Blekkie en Mackie

Zwarte schoapen, blessen, kollen, zwartkoppen. Wat willen jim zeggen? 

 

Vroeger as kiender kregen wij n zwart schoap van Sunterkloas. Dat schoap kreeg de noam Blacky, mor wij zeden Blekkie. As we n zaailam harren, noemden we t lam Mekkie. As ik zuks wat an mien kiender vertel, verstoan ze Mackie en vroagen mij wat dat bij McDonald is. Nou, wel wiet komt der veur de koosjer- of halal-liefhebbers nog n keer n Mekkie-schoapehamburger.

Hoe dan ok krekt as met Jacob ien e biebel, ging et veurspoedeg met onze schoapen. Zwartkoppen, blessen, met kol, bef of vlekken. Wij deden niks bizunders ien e voerbak, mor de zwarte schoapen kregen voak drielengen en vierlengen. Al gaauw har elk van ons kiender n schoap. En de noakommelengen kregen nog meer lammer. Der warren taauwkes met drielengen en n bles brocht n vijfleng. Zo kreeg zwart zowat de overhaand ien e kudde.

t Blieven mooie beesten, met die tekeneng.

Groen tegen Blaauw

t Is niet voak dat we zuks veujoarsweer hemmen as van t joar. Zo warm, en ok zuks fel licht met dat groen tegen t blaauw.

k Heb me vertellen loaten dat de doagen met de meeste zun-uren ien t veujoar bennen, zo rond meert of februoari. Noatuurlek bennen de doagen van juli en augustus veul warmer, mor dat wil nog niet zeggen dat we op die doagen ok meer zun hemmen.

k Heb me verboasd over de planten en bomen zoas die uutbotten, ien sneltempo ien bloei kommen en zo mor weer uutbloeid bennen. Ok dat is zo aans as ik wend ben. 

 

Zuks groen van d'es heb ik niet voak zien. Blaauwer zel et dit joar niet worden, dunkt me.

Roodborstje op t nust

t Het n schoftke duurd, mor uuteindeleks von ik t nustje toch. Doar zat t vogeltje wies op e eier.
Zo veul roodborstvogeltjes je tegenwoordeg zien kennen, zo stoer is om n nustje te vienden.

 

Dizze zit ien n holle boom, rusteg te broeden, zowat twaalf, vieftien doagen.

Boom groot, man dood - Sums gijt t aans.

Boom groot, man dood. Of: Boom groot, plantertje dood. Zo is de uutdrukkeng over de mins, die n boom plant. Sums gijt t aans. Bomen bennen eerder omzoagd.

Misschien moe'k der bliede om wezen. Mor t moeit me. Woar oeit dat jonkje met bomen en kestanjes ien e weer was en hij boomkes rondom de olde gracht pootte, doar is nou ales an d'olle grachtswal weer koal as ongeveer viefteg joar terug.

 

An t enne van e joaren zesteg har k ok n stuk of wat lutje ekkelbomen, die k met n zak vol ekkels van mien opa en oma uut Dedemsvoart noar t noorden met nam. De boomkes plantte k bij nkander ien e tuun. Knien kregen dat winter sukkerbuten en ekkels.
n Poar joar loater he'k ze uutzet langs de gracht. Ekkelbomen groeiden verrekte langzoam. Ze stonden op kleigrond, zaand was der niet te vienden. Meeste boomkes ien e hoge wal overleefden dreuge zummers en vreetgroage bekken van geiten niet. Eén boom bleef hum goed verweren en beetje bij beetje von hij de weg omhoog. We bennen nou zowat viefteg joar vedder. D'ekkelboom, de kestanjes, ze bennen vot. k Heb ze overleefd.

Nusten en eier

We zitten midden ien e tied dat eenden heur nusten moaken. De erk zwemt smörgens wat hinneweer ien t wotter, t wiefke zit wat kuultjes te moaken en begunt te nuzzeln veurdat t eerste ei komt.
Tiedens n ommeke moaken zag k zo mor n eend.Stil en woakzoam.

Zo vienden je n nust en zo is der een vot. Der bennen veul lege nusten. Mor ja, der bennen ok aandern die eier lusten. Iemand vertelde mij dat kraaien sluw te waark goan. Eerst komt der een over t wotter aanvliegen, die de slootswallen òfspeurt. De kraai vlugt vlak langs t nust. Mor de eend holdt hum stil en zo gijt t gevoar veurbij. k Wiet niet of d'eend zucht, as de kraai vot is. Wel wiet zoekt ze even de òfleideng en begunt ze n poar spieren stro beder te schikken. Doar komt dan de tweede kraai van t stel anvliegen en joa, hij zigt wat bruuns bewegen, doar ien e rijten.... En t is doan.

Doar is der weer eentje.

Nog eentje.

En de groeten van nog eendje.

Goaweg

n Poar week terug ree k langs t knoal richteng de Noordhörnner Goa. t Is n weg die noar 300 meter opsplitst en uuteindeleks twee keer doodlopt (hoe kent, hoe kent).
An t begun van de Goaweg zat er doar op t bret Goaweg. Mor t woord is òfkomsteg van goalanden -  graslanden, vergliekboar met Zuudhörnner goalanden.

Dizze vogel het volgens mij gien plannen om vot te goan. Zulf zie k et meer as n veurteken. Zo mak, vol zulfvertraauwen, misschien wat brutoal zulfs, zit er doar. Nou bizunder, mor over n poar joar kieken we van n buizerd op zuks n körte òfstaand niet meer op.

Ien e joaren negenteg zag k slim makke blaauwe reigers. Terwiel k an t vissen was ien n viever ien Amsterdam, ston der n reiger noast me te wachten tot k voorn vongen har. Die mirreg kreeg t dier zien moal veur de hule dag. Nou bennen ze doar mak as de duven.

n Eigenoardeg gedicht ien t Drents

Der is wat eigenoardegs met: mien gedicht Broers ien t Drents, dat hiet Breurs. Met n mooie vertoaleng van Ria Westerhuis uut Meppel.
Lest, 19 meert, ston dit gedicht zo mor ien e kraant Dagblad van het Noorden. Tot op heden gien reaksie van redaksie of wel dan ok op mien vroag: Woarom publiceren jim zunder noavroag zo mor mien gedicht?  t Gedicht Broers/Breurs hieronder.

Hoe je kontakt met DvhN leggen, is mij n roadsel. Wel t wiet, mag t zeggen. Misschien wil et beder belukken as je je opgeven as abonnee. Mor goed, t moet ok aans kennen, dunkt me. Ik stoa open veur goeie road.