Soamenwaarken

Wat bennen de succesfactoren van soamenwaarkeng? Misschien is dat veur elk mins en veur elke organisoatsie weer aans, mor de praktiek is dat niet elke elke soamenwaarkeng leidt tot n groder risseltoat as de som van lösse delen. Ganzen zien je het soamenwaarken geregeld preberen en toch bliekt de uutkomst voak niet ien overeenstemmeng met de belofte.

 

Dit drietal bestijt uut twee wiefkes en n gent. Ze hemmen op twee dikke nusten vol eier broed, vlak noast nkander. n Gaans ken wel vieftien, twinteg eier leggen. Noa vierenhaalf week broeden bennen der mor twee eier uutkommen en doar zien we dan de twee gele ganzepielen.

 

De ervoareng zeit me dat ganzen-soamenwaarkeng altied wel gezelleg is, mor dat et de uutkomst niet ten goede komt. Reden ken ok wezen dat ganzen voak n groder nust aan eier hemmen as dat ze waarm holden kennen. Zo leggen der sums twee loagen an eier ien t nust. En zo as dat wel voaker gijt ien t leven, warmte en aandacht verdelen over teveul zoaken, doar komt weineg goeds van. Focussen noemt men dat vandoag de dag. Mor genog doarover. Wel wiet hemmen de twee ganzepielen met drie woakzoame olden meer kaans op groot worden.
 

Blekkie en Mackie

Zwarte schoapen, blessen, kollen, zwartkoppen. Wat willen jim zeggen? 

 

Vroeger as kiender kregen wij n zwart schoap van Sunterkloas. Dat schoap kreeg de noam Blacky, mor wij zeden Blekkie. As we n zaailam harren, noemden we t lam Mekkie. As ik zuks wat an mien kiender vertel, verstoan ze Mackie en vroagen mij wat dat bij McDonald is. Nou, wel wiet komt der veur de koosjer- of halal-liefhebbers nog n keer n Mekkie-schoapehamburger.

Hoe dan ok krekt as met Jacob ien e biebel, ging et veurspoedeg met onze schoapen. Zwartkoppen, blessen, met kol, bef of vlekken. Wij deden niks bizunders ien e voerbak, mor de zwarte schoapen kregen voak drielengen en vierlengen. Al gaauw har elk van ons kiender n schoap. En de noakommelengen kregen nog meer lammer. Der warren taauwkes met drielengen en n bles brocht n vijfleng. Zo kreeg zwart zowat de overhaand ien e kudde.

t Blieven mooie beesten, met die tekeneng.

Groen tegen Blaauw

t Is niet voak dat we zuks veujoarsweer hemmen as van t joar. Zo warm, en ok zuks fel licht met dat groen tegen t blaauw.

k Heb me vertellen loaten dat de doagen met de meeste zun-uren ien t veujoar bennen, zo rond meert of februoari. Noatuurlek bennen de doagen van juli en augustus veul warmer, mor dat wil nog niet zeggen dat we op die doagen ok meer zun hemmen.

k Heb me verboasd over de planten en bomen zoas die uutbotten, ien sneltempo ien bloei kommen en zo mor weer uutbloeid bennen. Ok dat is zo aans as ik wend ben. 

 

Zuks groen van d'es heb ik niet voak zien. Blaauwer zel et dit joar niet worden, dunkt me.

Roodborstje op t nust

t Het n schoftke duurd, mor uuteindeleks von ik t nustje toch. Doar zat t vogeltje wies op e eier.
Zo veul roodborstvogeltjes je tegenwoordeg zien kennen, zo stoer is om n nustje te vienden.

 

Dizze zit ien n holle boom, rusteg te broeden, zowat twaalf, vieftien doagen.

Boom groot, man dood - Sums gijt t aans.

Boom groot, man dood. Of: Boom groot, plantertje dood. Zo is de uutdrukkeng over de mins, die n boom plant. Sums gijt t aans. Bomen bennen eerder omzoagd.

Misschien moe'k der bliede om wezen. Mor t moeit me. Woar oeit dat jonkje met bomen en kestanjes ien e weer was en hij boomkes rondom de olde gracht pootte, doar is nou ales an d'olle grachtswal weer koal as ongeveer viefteg joar terug.

 

An t enne van e joaren zesteg har k ok n stuk of wat lutje ekkelbomen, die k met n zak vol ekkels van mien opa en oma uut Dedemsvoart noar t noorden met nam. De boomkes plantte k bij nkander ien e tuun. Knien kregen dat winter sukkerbuten en ekkels.
n Poar joar loater he'k ze uutzet langs de gracht. Ekkelbomen groeiden verrekte langzoam. Ze stonden op kleigrond, zaand was der niet te vienden. Meeste boomkes ien e hoge wal overleefden dreuge zummers en vreetgroage bekken van geiten niet. Eén boom bleef hum goed verweren en beetje bij beetje von hij de weg omhoog. We bennen nou zowat viefteg joar vedder. D'ekkelboom, de kestanjes, ze bennen vot. k Heb ze overleefd.