Olde foto van Visvliet - pony bij Gerkesbrug

Vanòf de Gerkesbrug bij Visvliet n blik over de Lauwers, n prachtege stroom tussen Grunnengen en Vrieslaand. Dizze kalenderploat van augustus 1985 zel misschien n joar eerder moakt wezen - kalenders moeten aal veur nij-joar verspreid worden. Pony het meer oog veur de fotograaf as veur de Lauwers, mor goed, doar kon t dier hule dag over t wotter kieken. 

As fietser was et n glimp van misschien n halve minuut over de Lauwers. Dan ging t weer deur over d'olle stroatweg richteng Burum (Boerum) of smirregs weerom deur Visvliet langs krudenier de Wind zien winkel met snoep en ijs. 

Dit was veur mij de grootste brug die ik over mos as schoelier noar Butenpost. Eerst was der westkaant Visvliet, de brug over t Visvlieterdiepke, dan kwam de Gerkesbrug en uuteindelieks ien e buurt van Kollum en d'Augsbuurt, was doar de brug bij Leste Stuver over Stroobosscher trekvoart / Dokkumer trekvoart - al noar gelang t plak doar je de reis begunnen.  

Met d'olle stroatweg is wat bizunders aan de haand. Wat me nou opvalt, is dat de weg vanòf Gruupskerk richteng Visvliet "Friesestraatweg" hiet en as je over de Gerkesbrug ien Vrieslaand bennen, hiet de weg nog even zo goed "Friesestraatweg". 

 

Kent t moar weer deurgoan

Lest was ik ien t dörp Visvliet. Der was schuurverkoop. Even kovvie drinken bij d'olle winkel van Lammert de Wind. An e muur hong n spreuk van hum: Ken t maor weer deurgoan.

Visvliet het wat bizunders veur mij. Mien oma het der woond, ok aal he'k heur noeit kend. Mor ze woonde op n boerderij ien Visvliet. As kiend kwam ik met mien moeke ien Visvliet zo nou en dan op bezoek bij n olle vraauw die vroeger bevriend was met mien oma. 

Vedders ben k as schoelier voak ien Visvliet west. Elke dag fietste k vanòf Gruupskerk noar t Lauwerscollege ien Butenpost. Elke schoeldag kwam ik op e fiets deur Visvliet. Sums stopte ik smirregs kört even veur wat snoepgoed bij de Wind. Dan "ken t mor weer deurgoan".

 

t Hoaventje lag der mooi bij tiedens de schuurverkoop.