Golden vlinder

 Dizze goldkleurege vlinder hiet ien t Nederlaands gestreepte goudspanner (Letien: Camptogramma bilineata).

Gestreepte goldspanner, zo he'k hum mor ien t Grunnegs noemd. Bij mien wieten he'k dizze vlinder nog noeit eerder zien. Misschien komt et deurdat et n nachtvlinder is.

As je de noamgeveng der op noasloagen, is t wel doolhof aan ienformoatie woarom of dat dizze nachtvlinder zo hiet of hieten moet. 

Bizunder is dat spanners ok wel landmeters noemd worden. Omreden dat de rupsen op bizundere menier krupen, as willen ze d'ofstaand aalsmor passen en meten. Dat was ien e tied van Grieken en Romeinen ok aal zo vaststeld.

Ien t Duuts hiet de vlinder: Ockergelber-Blattspanner. De Engelse noam is: yellow shell. 

 

Lös van de kleur van de vlinder het lichtienval ok veul ienvloed op verschieneng van vlinder. Doar dut gien noam wat aan. 

Schoap en wolf

Bennen schoapen wel toerust op t leven op e diek en t kwelderlaand?

Mooi ien t zunnetje, noorderwiend. Lekker lui leggen. Mor dat is gien doen van n schoap vandoag de dag. Want met de komst van de wolf, moet schoapen ok op heur tellen passen. 

De mins is de mins n wolf. Zo gijt t gezegde "Homo homini lupus" ien t Letien. Ofwel met aandere woorden "de mins is n wolf veur zien medemins". Deur t verminderde gebruuk van de daarde noamval (Doatief) wieten alsmor minder minsen dit gezegde goed te duden. 

Vroag is: Hoe woakzoam bennen de schoapen ien e zun? Toen et zuks mooi weer was, he'k even de proef op e som nommen. Dit lam hieronder het de test niet deurstoan.

Toen t beestje bedoard was, kwam t lam weer vrij.

Veur mij was t ok wel n test. t Is altied even òfwachten of t lam n mins deur het of niet. Mor dit joar ben ik weer sloagd.

Jantina Hoan of Hennie Hoan

Der is nijs uut de tuun van e Hollandse krielen. Veural dizze witte het nijs te melden.

Mörgens worden wij begroet deur geluden van Hennie Hoan. Ien e tuun lopen vier krielpieken rond. Elk het min of meer heur eigen stek veur eier leggen of om te broeden. 

Dizze is voak buten t piekehok te vienden. En smörgens stapt ze parmanteg rond met de holdeng van n hoan. Dit is gien Jan Hen, mor eerder Jantina Hoan, of wat der tussenien. Hennie Hoan, misschien. Of Hillie Hoan.  

Noamen bennen wel iengewikkeld. Want Hennie, krekt as Willy, ken n jongesnoam en wichternoam wezen ien t Nederlaands. Dus joa, zeg t mor. 

LHBTG+ in dierenwereld is der wel. Mor hoe ales precies te duden, da's de vroag. Ze luustert even goed noar hem as heur. H E N, ken ok. Luuster mor even.  

Link naar youtube: https://youtu.be/MQua4nMLAyk

Vremd nust

 Wat veur nust zol dit nou wezen?

t Zit doar wat verstopt tussen de rijtstengels. Zowat n meter boven t wotter. 

k Mos denken aan n nust van n euliebij (wesp), mor die gebruken gien mos, toch? n App met soortherkenning op Obsidentify gaf dudelekheid. Dit bolvörmeg nust is van n dwergmuus (Letien: Micromys minutus). 

Hoe zigt zuks n muus der uut? Foto hieronder is van Hendrik Osadnik 9/2005).   

Meer ienformoatie op wikipedia.

Jonge hoazen aan t zunnen

Tussen vogelnusten deur kommen je bij tieden ok nog aandere dieren tegen.

Dizze hoaskes harren noar t zin met mooie weer. Ien t nust zatten vier jongen. Kruupvlug om zo te zeggen.

t Ging wat moeizoam om ze fetsoenlieks op de foto te kriegen. Ogen en oren geven meeste holvast.
 

Prachteg weer veur vogels

Vandoag was t prachteg weer. Even voelde k mij weer kiend dat uut schoeltied deur t graslaand liep op zoek noar vogelnusten. 

Rondom plasdras is der van ales te zien. Dit grutonust bevat vier eier, mor een is ien kleinere uutvoereng. 

Graslaand rondom plasdras met veul kruden en weineg bemesteng moakt begroeiing schroaler en t blift koaler. Pitrussen kommen opzetten ien natte stukken. 

Tureluurs perberen heur aan te passen en vienden nije nustgelegenheid. Een nij onderkommen veur de tureluurs. Gien dichte graspol of hoge kruden, die eier aan t oog onttrekken. Midden ien n pitruspol leggen de tureluureier. 

De dikke spieren van de pitrus geven mor weineg met, dat t nust is wat langwerpeg.

Eenden aan t broeden

 Dit veujoar is vroeg begonnen. Dat ken je wel vernemmen aan de eenden.

Dit joar warren der rond half april al veul meer nusten as veurgoande joaren. Veural ok grode broedsels. t Zel helpen dat gras en rijten zo vroeg opkwammen, dat eenden makkelek votkrupen en eier goed verstoppen kennen. Aander beheer van baarms zel ok helpen. Loat maaien en veul meer stoan loaten, ok winter over.

As n eend van t nust vlugt, blieven eier open bloot achter. Goan ze uut heurzulf vot, dan dekken ze ales mooi toe.

Blift n eend zitten, dan is wel even kieken. Hè, woar zit nou die eend?

Joa, en op foto blift d'eend ok stilzitten.

Antwoord op de vroag: Woar zit de eend?: Op de tweede foto is gien eend te vienden. Op daarde foto zit t wiefke (bruun) rechtsveur.

Sums as n eend ienenen opvlugt, beschit ze eigen eier. t Hiet dat et te moaken het met wegholden van kraaien en aandere roofdieren. Of zol t bangegheid wezen? Wel zel t zeggen.