Twee soorten toal ien Kasjoeben / Kashuby

 

Ien Kasjoeben / Kashuby wordt Kasjoebies sproken. t Contreien leggen ien t noorden van Polen, aan zuudwest kaant van Gdansk.  

Noast heur eigen toal, hemmen ze ok n eigen menier om automobilisten te bedanken veur rusteg rieden en denken om fietsers.  

k Begriep wel dat dit niet genderbestendeg is, mor k vond t mooi geboar om zo de hoed van vroeger te bruken veur moderne automobilist. 

Meertoalegheid ien Kaszoeby contreien

As je ien Polen noar t noorden rieden richteng Gdansk, kennen je bretten tegenkommen met twee noamen.

De rooie streep wil niet zeggen dat beide woorden fout schreven bennen. Staarker nog, t is beidend goed. Bovenste woord is ien t Pools, onderste woord ien Kaszoebisch.

Kaszoebisch is de toal van de Kaszoeben. Kaszoebisch is n West-Sloavische toal die sproken wordt ien n beheurlek groot gebied vanòf de Oostzee / Baltische zee noar t midden van Polen. 

n Aander West-Sloavische toal is t Sorbisch - contreien doar Sorbisch sproken wordt, leggen ien veurmoaleg Oost-Duutslaand (contreien van Cottbus en Bautzen). Binnen d'Europese Unie bennen der zo meer as 30 minderheidstoalen.

t Is n mooi gebied met heuvelland, bossen, meren, beken en laandbouwgrond.

Grond is niet slim vruchtboar. Hierboven stijt boekweit met groene stengels van krödde. Op t Hogeland wordt krödde ok wel roodschonk noemd. As groei der uut gijt, worden stangen van boekweit krekt zo rood as van roodschonk