Dizze vogel (LA: Botaurus stellaris, EN: Great Bittern) zigst niet elke dag. Sums heuren je uut rietvelden t vogelgeluud, dat misschien niet zo bekend veurkomt.
 |
| Nust met jongen - Roerdomp/Rijtdomp |
Dizze jongen zitten verstopt ien e rijten. Zun schient deur de stengels en geft de jongen n bronzen glaans.
De rijtdomp het zien nust ien e rijten. Ien t Nederlaands wordt dizze vogel roerdomp noemd, mor me dunkt rijtdomp is veul beder; dus ien t Nederlaands rietdomp (uutleg onderaan dizze blog).
De rijtdomp is n reiger die ien òfzundereng leeft. Ien tegenstelleng tot de blaauwe reiger het dizze zien nust niet ien e boom mor gewoon op e grond, of eiglieks boven t wotter.
Dit nust leit een 30-40 cm boven wotterpeil. De reitdomp het zien best doan. Dizze vogel tref je niet voak aan ien t Westerkertier. Doarom mooi om vast te stellen dat ze der aal bennen. Leste joaren schient t aantal rijtdompen toe te nemmen.
Nog wat uutleg over roerdomp en rijtdomp.
Domp zol verwiezen noar t geluud dat t beest moakt. t Is wat een dof klinkend, sjompeg geluud.
Mor wat is dan ien vredesnoam n roerdomp? t Eerste deel van t woord 'roer' het niks te moaken met Roer van t Roergebied en Roermond.Roer komt van t Duutse woord Röhr, riet, ok wel schreven bij gebrek aan stipkes op e 'o', schreven as 'oe'. Doar komt 'rör' of 'roer' weg.
Ien t Vries is t ok: Reitdomp. Dat hemmen ze goed bekeken. Noa aal die aanpassengs van vogelnoamen ien t Nederlaands van leste tiental joaren - beveurbeeld Vloamse gaai is Gaai worden - dan van nou òf aan ok mor Rijtdomp.
