Holtduvenust ien kestanjeboom

Dit joar hemmen we gasten kregen ien onze kestanjeboom.

Sinds n aantal joaren snoei k onze kestanjeboom. D'eerste keer da'k kestanjebomen zag, die snoeid warren, was ien Tsjechië. Ien Nederlaand zien je dat zo wat noeit. Mor, woarom niet, zol k zeggen. Noadeel is dat je ien t veujoar gien mooie kestanjebloesem hemmen. 

Veurdeel is dat duven makkelek n plak vienden om n nust te baauwen. Holtduven, en aandere duven ok, leggen altied twee eier. t Duufke, dan wel te verstoan. Eier wat kleiner as krielpiekeier. Woarom duvesoorten niet meer as twee eier ien n nust leggen, Joost mag t wieten.  

Mor as je noar t nust kieken, liekt et meer as genog. t Nust is zo plat, met wat wiend is et n toer om eier binnen te holden. 

t Was wel stoer om t nust wat goed op foto te kriegen.  

 

 

Grutto op betunpoal

Ien e boskes verscholen het dizze grutto gien wiet van minsen ien noabijheid. 

Of misschien ok wel, mor stelt vogel der weineg belang ien. Zo verkropen ien boskes, voel je je toch wat meer een met noatuur. Tussen brandekkels, elderstruken, snielings, rijten, moerasspirrea zigt de wereld der toch wat aans uut.

Dizze òfbeeldeng geeft zicht op t verbiendengsdiepke tussen t Van Starkenborghkenoal en t Hoerediepke dat zo noar Nijziel stroomt. 

Op dizze òfbeeldeng zien je moerasspirearoest (n schimmel). Zo het moerasspirea zunder ien bloei te wezen n mooie oranje kleur. Bloei let nog even op m wachten. 

Nustje van de zwartkop

Meimoand is toch veujoar met hoofdletters. Zwartkop zingt zien zang.

 

Te meer as der zuks n nustje ien e boskes zit. Prachteg roze-oranje eikes. Verscholen ien e rozestruken, kruden en brannekkels. t Blift uutzunderliek

En de vogels zingen ien e bomen, tierntijntje, fitis, zwartkop, nachtegaal, n keutelduumke (winterkoning), der is van ales te beluustern. Broamsluper, tuunfluiter, et holdt niet op. 

Roanum

 Krekt boven Winsum leit de wierde Roanum.

t Ken wezen dat de grode herenboerderij op Roanum veur veul minsen t middelpunt is. Mij boeit dizze olle boereploats moateloos. De bouwstijl liekt wat op kop-hals-romp boerderij. Allenneg is de hals hier zowat lieke hoog as de kop. Of zollen ze de kop der loater tegenaan bouwd hemmen?

Aan e westkaant van e schuur wordt muur stut deur wel zes steunberen. Doarmet ken schuur et nog wat langer uitzingen.

 

Plasdras en wetlands ien Zweden

Zweden moakt ok gebruuk van Europese regelengen veur agroarisch noatuurbeheer.

Wat hier plasdras hiet, noemen ze ien Zweden wetlands. Kluten (Letien: Recurvirostra avosette; En: avocet) wieten t plak ok te vienden.

 

Ze hemmen uutstroom van e beek aanpast zodat t wotter n langere weg òfleggen ken veurdat et ien t meer terecht komt. Dat levert paaiploatsen veur de snoek.   

Wotter ien de beek en t meer stoan slim leeg dit joar. Ze hemmen zo wat gien wotter had vanòf meert 2025.

Bergeenden - eier ien dons

 Bergeenden (Letien: Anser anser) bennen prachtege eenden.

Ok al hemmen ze wat weg van n kleine gaans. Kiek hier zwemt der een.

Foto: Mabel Amber - pixabay

Bergeenden hemmen weineg neudeg om n nust te baauwen: naauwlieks stro, ruugte. Ze bruken heur eigen veren en dons om d'eier waarm te holden. Niet om te verstoppen. 

Doarveur bruken ze holen ien de dunen bij noatuurleke omstandegheden. Bij de Lauwersmeer nuzzeln ze ok op t hiem van boereploatsen. n Melkbus of votstopte plek is niet genog. 

Der moet altied n tunnel, een buis van 2-4 m lang wezen om n nust te moaken. Dan kommen ze elk veujoar weerom aan plakken met wat open wotter, n gracht om n boerderij, dat budt goeie gelegenheid. 

Koolzoad ien Zweden - "runt hörnet"

Woar bennen velden geler as ien Zuud-Zweden.

Laandstreek hiet Skoane. Zweden schrieven: Skåne län. Mor de A met kringeltje, is min of meer ao ien Drents of oa ien t Grunnegs.Veur d'eerste keer ien Zweden ien mei; n geschikt moment om d'overweldegende koolzoadvelden te zien. 

t Was zo geel dat as ik soavends mien ogen dicht dee, gele kleuren opdoken. Veur de groene strook warren de peerdebloemen die hard met deden.

Ien Lund was de receptie "Runt hörnet". Om e hoek. Ik woon ien Zuudhörn en dat het der wel wat van weg. 

Ien t Grunnegs hemmen je stukken laand met hoeken en hörns. Hoeken bennen de happen as et woare uut et perceel. Hörns bennen de uutstekende delen van t perceel.