Mooi noajoarsweer nuigt tot spiegeln

Oktober is rojoal met mooie doagen. Zoveul zun dut n mins goed.

Mor blief ien e zun, want ien e schare is t kold en der waait n fiene wiend. Zuks weer nuigt tot spiegeln, vernam ik, toen k hokkelengen ien t laand zag.

Hier is n moment noa de vergoadereng; tied om even ales te weerkauwen.
 

 

25ste Duutse Borslapries veur Nederduutse toal en literatuur

De Borsla-jury het de Borslapries 2021 toekend an n rieg gedichten van mien haand. Uut n artikel van de Duutse krant Nordwest Zeitung 29 september 2021 stijt et zo:

Hieronder t persbericht ien t Westerkertiers:  

Dichter Willem Tjebbe Oostenbrink uut Zuudhörn is met de 25^ste Borsla-pries onderscheiden. Oostenbrink krigt de pries veur zien de rieg gedichten 'Begrip te boven veurbij verbeeldeng' - ofwel ien t duuts: 'Jenseits des Verstehens’. De cyclus bestijt uut n zestal ien t Westerkertiers schreven gedichten. Jurylid Jutta Oltmans zeit over de gedichten: De dichter schildert met veul 'hartenwarmte' prachtige beelden. "Hij moakt 'lüttke Saoken' groot en stelt doarbij vroagen over wat t leven de muite weerd moakt." 

t Is tweede keer dat Oostenbrink de Borslaprie krigt; d'eerste keer was er prieswinner ien 2014. De Borsla-pries wordt toekend deur de Borsla-Vereniging veur nije Nederduutse toal en literatuur. De uutreikeng van e Borslapries zel wezen op 13 november ien Bösel ien e gemeente Cloppenburg (zuidwesten van stad Oldenburg). De Borsla-Vereniging wil de toal en kultuur weerskanten van e grens aanpitjen. De priesvroag is vernoemd noar de naam die de stad Bösel ien e middeliwen droeg.

 

Veujoar lopt tot tot aan e haarfst toe

Zummer hemmen we ien beperkte moate had dit joar. Haarfst komt der an. Der bennen al weer verscheidene buien vallen. Doagen vullen heur met regen.

Mor as je deur t laand lopen of fietsen, liekt t veujoar mor niet op te holden. Dit lutje kikkertje vond k 24 september op e weg. Wel wiet lag et kikkerrit begun augustus nog ien e sloot.

Op 13 september zag k nog n wotterpiekje met n jong - van n 2 week old ongeveer. 

De boeren hemmen t gras op t laand leggen. t Gras veur de kuulbult lag der n week terug nog bij as hooiwierzen bij hoogzummer. Mor t is beurd met zummer.

As je noar de rijten langs de weg kieken, ken-je zien dat we n huul end op glee bennen ien t joar. De rijten hangen leeg, zo wat over t asfalt. As de wiend waait, liekt et as willen ze n hap toe et asfalt uut doen.

Zeeboarsen zendern

Lest n dag op e Waddenzee west, èn der-ien. t Blift n bizundere ervoareng. 

We vertrokken vanòf Den Oever. Vissen vangen met stoand wand. Da's n visnet van 2 breed en wel n kilometer lang. As t eb wordt, ken et net uutzet worden. Al lopend ken je t net controleren op vis. 

Eerst vongen we weineg. Der zatten veul wieren ien t net, en wat botjes. Op t enne van e dag werd de oogst rieker: zeeboars.

Dizze zeeboarzen kregen n specioale behandeleng. Ze kregen n chip ienzet. Noa de operoatsie gingen ze weer terug ien zee.

Zenders zellen ons wieten loaten woar ze kommende moanden en misschien joaren uuthangen. Det geft weer nije kennis over leefgedrag van de zeeboarzen.

Plant ien t wotter

 Lest vond k dizze plant aan e wotterkaant. Met n bietje holvast an e poal en vrijheid van t wotter het ze goed bluid van t zummer. Bizunder.

Onder wotter is de plant host krekt zo lang as boven t wotter.

De app veur plantenherkenneng roek van slag. Dizze omgeveng kon de app niet goed verwaarken. Doarom blief k nog even met noam onbekend zitten. 

Derde column op Meander Magazine over streektaal en Nederlands over 'Gaan'

Het heeft even geduurd, maar nu staat de derde column over streektalen en Nederlands op Meander Magazine - (3) 

t Het even duurd, mor nou is ok mien daarde column over streektoalen en Nederlaands te lezen op Meander Magazine (3). 

Het artikel gaat over en gaat in op het gebruik van 'gaan'; dat maar niet overgaat. Sterker nog, het gebruik van 'gaan' is volgens mij alleen maar toegenomen. Je ziet de laatste jaren dat in zinnen met toekomende tijd, 'gaan' steeds meer de plaats van 'zullen' inneemt. Maar er duiken nog meer zinsconstructies op. Ik ben benieuwd naar jullie ervaring.

Ben benijd hoe of dat et jim toeliekt. t Artikel is ien t Nederlaands, mor der stoan ok wat Grunneger veurbeelden ien. Even een grapke ien t Grunnegs hieronder. 

Man vragt boer: Hoe gijt t met peerd? 

Boer: n Peerd gijt nijt, peerd lopt. 

Man zeit: Hoe lopt t peerd? 

Boer: t Gijt.

Aalsum en Oalsum

Grunnegen en Fryslân, twee verschillende pervincies. En toch hemmen ze meer overeenkomsten as menneg Frysk en Grunneger denkt. Kortleden was ik ien Aalsum, dat leit boven Dokkum.

Ien Fryslân hemmen ze apad n bret veur de terp Aalsum met kerk en n poar wonengs.

t Kerkje stond mooi op e terp, met goed onderholden grafstienen.

Oalsum is n wierde ten westen van Ollehove. Doar ken k gien foto van zien loaten. Ien Grunnengen goan ze wat aans om met zukse noamen. Der is aal n weg 'Aalsumerweg' (Oalsumerweg). Google dut ok zien best om de noam ien ere te holden. Mor wierde kwient vot ien t geheugen en ien e volksmond. 

Dit ken n mooie oproep wezen veur gemeente Westerkertier nog ns noar de noamen van buurtschappen, wierden en gehuchten te kieken - met n bril met rojoale lenzen.