Noajoar - tied veur paddestoelen

Òfbeeldeng uut de Streekkraant

Noajoar is de tied van haarfst, van oogsten.  Paddestoelen bennen der volop dit noajoar. Veul regen, dat weert op paddestoelen: eekhoorntjesbrood.

Veur t eerst he'k ien Nederlaand paddestoelen eten van Grunneger grond. Met hulp van Oekraiense ienwoners bij ons ien dörp. n Oekraiense man het bij ons thuus t paddestoelenrecept veurkookt, om zo te zeggen. 

Zo hemmen we n nije ervoareng opdoan. 

We hemmen n nij recept opdoan en bennen weer wiezer worden.  t Was lekker.

k Zee tegen mien vraauw dat der wel meer gerechten bennen, die we niet moaken kennen. Misschien nog mor n keer n dörpsbewoner nuigen veur n moaltied. 

t Woord 'haarfst' liekt veul op t Engelse woord 'harvest' - oogsttied.

Grappige is, dat ons woord oogst weer òfkomsteg is van t woord Augustus, de keizer zien noam is bruukt veur de zummermoand dat der ok oogst wer. Hoe grappig en/of iengewikkeld wil je t hemmen?  

Vremde bloemen

Paddestoelen bennen eiglieks vruchten van schimmels. Nou trov ik n bizundere boom aan. t Leek of de stam vol zat met bloemen. En ja t warren n soort paddestoelen mor aans as gewoonlieks. Ze harren wel wat sierleks.

Met die grode flappen peersrood van kleur (of 'sangen' zo as ze op t Hogelaand zeggen) hemmen ze wel wat weg van lelies, of orchideeën. 

 Ze hemmen kelken die op e kop hangen.

Hier nog n aandere paddestoel, mor wel met wat regenwotter. Zo deed dizze ok zien best om noatuur aan te vullen met mooie beelden.