderwiend. Lekker lui leggen. Mor dat is gien doen van n schoap vandoag de dag. Want met de komst van de wolf, moet schoapen ok op heur tellen passen. 

De mins is de mins n wolf. Zo gijt t gezegde "Homo homini lupus" ien t Letien. Ofwel met aandere woorden "de mins is n wolf veur zien medemins". Deur t verminderde gebruuk van de daarde noamval (Doatief) wieten alsmor minder minsen dit gezegde goed te duden. 

Vroag is: Hoe woakzoam bennen de schoapen ien e zun? Toen et zuks mooi weer was, he'k even de proef op e som nommen. Dit lam hieronder het de test niet deurstoan.

Toen t beestje bedoard was, kwam t lam weer vrij.

Veur mij was t ok wel n test. t Is altied even òfwachten of t lam n mins deur het of niet. Mor dit joar ben ik weer sloagd.